Wewene wo si naga ¹ Takar tu kaloo’anouw e nesa kowa’ wangko’ waki langit: Siesa wewene sinalelengla ni endo, ampit si sumedot si witu e wawa’ e ne’ana wo e nesa mahkota waki se mapulu’ o rua sumesena’ se witu natas eng kokongna. ² Nisia si kasuatan megandong wo witu e nga’angal wo em peme’itanna kaa laa metetimea’la nisia si marekeiy kaa eng kerara. ³ Takar kaloo’anola e nesa kowa’ walina waki langit; wo loo’onouw, siesa naga mea’ rengis sela, si maka kokong pitu wo si maka sunge mapulu’, wo witu natas eng kokongna wawean em pitu mahkota. ⁴ Wo nipusna makeo-keong esa nga patelu wia se sumesena’-sumesena’ waki langit wo lumawala nyi’a wia natas em bumi. Wo si naga i ti’i si rimedeiy witu en sinaru ni wewene metetimea’ i ti’i, kaa laa melele’ouw si Oki’na, nu reiy’ mouw si wewene i ti’i nu timimea’la Nisia. ⁵ Takar sia tumimea’la siesa Oki’ tuama, si laa mererawirla em baya ne bangsa-bangsa ampit eng gada wesi; i kasenge’mi si Oki’na i ti’i si kinaat wo niali neiy i tingkas wia si Empung wo mea waki takhta-Na. ⁶ Si wewene i ti’i si timingkas waki padang gurun, waki wisa en sinadia mola ni Empung e nesa tampa i wee nisia, rio sia piaran witu esa nga riwu rua nga atus enem nga pulu’ nga endo eng keurena. ⁷ Takar lumentutouw em paseke’an waki sorga. Mikhael wo se malaikat-malaikatna se maseke’ mesaru si naga i ti’i, wo si naga i ti’i si sinawang ne malaikat-malaikatna, ⁸ ta’an nisea se reiy’ mete’u timaang; nisea se reiy’ mouw minaka’ato kasi en tampa waki sorga. ⁹ Wo si naga sela i ti’i, si leloiy’ tu’a, si patotoren Iblis ka’apa Setang, si simeipla se minapekasa eng kaoatan, si neiy i lawala waki wawa’; nisia si neiy i lawala wia em bumi, mewali-wali ampit se malaikat-malaikatna. ¹⁰ Wo niaku ku liminga en suara menaleinteng waki sorga e meila’: “Teakan e neiy mouw i kaa’ayo eng kelawiran wo eng kuasa wo em paperenta’an ni Empung ta, wo eng kakuasa’an-Na e ni’isu’-Nala, karengan si neiy mouw i lawala waki wawa’ si tumeture se patuari -patuari ta, si mature nisea oat wo wengi witu en sinaru ni Empung ta. ¹¹ Wo nisea se kimalala nisia kaa e raa’ ni Oki’ ni Domba, wo kaa e lelila’an kasairian nea. Karengan nisea se reiy’ meupusla e nyawa nea i ka’ayo waki ghorem e maut. ¹² Kaa ni’itu mepa’a-pa’arola, heiy sorga heiy nikouw nu waya si maena’ witu eng goremna, cilaka mouw nikouw, heiy bumi wo en tasik! Karengan si Iblis si timumpa mouw wia nikouw witu e nupi’na kasa hebat, karengan nisia si mete’u, kaa e nedona em pototokan.” ¹³ Wo eng katoroan si naga i ti’i nu mawena’as, kaa nisia si neiy mouw i lawala wia natas em bumi, nisia si masero si wewene timimea’la si Oki’ tuama i ti’i. ¹⁴ Wia si wewene i ti’i si wineeanla rua tetelew ni burung nasar sela, rio sia tumelew waki tampana waki padang gurun, waki e wisa sia nu papiaran wa’akat waki en tampa ni leloiy’ i ti’i eng keurean e nesa masa wo e rua masa wo esa nga parua masa. ¹⁵ O laa si leloiy’ i ti’i kumeresoti rano witu en sumana, kaselana en temberan, matorola si wewene i ti’i, rio sia i so’oso’la en temberan i ti’i. ¹⁶ Ta’an em bumi mineiy tumulung si wewene i ti’i. Nisia si minuka’ en sumana, wo lume’ouw en temberan neiy i keresotla ni naga i ti’i waki sumana. ¹⁷ Takar meupi’ mouw si naga i ti’i wia si wewene i ti’i, laa o mea sumeke’la se see’na walina, se maki’itla e nukum-ukum ni Empung wo se makapunya eng kasairian ni Yesus. ¹⁸ Wo nisia si minena-ena’ rimedeiy waki pante tasik.