Pasal 9
Paeruran loit i wee e Yerusalem
1
1 En tanume em pasempungan wia se tou-tou kudus e reiy’ mouw pemandungen kasi niaku mepepatikla nyi’a wia nikouw.
2
2 Niaku ku minete’u mola eng kepa’aran em pa’ar e natemu en tanume e wisa niaku mesawa’la nikouw wia se tou-tou Makedonia. Em pokeiyku: “Akhaya si timiro-tiro’ mouw rengane’ en te’un e limangkoiyla.” Wo eng kalingkama’annu e minamuali mouw na’aruiy wia se laker tou.
3
Niaku ku timoke se patuari-patuari i ti’i, rio eng kesawa’an neiy witu eng kapualitan i yi’i witu nikouw te’a pinakaloo’o-loo’ola e mamuali reiy’ sipenoron, ta’an rio kouw uli-ulit timiro-tiro’ tanu neiyku mouw i lila’la,
4
rio, sakawisa se tou-tou Makedonia nu meiy mewali-wali ampit niaku, te’a sea matola nikouw kouw reiy’pe’ timiro-tiro’, i ka’ayo nikeiy – kaa laa reiy’ lumila’la nikouw – mapedam meirang witu eng ka’emanan neiy i ti’i.
5
Karengan e ni’itu niaku ku mapedam mepadung melelupula se patuari-patuari i ti’i kaa laa mae rumeriorla niaku, rio sea kumetarela murus en tetaber neiy miouw mouw i ta’arla nu reiy’pe’ nyi’a, rio ee sangali e wawean tanume en turu’ eng kamura’an e nate miouw wo e reiy’ tanume en tetaber neiy i pupusla.
Mawee ampit e mepa’a-pa’ar e maali berkat
6
Ghenangenola e nyi’i: Sitou si kimeror toyo’, si laa mupu’ en toyo’ kangkasi, wo sitou si kimeror laker, si laa mupu’ e laker kangkasi.
7
Satorona siesa o siesa maweela i ki’it eng kepa’aran em pa’ar e natena, te’a ampit en tekur ate ka’apa eng karengan en se’esekan, karengan si Empung si moupusla sitou mineela ampit e mepa’a-pa’ar.
8
Wo si Empung si makawoo me’erala e reiy’ sa minas’asa e nupus karunia wia nikouw, rio kouw reiy’ maena-ena’ makaka’awesan witu e reiy’ sa mina’asa wo’o sapa wo awes tare e makakalebean witu e reiy’ sa mina’asa e minegheghioan kale’osan.
9
Tanu wawean neiy i kepatik: “Nisia si memete-metengla, Nisia si mineela wia se tou lengeiy, eng kaulitan-Na e minena-ena’ i wee eng keurena.”
10
Nisia si timiro’la en tanemen i wee se mengengeror, wo e roti kaa laa kaanen, Nisia kangkasi si laa tumiro’la en tanemen i wee nikouw wo e manginlelepetla nyi’a wo mapatoumi e wu’ana-wu’ana eng kaulitannu;
11
nikouw kouw laa kayan witu e reiy’ sa mina’asa minegheghioan eng kamura’an e nate, minapato’orla syukur wia si Empung eng karengan nikeiy.
12
Karengan em pasempungan e nupus e makapumpun en tetaber i yi’i e reiy’ i te ma’awesla em pemandungen-pemandungen ne tou-tou kudus, ta’an kangkasi e mapa lokonla en totor syukur wia si Empung.
13
Wo eng karengan nikouw kouw taangouw neiy i wa’awa’ witu em pasempungan i ti’i, nisea se mewangko’la si Empung karengan eng kelale’an niouw witu em paakuala e Injil ni Kristus wo karengan eng kamura’an e natemu witu e mawetengla e reiy’ sa mina’asa wo’o sapa ampit nisea wo ampit em baya ne tou,
14
kasuatan witu en sombayang nea, nisea kangkasi se malelola nikouw eng karengan e nupus karunia ni Empung e limokon witu natas miouw.
15
Syukur wia si Empung karengan eng karunia-Na e reiy’ katotoran i ti’i!