Eng kaol wina’ilan wo si Oki ni Domba ¹ Takar niaku ku limoo’ witu e lawas lele’os-Na si rimuber witu natas en takhta i ti’i, esa nga langkunan kaol, pinatikan esa nga weka ghorem wo esa nga weka luarna wo e wina’ilan ampit em pitu wa’il. ² Wo niaku ku limoo’ siesa malaikat gagah, si maaleiy ampit en suara menaleinteng, pokeiyna: “Seiy ku’a re’en si waar muka’ e langkunan eng kaol i ti’i wo muka’ e wa’il-wa’ilna?” ³ Ta’an reiy’la siesa tou tu’u si waki sorga ka’apa wia em bumi ka’apa wia rarem em bumi si toro muka’ e langkunan eng kaol i ti’i ka’apa si toro lumoo’ esa nga weka ghoremna. ⁴ Takar mame’ mouw niaku ampit eng kasusahna, karengan reiy’la siesa tou tu’u si’i papokeiyla waar laa mewewuka’ e langkunan eng kaol i ti’i ka’apa tu’u lumoo’ esa nga weka ghoremna. ⁵ Laa o lumila’ mouw wia niaku siesa wia se tu’a-tu’a i ti’i: “Te’a maame’ koo! Eng kaulitna, si singa waki se suku Yehuda, nyi’a i ti’i si suru ni Daud, si minuntungouw, i ka’ayo Sia toro mouw minuka’ e langkunan eng kaol i ti’i wo minuka’ em pitu wa’ilna.” ⁶ Takar niaku ku limoo’ witu eng keuneran en takhta wo se epat makhluk i ti’i wo witu eng keuneran ne tu’a-tu’a i ti’i rimedeiy siesa nga ipus Oki’ ni Domba tanu si rineretanouw, si maka sunge pitu wo si maka weren pitu: ni’itu mouw em pitu Roh ni Empung neiy i toke wia e minapekasa em bumi. ⁷ Laa o meiy mouw si Oki’ ni Domba i ti’i wo sumungkul e langkunan eng kaol i ti’i witu e lawas-Na si rimuber witu natas en takhta i ti’i. ⁸ 8 Katoroan Nisia nu minedo e langkunan eng kaol i ti’i, i kasungkurouw se epat makhluk wo se rua nga pulu’ o epat tu’a-tu’a i ti’i witu en sinaru ni Oki’ ni Domba i ti’i, siesa o siesa timiboiy e nesa kecapi wo e nesa cawan mas, wuta ampit eng kamania: ni’itu mouw en sesombayangen ne tou-tou kudus. ⁹ Wo sea kumantarla e nesa kekantaren weru pokeiy nea: “Nikoo koo waar maka’ato e langkunan eng kaol i ti’i wo muka’ e wa’il-wa’ilna; karengan Nikoo koo rineretanola wo ampit e raa’-Mu Nikoo koo timelesola nikeiy i wee si Empung waki susur ne suku wo em baasa, wo se kaum wo se bangsa. ¹⁰ Wo Nikoo koo simiwo mola nisea minamuali esa keraja’an, wo minamuali imam-imam i wee si Empung ta, wo nisea se laa merenta teume si raja wia em bumi.” ¹¹ Takar niaku ku limoo’ wo liminga en suara ne kelaker malaikat kaledong en takhta, se makhluk-makhluk wo se tu’a-tu’a i ti’i; eng kelaker nea se ka’asa’an kasa wo se manga riwu-riwu laksa, ¹² pokeiy nea ampit en suara menaleinteng: “Si Oki’ ni Domba rineretan i ti’i si waar laa maka’ato eng kuasa, wo eng kakaya’an, wo eng hikmat, wo eng kaketeran, wo e normat, wo eng kalo’oran wo em puji-pujian.” ¹³ Wo niaku ku liminga em baya ne makhluk waki sorga wo se wia em bumi wo se wia rarem em bumi wo se wia en tasik wo em baya ne witu eng goremna, se limila’: “I wee Nisia si rimuber witu natas en takhta wo i wee si Oki’ ni Domba, nyi’a mouw em puji-pujian wo e normat wo eng kalo’oran wo eng kuasa i ka’ayo eng keure-urena!” ¹⁴ Wo se epat makhluk i ti’i se limila’: “Amin”. Wo se tu’a-tu’a i ti’i se neiy i ka’anu i kasungkur wo sumempe.