¹ Nyi’i mouw e wahyu ni Yesus Kristus, neiy i karuniala ni Empung wia-Nisia, rio i turu’-Nala wia se hamba-hamba-Na sapa e lewo’ sa reiy’ makarengan laa mamuali. Wo kaa ne malaikat-Na se neiy i toke-Na, Nisia si minapaloo’o-loo’o mola nyi’a wia si hamba-Na Yohanes. ² Yohanes si simairi mola tanume e nuwu’ ni Empung wo tanume eng kasairian neiy i weela ni Yesus Kristus, nyi’a i ti’i e reiy’ sa mina’asa wo’o sapa e linoo’ona mola. ³ Ma’aruiyola nisia si minacala wo nisea se limingala e lelila’an-lelila’an e wenti’ i yi’i, wo si kimi’itla sapa neiy i kepatik witu nyi’a, karengan e nedona en tawi mouw. ⁴ Waki si Yohanes i wee se pitu jema’at waki Asia Oki’: E nupus karunia wo en dame sejahtera e rumapitla nikouw, waki Nisia, si wia wo si wia mouw wo si laa meiy, wo waki se pitu roh witu en sinaru en takhta-Na, ⁵ wo waki si Yesus Kristus, si Sairi lale’, si kasa ketare timo’ori waki elet ne tou minate wo si maka kuasa wia se raja-raja em bumi i yi’i. I wee Nisia, si meupusla nikita wo si rimeta’ mola nikita witu en dosa ta kaa e raa’-Na – ⁶ wo si simiwo mola nikita minamuali esa keraja’an, kita minamuali imam-imam i wee si Empung, Ama’-Na, – i wee Nisia mouw eng kamulia’an wo eng kuasa i ka’ayo eng keure-urena. Amin. ⁷ Loo’onouw, Nisia si meiy ampit e linak-linak wo susur em beren e laa lumoo’ Nisia, o kangkasi nisea se kimuekola Nisia. Wo em baya ne bangsa wia em bumi se laa ma’aripla Nisia. Iyon, amin. ⁸ “Niaku nyi’a mouw si Alfa wo Omega, si nuwu’ ni Empung Tuhan, si wia wo si wia mouw wo si laa meiy, Si Kasakuasa.” ⁹ Niaku, si Yohanes, patuari wo si kaesamu witu eng kasusa’an, witu eng Keraja’an wo witu eng katenteman mengena-ngena’la si Yesus, si waki pulau mekengaran Patmos eng karengan e nuwu’ ni Empung wo eng kasairian neiy i weela ni Yesus. ¹⁰ Witu e nendo ni Tuhan niaku ku kinuasa’ala ni Roh wo niaku ku liminga waki muriku e nesa suara menaleinteng, tanu e legu’an en sesebungen, ¹¹ pokeiyna: “Sapa e linoo’mu, i patikola witu e nesa kaol wo papa’ali mouw wia se pitu jema’at i yi’i: waki Efesus, waki Smirna, waki Pergamus, waki Tiatira, waki Sardis, waki Filadelfia wo waki Laodikia.” ¹² Laa o kulumenge kaa meleloo’ en suara masusuiy wia niaku. Wo niaku nu limenge mola, kaloo’anola wia niaku em pitu ne’ana en solo e mas o siwon. ¹³ Wo witu eng keuneran e ne’ana en solo i ti’i wawean siesa tou mange’an si Oki’ ni Tou, limabung eng karaiy eng kelabotna mina’ayo waki ne’a, wo em be’ewerna rinikeran e ne’ereten mas. ¹⁴ Eng kokong wo em bu’uk-Na em puti’ tanu mokan e wu’uk puti’ kulo’, wo em beren-Na en tanu mokan e layasna napi. ¹⁵ Wo e ne’a-Na maserengat tanu mokan en tambaga minewaa witu em paapian; suara-Na en tanu mokan nerutan e rano ampuan. ¹⁶ Wo witu e lawas lele’os-Na Nisia si timiboiy se pitu sumesena’ wo waki suma-Na rimou’mi e nesa santi teleuw makaweren rua, wo eng gio-Na masena’ tanu mokan si endo te’etel. ¹⁷ Katoroan niaku nu limoo’ Nisia, i kasungkurouw niaku witu en saruan e ne’a-Na masuat tanu sitou minate; ta’an Nisia si rimeta’la e lawas lele’os-Na witu natasku, laa o lumila’: “Te’a meide’! Niaku nyi’a mouw Si Ketarean wo Si Kesampetan, ¹⁸ wo Si Matou-tou. Niaku ku minate mouw, ta’an loo’onouw, Niaku ku matou-tou, i ka’ayo eng keure-urena wo Niaku ku timiboiy e reiy’ sa mina’asa kekusi’ maut wo eng keraja’an maut. ¹⁹ Kaa ni’itu i patikola sapa e linoo’mu mouw, le’os e minamuali en teakan ka’apa tu’u e laa mamuali nu reiy’ mouw nyi’i. ²⁰ Wo em pengiro-ngirong ne pitu sumesena’ linoo’mu mola witu e lawas lele’os-Ku wo em pitu ne’ana en solo mas i ti’i: se pitu sumesena’ i ti’i nyi’a mouw se malaikat wo em pitu ne’ana en solo i ti’i nyi’a mouw se pitu jema’at.”