Pasal 6
E nenem wa’il ketarean winuka’
1
Takar niaku ku limoo’ si Oki’ ni Domba i ti’i nu minuka’ eng ketarean witu em pitu wa’il i ti’i, wo niaku ku liminga si ketarean witu se epat makhluk i ti’i si limila’ tanu mokan e legu’an e lenter: “Meiy!”
2
Wo niaku ku limoo’: eng kaulitna, wawean siesa kawalo puti’ wo sitou mesake-sake nisia si timiboiy e nesa panah wo wia nisia si kinarunia’ala e nesa mahkota. Laa o sia maju tanume si minuntung kaa laa mekekaat eng kamenangan.
3
Wo eng katoroan si Oki’ ni Domba i ti’i nu minuka’ e wa’il eng karua, niaku ku liminga si makhluk eng karua si limila: “Meiy!”
4
Wo maju mouw siesa kawalo walina, siesa kawalo mea’ rengis wo sitou mesake-sake nisia si kinarunia’ala eng kuasa kaa laa ma’edo en dame sejahtera waki atas em bumi, i ka’ayo sea mewewunu’an, wo wia nisia si kinarunia’ala e nesa santi wangko’.
5
Wo eng katoroan si Oki’ ni Domba i ti’i nu minuka’ e wa’il eng katelu, niaku ku liminga si makhluk eng katelu si limila: “Meiy” Wo niaku ku limoo’: eng kaulitna, wawean siesa kawalo item wo sitou mesake-sake nisia si timiboiy e nesa timbangan witu lawasna.
6
Wo niaku ku liminga tanu wawean en suara witu eng keuneran ne epat makhluk i ti’i e meila’: “Esa nga cupak gandum esa nga dinar, wo en telu cupak jelai esa nga dinar. Ta’an te’a mouw peteterin e lana wo e nanggor i ti’i.”
7
Wo eng katoroan si Oki’ ni Domba i ti’i nu minuka’ e wa’il eng kaepat, niaku ku liminga en suara ni makhluk eng kaepat si limila’: “Meiy!”
8
Wo niaku ku limoo’: eng kaulitna, wawean siesa kawalo lisouw kunir wo sitou mesake-sake nisia si mekengaran Maut wo eng keraja’an maut e maki’i-ki’it nisia. Wo wia nisea se wineeanla kuasa witu esa nga paepat em bumi kaa laa mewewunu’ ampit en santi, wo ampit eng kelalenan wo e rumara menganup, wo ampit se tekapen-tekapen lela’ wia em bumi.
9
Wo eng katoroan si Oki’ ni Domba i ti’i nu minuka’ e wa’il eng kalima, niaku ku limoo’ witu rarem e mezbah se imukur-imukur nea se winunu’ mola eng karengan e nuwu’ ni Empung wo eng karengan eng kasairian kapunya‘an nea.
10
Wo nisea se maaleiy ampit en suara menaleinteng, pokeiyna: “Pirape’ kasi eng keure ku’a re’en, ee Penguasa kudus wo ulit, Nikoo koo reiy’ ma’akimla wo reiy’ sumuli’la e raa’ meiy wia nisea se maena’ wia em bumi?”
11
Wo wia nisea siesa o siesa se wineeanla e nesa karaiy puti’, wo wia nisea neiy i lila’la, kaa nisea se lewo’ sa reiy’ masenge’la reiy’ ure kasi i ka’ayo malekepla eng kelakerna ne ka’ampit-ka’ampit pelayan wo se patuari-patuari nea, se laa wunu’un masuat tanu nisea.
12
Takar niaku ku limoo’, eng katoroan si Oki’ ni Domba i ti’i nu minuka’ e wa’il eng kaenem, eng kaulitna o mamuali mouw em pengero’ kasa ente’ wo si endo si mineitem tanu mokan en sompoiy wu’uk wo si sumedot si minamea’ e minapekasana tanu mokan e raa’.
13
Wo se sumesena’-sumesena’ waki langit se mangalelenta’mi wia natas em bumi tanu mokan e nakana ara mera’araghla e wu’ana-wu’ana mata’, sakawisa sia i pagho’ogho’ e reghes ente’.
14
Takar tu kumo’okosouw e langit tanu mokan e langkunan eng kaol linangkun wo i kase’ese’ mouw eng kuntung-kuntung wo em pulau-pulau waki tampana.
15
Wo se raja-raja wia em bumi wo se pemangko’ – pemangko’ ma’an se perwira-perwira, wo se tou-tou kaya ma’an se tou-tou makakuasa, wo em baya ne budak ma’an se tou merdeka se kimirong witu eng gorem eng goa-goa wo e woang-woang watu karang waki kuntung.
16
Wo nisea se limila’ wia se kuntung-kuntung wo wia se watu-watu karang i ti’i: “I karonga’ mouw tumoro nikeiy wo i kirongola keiy witu Nisia, si rimuber witu natas en takhta wo witu e nupi’ ni Oki’ ni Domba i ti’i.”
17
Karengan neiy mouw i ka’ayo e nendo wangko’ e nupi’ nea wo seiy mouw si toro tumaang?