Rua sairi ni Empung ¹ Kamurian i wee mola wia niaku esa nge wa’atang tabelang, tanu en diki-diki i peukur paloo’ola, ampit e lelila’an-lelila’an tumodongla: “Tumo’orouw wo ukurenouw em Bait Suci ni Empung wo e mezbah wo nisea se meraghes witu eng goremna. ² Ta’an i kawila eng kalasan em Bait Suci witu esa nga weka luar, te’a mouw koo me’ukur nyi’a, karengan nyi’a neiy mouw i weela wia se bangsa-bangsa walina wo nisea se laa mele’e-le’ek eng Kota Suci epat nga pulu’ o rua nga sumedot eng keurena.” ³ Wo Niaku ku laa mee lukar wia se rua sairi-Ku, rio sea menti’ eng kasuatan mengasi’, esa nga riwu rua nga atus enem nga pulu’ nga endo eng keurena. ⁴ Nisea nyi’a mouw se rua akana en zaitun wo se rua ne’ana en solo se rimedeiy witu en sinaru ni Tuhan semesta alam. ⁵ Wo sa wona’ wawean tou si laa mererarala nisea, kumaluarouw e napi waki suma nea e rumengisla em baya se kesaru nea. Wo sa wona’ wawean tou si laa mererarala nisea, takar sitou i ti’i si lewo’ sa reiy’ mate ampit eng kenaramen i ti’i. ⁶ Nisea se makapunya kuasa mepepenet e langit, rio te’a tumumpa e naro eng keurean nisea nu mawenti’; wo nisea se makapunya kuasa witu e reiy’ sa mina’asa rano kaa laa meseseupla nyi’a mamuali raa’, wo kaa laa mewewewe em bumi ampit e reiy’ sa mina’asa jenis malapetaka, susur sea mepa’arla nyi’a. ⁷ Wo sakawisa sea nu simampetola eng kasairian nea, takar si tekapen minodoli waki temping e maut, si laa sumeke’la nisea wo kumalala ampit e munu’ nisea. ⁸ Wo e mayat nea e laa i kareta’ witu natas e lalan sela eng kota wangko’, kaa eng kenaramen rohani en tinotor Sodom wo e Mesir, witu e wisa kangkasi si Tuhan nea si neiy i salibla. ⁹ Wo se tou-tou waki e reiy’ sa mina’asa bangsa wo se suku wo em baasa wo se kaum, se limoo’ se mayat nea telu esa nga parua nga endo eng keurena wo se tou-tou i ti’i se reiy’ meela se mayat nea i pekekuburla. ¹⁰ Wo nisea se maena’ wia natas em bumi se melaya-laya’ wo mepa’a-pa’ar witu nisea i ti’i wo mapelesir wo se mepepa’alian tetaber, karengan se rua nabi i ti’i se tanu mokan en siksa’an wia em baya ne tou se maena’ wia natas em bumi. ¹¹ Telu esa nga parua nga endo kamurian o ghumoremouw e roh em patou-touan waki si Empung mineiy witu eng gorem nea, i ka’ayo sea tumo’or wo em baya ne tou se limoo’ nisea se kasa mineide’. ¹² Wo se tou-tou i ti’i se liminga e nesa suara menaleinteng waki sorga e meila’ wia nisea: “Lumongkotomi wia nyi’i!” Laa o lumongkotouw sea waki langit, sinaputla e linaak, se peloo’o-loo’on ne kesaru-kesaru nea. ¹³ Witu e nedo ni’itu o mamuali mouw em pengero’ kasa hebat wo esa nga mapulu’ nga weteng witu eng kota i ti’i e rimonga’, wo se pitu nga riwu tou se minate kaa em pengero’ i ti’i wo se tou-tou walina se kasa kineide’an, laa o malo’orla si Empung waki sorga. ¹⁴ Cilaka eng karua e limangkoiy mouw: loo’onouw, en cilaka katelu e makarengan tumodeiy. ¹⁵ O laa si malaikat eng kapitu si simengo en sesebungenna, wo kalinga’anouw en suara-suara menaleinteng waki ghorem en sorga, pokeiyna: “Em pemerenta’an wia eng kaoatan en tiniboiyan ni Tuhan ta wo Nisia si ni’isu’-Nala, wo Nisia si laa merenta tanume si raja i ka’ayo eng keure-urena.” ¹⁶ Wo se rua nga pulu’ o epat tu’a-tu’a, se rimuber witu en sinaru ni Empung witu natas en takhta nea, se neiy’ i kasungkur wo masempe si Empung, ¹⁷ kasuatan meila’: “Nikeiy keiy matotor syukur wia-Nikoo, ee Tuhan, Empung, Si Kasakuasa, si wia wo si wia mouw, karengan Nikoo koo minalarouw eng kuasa-Mu wangko’ wo mamuleiy mouw maperenta tanume si raja ¹⁸ 18 wo em baya ne bangsa se meupi’ mouw, ta’an e nupi’-Mu mineiy mouw wo e nedo wia se tou-tou minate kaa laa pa’akimen wo kaa laa mewewee tetoro wia se hamba-hamba-Mu, se nabi-nabi wo se tou-tou kudus wo wia nisea se meide’la e ngaran-Nu, wia se tou-tou rintek wo se tou-tou sela wo kaa laa mepepunengla seiy i te si mepepunengla em bumi.” ¹⁹ 19 Takar mawuka’ mouw em Bait Suci ni Empung waki sorga, wo kaloo’anola en tabut teta’aran-Na witu eng gorem em Bait Suci i ti’i wo mamuali mola eng kerap wo neder e lenter wo em pengero’ wo e naro repet eis.