Wia se jema’at waki Sardis ¹ “Wo i patikola wia si malaikat ne jema’at waki Sardis: Nyi’i mouw e nuwu’-Na, si makapuya em pitu Roh ni Empung wo se pitu sumesena’ i ti’i: Niaku ku mete’u e reiy’ sa mina’asa pepa’ayangennu: nikoo koo neiy i lila’la matou-tou, e nulitna nikoo koo minate! ² Tumo’orouw, wo ente’enola sapa en timele’upe’ en tawi mouw mate, karengan reiy’ siesa tu’u witu em pepa’ayangennu si niato-Kula lekep witu en sinaru ni Empung-Ku. ³ Kaa ni’itu ghenangenouw, kumura koo simungkulola wo liminga nyi’a; ki’itanola i tu wo makedo’ mouw! Karengan sa wona’ koo reiy’ mategha-tegham, Niaku ku laa meiy tanu si rongkit wo nikoo koo reiy’ mete’u witu e nedo kawisa ku’a re’en Niaku i kasenge’mi ku mineiy mouw wia nikoo. ⁴ Ta’an waki Sardis wawean se pirala tou se reiy’ makewurla e labungna; nisea se laa kumelang ampit Niaku witu e labung puti’, karengan nisea nyi’a mouw se waar witu e ni’itu. ⁵ Seiy i te si muntung, nisia si laa pakean e labung puti’ tuana; Niaku ku reiy’ laa rume’ila e ngaranna witu eng kaol patou-touan, ta’an i te Niaku ku laa maaku e ngaranna witu en sinaru ni Ama’-Ku wo witu en sinaru ne malaikat-Na. ⁶ Seiy si maka talinga, satorona nisia si lumingala sapa neiy i lila’la e Roh wia se jema’at-jema’at.” ⁷ “Wo i patikola wia si malaikat ne jema’at waki Filadelfia: Nyi’i mouw e nuwu’ waki Si Kudus, Si Ulit, si kimulu eng kekusi’ ni Daud; sakawisa Sia muka’, reiy’la si mete’u kumusi’; sakawisa Sia kumusi’ reiy’la si mete’u muka’. ⁸ Niaku ku mete’u e reiy’ sa mina’asa pepa’ayangennu: loo’onouw, Niaku ku minuka’ mola em pepalen wia nikoo, e reiy’ mete’u kusi’in ni seiy i te tu’u. Niaku ku mete’u kaa eng kaketerannu e reiy’ takura, ta’an nikoo koo maki’itla e nuwu’-Ku wo nikoo koo reiy’ makelong e ngaran-Ku. ⁹ Loo’onouw, se pirala tou waki se jama’ah ni Iblis, nyi’a i ti’i nisea se matotor en touna tou Yahudi, ta’an e nulitna e reiy’ tuana, ta’an i te se matowo, se laa Ku i sarakan wia nikoo. Eng kaulitna Niaku ku laa rumeo nisea meiy wo i kasungkur witu en saruan e ne’amu wo maaku, kaa Niaku ku meupusla nikoo. ¹⁰ Karengan nikoo koo maki’itla e nuwu’-Ku, kaa laa tumentem ma’ena’la Niaku, takar Niaku tu’u ku laa kumedirla nikoo witu e nendo pewa’awa’an e laa meiy wia e minapekasa eng kaoatan kaa laa mewewa’awa’la nisea se maena’ wia em bumi. ¹¹ Niaku ku makarengan meiy. Kulunouw sapa em bia nikoo, rio reiy’ siesa tou tu’u si medo e mahkotamu. ¹² Seiy i te si muntung, nisia si laa Ku siwon tobol uner witu em Bait Suci ni Empung-Ku, wo nisia si reiy’ mouw kasi laa rumou’mi witu; wo wia nisia e laa Ku i patikla e ngaran ni Empung-Ku, e ngaran eng kota ni Empung-Ku, nyi’a i ti’i e Yerusalem weru, en timumpami waki sorga waki si Empung-Ku, wo e ngaran-Ku weru. ¹³ Seiy si maka talinga, satorona nisia si lumingala sapa neiy i lila’la e Roh wia se jema’at-jema’at.” ¹⁴ “Wo i patikola wia si malaikat ne jema’at waki Laodikia: Nyi’i mouw e nuwu’ waki si Amin, si sairi lale’ wo ulit, si kasa ketareani waki en siniwo ni Empung: ¹⁵ Niaku ku mete’u e reiy’ sa mina’asa pepa’ayangennu: nikoo koo reiy’ ghe’egher wo reiy’ pasu’. Wo’o wona’ re’en eng kale’osna sa koo ghe’egher ka’apa pasu’! ¹⁶ Jadi karengan koo nanar, wo koo reiy’ ghe’egher ka’apa pasu’, Niaku ku laa kumero’la nikoo waki suma-Ku. ¹⁷ Karengan nikoo koo limila’: Niaku ku kaya wo niaku ku minepekaya mola en touku wo niaku ku reiy’la kakurangan sapa-sapa, wo karengan nikoo koo reiy’ mete’u, kaa nikoo koo neiy i kawe’ewe’, wo reiy’ kinamang, miskin, rapa wo poteiy, ¹⁸ takar Niaku ku ngume’enge’la nikoo, rio koo tumelesla wia-Niaku e mas minurni mola witu napi, , takar koo mekaya, wo kangkasi e labung puti’, rio koo make nyi’a, rio te’a kaloo’an eng kapoteiyannu mekeirangen; wo kasi e lana kaa laa melelana em berennu, rio koo toro lumoo’. ¹⁹ Seiy i te si’i koupus-Kula, nisia si togoreng-Ku wo si turu’ung-Ku; kaa ni’itu i pakawee-wee mola e natemu wo makedo’ mouw! ²⁰ Loo’on, Niaku ku rimedeiy witu en sinaru em pepalen wo matengkor; sa wawean sitou malinga en suara-Ku wo muka’la em pepalen, Niaku ku laa ghumorem matola nisia wo Niaku ku kumaan mewali-wali ampit nisia, wo nisia si mewali-wali ampit Niaku. ²¹ Seiy i te si muntung, nisia si laa Ku i ruberla mewali-wali ampit Niaku witu natas en takhta-Ku, tanu eng kumura Niaku tu’u nu minuntungola wo rumuber mewali-wali ampit si Ama’-Ku waki atas en takhta-Na. ²² Seiy si makatalinga, satorona nisia si lumingala sapa neiy i lila’la e Roh wia se jema’at-jema’at,”