Si tekapen rimou’mi waki ghorem en tasik ¹ Laa o ku lumoo’ siesa tekapen rimou’mi waki ghorem en tasik, si maka sunge mapulu’ wo maka kokong pitu; witu natas en sunge-sungena wawean e mapulu’ mahkota wo witu eng kokongna neiy i kepatik ngaran-ngaran e nojat. ² Si tekapen linoo’ku i ti’i si masuat ampit si macang ti’itikan, wo e ne’ana en tanu ne’a ni beruang wo en sumana tanu en suma ni singa. Wo si naga i ti’i si mineela wia nisia eng kaente’anna, wo en takhtana wo eng kakuasa’anna wangko’. ³ Takar mapaloo’o mouw wia niaku e nesa witu eng kokong-kokongna tanu en tinena’ em pali’ meteterila em patou-touanna, ta’an em pali’ meteterila em patou-touanna i ti’i e minale’os. Se minapekasa eng kaoatan se mina’erang, laa o kumi’itla si tekapen i ti’i. ⁴ Wo nisea se masempe si naga i ti’i, karengan nisia si mineela eng kakuasa’an wia si tekapen i ti’i. wo nisea se masempe si tekapen i ti’i, kasuatan meila’: “Seiy ku’a re’en si masuat tanu si tekapen i yi’i? Wo seiy ku’a re’en si toro sumeke’ sumaru nisia?” ⁵ Wo wia si tekapen i ti’i si wineeanla suma, wuta eng katingkeiyan wo e nojat; wia nisia si wineeanla kangkasi eng kuasa kaa laa metetuanala nyi’a epat nga pulu’ o rua nga sumedot eng keurena. ⁶ Laa o sia muka’ en sumana kaa laa ma’ojat si Empung, ma’ojat e ngaran-Na wo en dasing paena’an-Na wo em baya nea nu maena’ waki sorga. ⁷ Wo nisia si ni’iyonala kaa laa sumeke’ sumaru se tou-tou kudus wo kaa laa mekekalala nisea; wo wia nisia si wineeanla eng kuasa wia se susur suku wo se umat wo em baasa wo se bangsa. ⁸ Wo em baya ne tou maena’ wia em bumi se laa sumempe nisia, nyi’a i ti’i susur tou e ngaranna reiy’ neiy i kepatik rengane’ eng kaoatan siniwola witu eng kaol em patou-touan waki si Oki’ ni Domba, si rineretanola. ⁹ Seiy i te si makatalinga, satorona nisia si luminga! ¹⁰ Seiy i te si neiy i tantula kaa laa taangen, nisia si laa taangen; seiy i te si neiy i tantula kaa laa wunu’un ampit en santi, nisia si lewo’ sa reiy’ wunu’un ampit en santi. Em peuku-ukumen wia nyi’i nyi’a mouw eng katenteman wo e iman ne tou-tou kudus. ¹¹ Wo niaku ku limoo siesa tekapen walina si rimou’mi waki ghorem em bumi wo si maka sunge rua masuat tanu si oki’ ni domba wo nisia si mesesusuiy tanu si esa nga ipus naga. ¹² Wo e minapekasa kuasa ni tekapen kasa ketare i ti’i ni’i pakelangnala witu en sinaru em berenna. Nisia si simiwola se minapekasa em bumi wo em baya ne maena’ witu se masempe si tekapen kasa ketare, em pali’na e le’osouw. ¹³ wo nisia si simiwola eng kowa’-kowa’ kasa hebat, awes tare nisia si timumpami e napi waki langit mineiy wia em bumi witu en sinaru em beren em baya ne tou. ¹⁴ Nisia si simeipla nisea se maena’ wia em bumi ampit eng kowa’-kowa’, neiy mouw i weela wia nisia kaa laa petetuanannala witu en sinaru em beren ni tekapen i ti’i. Wo nisia si rimeo nisea se maena’ wia em bumi rio sea rumedeiyla patong kaa laa ma’ormatla si tekapen minepali’ kaa en santi, ta’an si minena-ena’ matou-tou i ti’i. ¹⁵ Wo wia nisia si wineean eng kuasa kaa laa meweweela e nyawa wia si patong tekapen i ti’i, i ka’ayo si patong tekapen i ti’i si simusuiy kangkasi, wo si mininta’ en tuana rupa, i ka’ayo em baya ne tou, se reiy’ masempe si patong tekapen i ti’i, se winunu’. ¹⁶ Wo nisia si simiwola, i ka’ayo wia em baya ne tou, rintek ka’apa sela, kaya ka’apa miskin, merdeka ka’apa hamba, se wineean kowa witu e lawas lele’osna ka’apa witu en tuintungna, ¹⁷ wo reiy’la siesa tou tu’u si toro tumeles ka’apa mangker ta’an i te nisea se minake eng kowa’ i ti’i, nyi’a i ti’i e ngaran ni tekapen i ti’i ka’apa eng kelakerna e ngaranna. ¹⁸ Em pe’ukumen wia nyi’i nyi’a mouw eng hikmat: seiy i te si sama’, le’osouw sia rumeken eng kelakerna ne tekapen i ti’i, karengan eng kelakerna i ti’i nyi’a mouw eng kelakerna ni esa tou, wo eng kelakerna nyi’a mouw e nenem nga atus enem nga pulu’ o enem.