Eng kaol neiy i kawuka’ ¹ Wo niaku ku limoo’ siesa malaikat walina si ente’ si timumpami waki sorga, si sinalelengla e linaak, wo eng kole’ em bitu natas eng kokongna wo eng giona masuat tanu si endo, wo e ne’ana en tanu mokan en tobol e napi. ² Witu lawasna nisia si timiboiy e nesa langkunan eng kaol oki’ neiy i kawuka’. Nisia si kimonta’la e ne’a lele’osna witu natas en tasik wo e ne’a kaawina witu natas em bumi, ³ wo nisia si maaleiy ampit en suara menaleinteng masuat tanu si singa manguang. Wo nisia nu minaleiy mola, se pitu lenter i ti’i se minapalingala en suara nea. ⁴ Wo nu reiy’ mouw se pitu lenter i ti’i nu simampetouw masusuiy, niaku ku pa’ar mepepatikla nyi’a, ta’an niaku ku liminga e nesa suara waki sorga limila’: “I wa’ilola sapa neiy i lila’la ne pitu lenter i ti’i wo te’a mouw koo mepepatikla nyi’a!” ⁵ Wo si malaikat linoo’ku rimedeiy witu natas en tasik wo witu natas em bumi, si minayat e lawas lele’osna waki langit, ⁶ wo sia tumiwa’ demi Nisia nu matou-tou i ka’ayo eng keure-urena, si simiwo mola e langit wo e reiy’ sa mina’asa em pumpunna, wo em bumi wo e reiy’ sa mina’asa em pumpunna, wo en tasik wo e reiy’ sa mina’asa em pumpunna, pokeiyna: “Reiy’ mola ni’i pelelodokla kasi! ⁷ Ta’an witu en toro e legu’an sesebungen waki si malaikat eng kapitu, nyi’a i ti’i sakawisa sia sumengo en sesebungenna, takar e laa mouw malekep eng kaputusan em pengiro-ngirong ni Empung, tanu e neiy mouw i abar-Nala wia se hamba-hambana, nyi’a i ti’i se nabi.” ⁸ Wo en suara liningaku mola waki langit i ti’i, limila’ kangkasi wia niaku, pokeiyna: “Mea mouw, edonouw e langkunan eng kaol minawuka’ witu e lawas ni malaikat, si rimedeiy witu natas en tasik wo witu natas em bumi i ti’i.” ⁹ Laa o ku mea wia si malaikat i ti’i wo kumiwee wia nisia, rio sia meela e langkunan eng kaol i ti’i wia niaku. Pokeiyna wia niaku: “Edonouw wo kaanenouw sia; sia si laa sumiwo en tiannu mape’an pe’it, ta’an witu eng gorem en sumamu nisia si laa pe’anen emis tanu e madu.” ¹⁰ Laa o ku medo eng kaol i ti’i witu lawas ni malaikat i ti’i, wo kumaan nyi’a: witu eng gorem en sumaku nisia si pape’anen emis tanu e madu, ta’an niaku nu kimaanola nyi’a, en tianku e minape’it pape’anen. ¹¹ Takar sia lumila’ wia niaku: “Nikoo koo lewo’ sa reiy’ mawenti’ kasi wia se kelaker bangsa wo ne kaum wo em baasa wo ne raja.”