Eng kekantaren nea ne minuntung ¹ Wo niaku ku limoo’ e nesa kowa’ walina waki langit, wangko wo maka’erangen: se pitu malaikat ampit em pitu kacilaka’an kesampetan, karengan ampit e ni’itu eng kimawusola e nupi’ ni Empung. ² Wo niaku ku limoo’ wo’o sapa en tanu mokan e lawanan kaca minasewok e napi, wo witu em biwina lawanan kaca i ti’i rimedeiy se tou-tou kimala mola si tekapen i ti’i wo si patongna wo eng kelakeran e ngaranna. Witu nisea wawean e no’olingen ni Empung. ³ Wo nisea se mekantarla eng kekantaren ni Musa, hamba ni Empung, wo eng kekantaren ni Oki’ ni Domba, e linga’anna: “Wangko’ wo maka’erangen e reiy’ sa mina’asa em pina’ayang-Mu, ee Tuhan, Empung, Si Kasakuasa! Adil wo e nulit em baya lalan-Nu, ee raja em baya ne bangsa! ⁴ Seiy ku’a re’en si reiy’ meide’, ee Tuhan, wo si reiy’ malo’orla e ngaran-Nu? Karengan Nikoo i te si kudus; karengan em baya ne bangsa se laa meiy wo mongkot sumempe Nikoo, karengan em pakaloo’o-loo’onola eng kaulitan e reiy’ sa mina’asa em pa’akiman-Nu.” ⁵ Kamurian witu e ni’itu niaku ku limoo’ sitou minuka’ em Bait Suci – en dasing kasairian – waki sorga. ⁶ Wo se pitu malaikat ampit em pitu kacilaka’an i ti’i, se rimou’mi witu em Bait Suci, se minake e lenan puti’ weresi e maserenga-serengat wo em be’ewerna eng kinulilitan e ne’ereten mas. ⁷ Wo siesa wia se epat makhluk i ti’i si mineela wia se pitu malaikat i ti’i em pitu cawan mas wuta pinumpunan e nupi’ ni Empung, nyi’a i ti’i si Empung si matou-tou i ka’ayo eng keure-urena. ⁸ Wo em Bait Suci i ti’i winutala e nawun karengan eng kalo’oran ni Empung wo eng karengan eng kuasa-Na, wo siesa tou tu’u si reiy’ mete’u megheghoremla em Bait Suci i ti’i, nu reiy’pe’ simampet em pitu kacilaka’an waki se pitu malaikat i ti’i.