Se tou-tou wina’ilela waki se bangsa Israel ¹ Kamurian witu e ni’itu niaku ku limoo’ se epat malaikat se rimedeiy witu e nepat ruuna em bumi wo nisea se timaang e nepat reghes em bumi, rio te’a wawean e reghes sumengomi waki ketana’an, ka’apa waki tasik ka’apa waki akana-akana. ² Wo niaku ku limoo’ siesa malaikat walina si minodoli waki tampa paretikan ni endo. Nisia si maali-ali e wa’il ni Empung matou-tou; wo nisia si maaleiy ampit en suara menaleinteng wia se epat malaikat se linukarala kaa laa meteterila em bumi wo en tasik, ³ pokeiyna: “Te’a mouw meteterila em bumi ka’apa en tasik ka’apa e nakana-nakana nu reiy’pe’ keiy nu meela wa’il wia se hamba-hamba ni Empung meiy witu en tuintung nea!” ⁴ Wo niaku ku liminga eng kelakerna se wina’ilala i ti’i: se esa nga atus epat nga pulu’ o epat nga riwu se wina’ilanola waki em baya ne suku see’ ni Israel. ⁵ Waki se suku Yehuda se mapulu’ o rua nga riwu se wina’ilala, waki se suku ni Ruben se mapulu’ o rua nga riwu, waki se suku ni Gad se mapulu’ o rua nga riwu, ⁶ waki se suku ni Asyer se mapulu o rua nga riwu, waki se suku ni Naftali se mapulu o rua nga riwu, waki se suku ni Manasye se mapulu’ o rua nga riwu, ⁷ waki se suku ni Simeon se mapulu’ o rua nga riwu, waki se suku ni Lewi se mapulu’ o rua nga riwu, waki se suku ni Isakhar se mapulu’ o rua nga riwu, ⁸ waki se suku ni Zebulon se mapulu’ o rua nga riwu, waki se suku ni Yusuf se mapulu’ o rua nga riwu, waki se suku ni Benyamin se mapulu’ o rua nga riwu. ⁹ Kamurian witu e ni’itu niaku ku limoo’: eng kaulitna, e nesa pinaeruran wangko’ ne tou ka’asa’an se reiy’ karekenan eng kelakerna, waki se reiy’ sa mina’asa bangsa wo se suku wo se kaum wo em baasa, se rimedeiy witu en sinaru en takhta wo witu en sinaru ni Oki’ ni Domba, se minake eng karaiy puti’ wo se timiboiy e laleiyna-laleiyna em palem witu e lawas nea. ¹⁰ Wo ampit en suara menaleinteng sea maaleiy: “Eng kelawiran i wee si Empung meiy si rimuber witu natas en takhta wo i wee si Oki’ ni Domba!” ¹¹ Wo em baya ne malaikat se rimedeiy limedongla en takhta wo se tu’a-tu’a wo se epat makhluk i ti’i; nisea se neiy i kasungkur witu en sinaru en takhta i ti’i wo sumempe si Empung, ¹² se kasuatan meila’: “Amin! Em puji-pujian wo eng kalo’oran, wo eng hikmat wo en syukur, wo e normat wo eng kakuasa’an wo eng kaketeran i wee si Empung ta i ka’ayo eng keure-urena! Amin!” ¹³ Wo siesa witu e nelet ne tu’a-tu’a i ti’i si limila’ wia niaku: “Seiy ku’a re’en nisea se minake eng karaiy puti’ i ti’i wo waki wisa ku’a re’en nisea o meiy?” ¹⁴ Takar pokeiyku wia nisia: “Tuangku, tuang si mete’ula nyi’a.” Laa o sia lumila’ wia niaku: “Nisea i yi’i nyi’a mouw se tou-tou rimeu’mi witu eng kasusa’an wangko; wo nisea se kimemesola eng karaiy nea wo simiwola nyi’a mina puti’ witu e raa’ ni Oki’ ni Domba. ¹⁵ Kaa ni’itu nisea se rimedeiy witu en sinaru en takhta ni Empung wo melayanla Nisia oat o wengi witu em Bait Suci-Na. Wo Nisia si rimuber witu natas en takhta i ti’i si laa mitarla en dasing-Na witu natas nea. ¹⁶ Nisea se reiy’ mouw laa peme’itan e narem wo e re’o kasi, wo ni endo ka’apa e ra’ar te’etel e reiy’ mouw laa tumoro nisea kasi. ¹⁷ Karengan si Oki’ ni Domba si witu eng keuneran en takhta i ti’i, si laa rumawirla nisea wo si laa tumeperla nisea mea waki kembu’an e rano em patou-touan. Wo si Empung si laa rume’ila e reiy’ sa mina’asa lue’ waki weren nea.”