Oki’ ni Domba wo se maki’i-ki’it Nisia se tinubus-Na ¹ Wo niaku ku limoo’: eng kaulitna, si Oki’ ni Domba si rimedeiy waki kakenturan Sion wo mewali-wali ampit Nisia se esa nga atus epat nga pulu’ o epat nga riwu tou wo witu en tuintung nea neiy i kepatik e ngaran-Na wo e ngaran ni Ama’-Na. ² Wo niaku ku liminga e nesa suara waki langit en tanu mokan e nerutan e rano ampuan wo en tanu mokan e re’erekan e lenter kasa hebat. Wo en suara liningaku i ti’i en tanu e legu’an ne memema’ayang no’olingen se mepa’ayangla e no’olingen nea. ³ Nisea se mekantarla e nesa kekantaren weru witu en sinaru en takhta wo witu en saruan ne epat makhluk wo ne tu’a-tu’a i ti’i, wo e reiy’ siesa tou tu’u si mete’u mina’ajarla eng kekantaren i ti’i ta’an i te se esa nga atus epat nga pulu’ o epat nga riwu tou se tinubusola waki bumi i ti’i. ⁴ Nisea nyi’a mouw se tou-tou reiy’ kimewurla en touna ampit se wewene-wewene, karengan nisea se murni masuat tanu si reraa. Nisea nyi’a mouw se tou-tou maki’i-ki’it si Oki’ ni Domba i ti’i wisa i te Sia mea. Nisea se tinubus witu e nelet ne tou tanume se tetule-tetule polon i wee si Empung wo i wee si Oki’ ni Domba i ti’i. ⁵ Wo witu eng gorem en suma nea reiy’ niatoan en towo; nisea se reiy’ siwoang. ⁶ Wo niaku ku limoo’ siesa malaikat walina si timelew witu eng keuneran e langit wo wia nisia wawean e Injil kekal kaa laa i pa’abarnala wia nisea se maena’ wia natas em bumi wo wia em baya ne bangsa wo se suku wo em baasa wo se kaum, ⁷ wo nisia si maaleiy ampit en suara menalainteng: “Meide’ mola wia si Empung wo lo’orenola Sia, karengan neiy mouw i ka’ayo e nedo pa’akiman-Na, wo sempenouw Sia si simiwo mola e langit wo em bumi wo en tasik wo em baya eng kembu’an e rano.” ⁸ 8 Wo siesa malaikat walina, si malaikat eng karua, si timodeiyi wia nisia wo lumila’: “Rimonga’ mouw, rimonga’ mouw em Babel, eng kota wangko’ i ti’i, en timoekola se reiy’ sa mina’asa bangsa ampit e nanggor en serit sa’amekna.” ⁹ Wo siesa malaikat walina, si malaikat eng katelu, si timodeiyi wia nisea, wo lumila’ ampit en suara menaleinteng: “Sa wona’ siesa tou si sumempe si tekapen wo si patongna i ti’i, wo maka’ato kowa’ witu en tuintungna i ti’i ka’apa witu e lawasna, ¹⁰ takar nisia si laa kumoo’ witu e nanggor nupi’ ni Empung, en sinadiala reiy’ sisewokna witu eng kower e nupi’-Na; wo nisia si laa siksan ampit e napi wo em balelang witu en sinaru em beren ne malaikat-malaikat kudus wo witu en sinaru em beren ni Oki’ ni Domba. ¹¹ Takar e nawun napi masiksa nisea i ti’i e minatas i ka’ayo reiy’ siniakaran, wo oat o wengi nisea se reiy’ siena’na pasiksan, nyi’a i ti’i nisea se masempe si tekapen ma’an si patongna i ti’i, wo seiy i te si minaka’ato mola eng kowa’ e ngaranna.” ¹² Em pe’uku-ukumen wia nyi’i nyi’a mouw eng katenteman ne tou-tou kudus, se maki’itla em perenta ni Empung wo e iman wia si Yesus Kristus. ¹³ 13 Wo niaku ku liminga en suara waki sorga meila’: I patikla: “Ma’aruiyola se tou-tou minate se minate witu si Tuhan, rengan en teakan i yi’i.” “Uli-ulit,” em pokeiy ni Roh, “rio sea toro maseng witu em bineduan nea, karengan e reiy’ sa mina’asa pasiwo-siwon nea e merapitla nisea.” ¹⁴ Wo niaku ku limoo’: eng kaulitna, wawean e nesa linaak puti’, wo witu natas e linaak i ti’i rimuber siesa tou tanu si Oki’ ni Tou ampit e nesa mahkota mas witu natas eng kokong-Na wo e nesa sa’abit tarem witu e lawas-Na. ¹⁵ Takar rumou’ momi siesa malaikat walina waki Bait Suci; wo nisia si maaleiy ampit en suara menaleinteng wia Nisia si rimuber witu natas e linaak i ti’i: “I wayongola en sesampur-Mu i ti’i wo mupu’ mouw, karengan neiy mouw i ka’ayo e nedona laa me’upu’; karengan em pe’upu’un wia em bumi em bowosouw.” ¹⁶ Wo Nisia, si rimuber witu natas e linaak i ti’i, si minayongla en sesampur-Na waki atas em bumi, wo em bumi tu’u e niupu’ mouw. ¹⁷ Wo siesa malaikat walina si rimou’mi waki Bait Suci waki sorga; o kangkasi em bia nisia wawean e nesa sesampur tewel. ¹⁸ Wo siesa malaikat walina si waki mezbah o meiy; nisia si makakuasa witu e napi wo nisia si maaleiy ampit en suara menaleinteng wia si malaikat timiboiy en sesampur tewel i ti’i, pokeiyna: “I wayongola en sesampurmu tewel i ti’i wo ketorenouw e wu’ana-wu’ana e nakana nanggor waki bumi, karengan e wu’ana em bowosouw.” ¹⁹ O laa si malaikat i ti’i si minayongla en sesampurna waki atas em bumi, wo kumetor em bu’ana nakana e nanggor waki bumi wo lumawala nyi’a witu eng gorem em pagilingan wangko’,nyi’a i ti’i e nupi’ ni Empung. ²⁰ Wo e wu’ana-wu’ana e nanggor i ti’i eng giniling waki luar kota wo waki gilingan i ti’i en simo’oso’ e raa’, kerakekna e mina’ayo en tom ni kawalo wo eng kewa’akatna e rua nga atus mil.