¹ “I patikola wia si malaikat ne jema’at waki Efesus:Nyi’i mouw e nuwu’ waki Nisia, si timiboiy se pitu sumesena’ i ti’i witu e lawas lele’os-Na wo makelang witu e nelet em pitu ne’ana en solo e mas i ti’i. ² Niaku ku mete’u e reiy’ sa mina’asa pepa’ayangennu: le’os em bedumu ka’apa tu’u eng katentemannu, Niaku ku mete’u, kaa nikoo koo reiy’ mete’u sumabaar witu se tou-tou lewo’, kaa nikoo koo mina’awa’ mola nisea se matotor en tou nea rasul, ta’an eng kaulitna se reiy’ tuana, kaa nikoo koo minato mola nisea se tumetowo. ³ Wo nikoo koo minena-ena’ sabaar wo peme’itan eng karengan e ngaran-Ku; wo nikoo koo reiy’ makasine’u em bedu. ⁴ Ma’anouw tu tuana Niaku ku mapero nikoo, karengan koo timele’u mola e nupusmu eng ketarena. ⁵ Kaa ni’itu ghenangenouw kumura eng keraremna koo nu neiy mouw i kawolon! Makedo’ mola wo tuananola kasi sapa eng ketarena tinuanamula. Sa reiy’ tuana, Niaku ku laa meiy wia nikoo wo Niaku ku laa medo ne’ana en solomu waki tampana, sa wona’ koo reiy’ makedo’. ⁶ Ta’an nyi’i em bia nikoo, i ti’i nikoo koo mari’iris e reiy’ sa mina’asa pasiwo-siwon ne maki’i-ki’it si Nikolaus, o kangkasi si neiy-Ku i kari’iris. ⁷ Seiy si maka talinga, satorona nisia si lumingala sapa neiy i lila’la e Roh wia se jema’at-jema’at: Seiy i te si muntung, nisia si laa Ku weean kumaan witu e nakana em patou-touan waki Taman Firdaus ni Empung.” ⁸ “Wo i patikola wia si malaikat ne jema’at waki Smirna: Nyi’i mouw e nuwu’ waki Si Ketarean wo Si Kesampetan, si minate mouw wo tumou sumeup: ⁹ Niaku ku mete’u eng kasusa’annu wo eng kamiskinannu – ta’an nikoo koo kaya – wo em fitnah nea, se matotor en touna tou Yahudi, ta’an eng kaulitna e reiy’ tuana: eng kapurikitna nisea nyi’a mouw se jama’ah ni Iblis. ¹⁰ Te’a meide’ witu en sapa e lewo’ sa reiy’ peme’itannu! Eng kaulitna si Iblis si laa lumawala se pirala tou witu e neletmu witu em penjara rio kouw wa’awa’an wo nikouw kouw laa maka’ato kasusa’an eng keurean mapulu’ nga endo. Satorona koo lale’ i ka’ayo mate, wo Niaku ku laa kumaruniala wia nikoo e mahkota em patou-touan. ¹¹ Seiy si maka talinga, satorona nisia si lumingala sapa neiy i lila’la e Roh wia se jema’t-jema’at: Seiy i te si muntung, nisia si reiy’ laa peme’itan sapa-sapa kaa em patean karua.” ¹² “Wo i patikola wia si malaikat ne jema’at waki Pergamus: Nyi’i mouw e nuwu’-Na, si minake en santi kateleuw wo e makaweren rua: ¹³ Niaku ku mete’u wisa niena’annu, nyi’a i ti’i waki ti’ime, waki tampa en takhta ni Iblis; wo nikoo koo timiboiy witu e ngaran-Ku, wo nikoo koo reiy’ makelong e imanmu wia Niaku, o kangkasi reiy’ witu en zaman ni Antipas, sairi-Ku, si lale’ wia Niaku, si winunu’ witu en sinaru miouw, witu e wisa niena’an ni Iblis. ¹⁴ Ta’an Niaku ku makapunya em pirala kaberatan wia nikoo: witu e neletmu wawean pirala se maki’itla en teturu’ ni Beliem, si minee nge’enge’ wia si Balak kaa laa meseseipla se tou Israel, rio sea kumaan en sesempe berhala wo sumiwo en zinah. ¹⁵ Tuanakan kangkasi e wawean wia nikoo se tou-tou timiboiy witu en teturu’ ne maki’i-ki’it si Nikolaus. ¹⁶ Kaa ni’itu makedo’ mouw! Sa reiy’ tuana, Niaku ku laa makarengan meiy wia nikoo wo Niaku ku sumeke’la nisea ampit en santi wia en suma-Ku i yi’i. ¹⁷ Seiy si maka talinga, satorona nisia si lumingala sapa neiy i lila’la e Roh wia se jema’at-jema’at: Seiy i te si muntung, wia nisia si laa Ku weeanla witu e manna neiy i kakirong; wo Niaku ku laa kumaruniala wia nisia e watu puti’, witu e natasna em pinatikan ngaran weru, reiy’ kete’uala ni seiy i te tu’u, ta’an i te si simungkul nyi’a.” ¹⁸ “Wo i patikola wia si malaikat ne jema’at waki Tiatira: Nyi’i mouw e nuwu’ ni Oki’ ni Empung, em beren-Na en tanu mokan layasna e napi wo e ne’a-Na en tanu mokan en tambaga: ¹⁹ Niaku ku mete’u e reiy’ sa mina’asa em pepa’ayangennu: le’os e nupusmu ka’apa tu’u e imanmu, le’os em pelayanannu ka’apa tu’u eng katentemannu. Niaku ku mete’u, kaa em pepa’ayengennu kamurian e lumantouwla eng kelaker ta’an eng kasa ketare. ²⁰ Ta’an Niaku ku mapero nikoo, karengan nikoo koo minayala si wewene Izebel, si matotor en touna nabiah, si mawee teturu’ wo maseipla se hamba-hamba-Ku rio sumiwo en zinah wo kumaan en sesempe-sesempe berhala. ²¹ Wo niaku ku minee mola nisia e nedo laa makedo’, ta’an nisia si so’o makedo’la witu en zinahna. ²² Loo’onouw, Niaku ku laa lumawala nisia witu natas en tetekelan ne tou rara’an wo nisea se masiwo en zinah ampit nisia se laa Ku i lawala witu eng kapedisan wangko’, sa sea reiy’ makedo’ witu em pasiwo-siwon – pasiwo-siwon ni wewene i ti’i. ²³ Wo se oki-oki’na se laa Ku paten wo em baya ne jema’at se laa mete’ula, kaa Niaku mouw si meuji em batin wo e nate ni tou, wo kaa Niaku ku laa sumuli’la wia nikouw susur tou i ki’it em pasiwo-siwonna. ²⁴ Ta’an wia nikouw, nyi’a i ti’i se tou-tou walina waki Tiatira, se reiy’ maki’itla en teturu’ i ti’i wo se reiy’ masoisapla sapa em patotoren nea minake’itan o si Iblis, wia nikouw Niaku ku lumila’la: Niaku ku so’o mepepesa’anla em pemesa’anen walina wia nikoo. ²⁵ Ta’an sapa em bia nikoo, tiboiyanouw ni’itu i ka’ayo Ku meiy. ²⁶ Wo seiy i te si muntung wo matuanala em pepa’ayangeng-Ku i ka’ayo eng kesampetanna, wia nisia si laa Ku karunia’ala eng kuasa wia se bangsa-bangsa; ²⁷ wo nisia si laa merenta nisea ampit en diki-diki wesi; nisea se laa rimu’umuken tanu en sempe ne meneniwo kure’ – masuat tanu en sinungkul-Ku waki si Ama’-Ku – ²⁸ wo wia nisia e laa Ku i karuniala si sumesena’ en sendangan. ²⁹ Seiy si maka talinga, satorona nisia si lumingala sapa neiy i lila’la e Roh wia se jema’at-jema’at.”