E wa’il kapitu ¹ Wo eng katoroan si Oki’ ni Domba i ti’i nu minuka’ e wa’il kapitu, takar eng kasa penesouw e waki sorga, wo’o wona’ esa nga parua jam eng keurena. ² Laa o ku lumoo’ se pitu malaikat, se rimedeiy witu en sinaru ni Empung, wo wia nisea se wineeanla em pitu sesebungen. ³ Takar o meiy mouw siesa malaikat walina, wo sia mea rumedeiy witu en tawi e mezbah ampit e nesa padupa’an mas. Wo wia nisia si wineeanla kelaker eng kamania kaa laa i pesesempenala mewali-wali ampit en sesombayangen em baya ne tou kudus witu natas e mezbah mas witu en sinaru en takhta i ti’i. ⁴ Takar matasouw e nawun eng kamania mewali-wali ampit en sesombayangen ne tou-tou kudus i ti’i witu e lawas ni malaikat i ti’i mea witu en sinaru ni Empung. ⁵ O laa si malaikat i ti’i si minedo em padupa’an i ti’i, o mumpunla nyi’a ampit e napi waki mezbah, wo lumawala nyi’a wia em bumi. Takar tu lumetokouw e legu’an e lenter, rinapiti eng kerap wo em pengero’. ⁶ Wo se pitu malaikat se timiboiy em pitu sesebungen i ti’i se meniro-niro’ kaa laa mesesengo en sesebungen. ⁷ O laa si malaikat kasa ketare si simengo en sesebungenna wo mamuali mola e naro eis, wo e napi, minasewok e raa’; wo em baya nyi’a i ti’i neiy i lawala wia em bumi; takar marengisouw esa nga patelu em bumi wo esa nga patelu akana-akana wo marengisola e minapekasa rukut-rukut lisouw. ⁸ O laa si malaikat eng karua si simengo en sesebungenna wo wawean e nesa tanu eng kuntung wangko’, melaya-layas kaa e napi, neiy i lawala witu eng gorem en tasik. Wo esa nga patelu witu en tasik i ti’i e minamuali raa’, ⁹ wo mate mola se esa nga patelu wia se reiy’ sa mina’asa makhluk meke nyawa witu eng gorem en tasik wo mapunengouw esa nga patelu witu em baya eng kapal. ¹⁰ O laa si malaikat eng katelu si simengo en sesebungenna wo ruma’araghomi waki langit siesa sumesena’ wangko’, melaya-layas tanu em barung, wo nisia si timorola esa nga patelu witu e temberan-temberan wo eng kembu’an-kembu’an e rano. ¹¹ Ngaran ni sumesena’ i ti’i nyi’a mouw e Apsintus. Wo esa nga patelu witu em baya e rano minamuali apsintus, wo kelaker se tou minate karengan e rano i ti’i, kaa e minape’itouw. ¹² 12 O laa si malaikat eng kaepat si simengo en sesebungenna wo kaweweanouw esa nga patelu wia si endo wo esa nga patelu wia si sumedot wo esa nga patelu wia se sumesena’-sumesena’, i ka’ayo esa nga patelu wia nisia e minareiydem wo esa nga patelu witu e nendo oat e reiy’ terang wo tuanakan kangkasi e nendo wengi. ¹³ 13 Laa o ku lumoo’: niaku ku liminga siesa burung nasar si timewel waki uner e langit wo meila’ ampit en suara menaleinteng: “Cilaka, cilaka, cilaka mouw nisea se maena’ wia natas em bumi karengan e legu’an en sesebungen ne telu malaikat walina, se laape’ sumengo en sesebungen nea.”