¹ Patuari waya, nikeiy keiy laa mapakite’ula wia nikouw en tanume e nupus karunia neiy i anugerahla wia se jema’at-jema’at waki Makedonia. ² Eng kasuatan i pewa’awa’la ampit e wuter witu e reiy’ sa mina’asa em peme’itan, e mepa’a-pa’ar nea e limuwa’ wo ma’anouw tu’u sea kasa lengeiy, ta’anouw nisea se kaya witu eng kamura’an. ³ Niaku ku mesairi, kaa nisea se minee mola i ki’it eng kaawoan nea, awes tare e limantouwla eng kaawoan nea. ⁴ Ampit eng kapa’aran em pa’ar nuesa nisea se makiwee wo mase’esek wia nikeiy, rio nisea kangkasi se maka’ato e nupus karunia kaa laa ma’edo weteng witu em pasempungan wia se tou-tou kudus. ⁵ Nisea se mineela e lebe laker ta’an em paarapen neiyla. Nisea se mineela en tou nea, ketare-tare wia si Empung, eng kamurian karengan eng kepa’aran ni Empung kangkasi wia nikeiy. ⁶ Karengan e ni’itu nikeiy keiy mase’esek wia si Titus, rio sia lumalesla nikouw wo sumampetla em pasempungan e nupus i ti’i tanu eng kumura nisia nu minuleiy mola nyi’a. ⁷ Takar en teakan, masuat en tanu nikouw nu kaya witu e reiy’ sa mina’asa wo’o sapa, – witu e neman, witu e lelila’an, witu en tine’u, witu eng kauli-ulitan kaa laa mesesawang, wo witu e nupusmu wia nikeiy – en tuana mouw kangkasi satorona nikouw kouw kaya witu em pasempungan e nupus i yi’i. ⁸ Niaku ku limila’la eng kapualitan i ti’i e reiy’ tanume si mapere-perenta, ta’an i te, ampit timudu’la em pe’inakuten ne tou-tou walina kaa laa mesesawang, niaku ku mewewa’awa’ eng kepa’aran em pa’ar e nate miouw. ⁹ Karengan nikouw kouw simine’u mola e nupus karunia ni Tuhan ta Yesus Kristus, Kaa Nisia, eng karengan nikouw o minamuali lengeiy, ma’anouw tu’u Sia kaya, rio kouw mamuali kaya karengan eng kalengeiyan-Na. ¹⁰ Nyi’i mouw eng genangku en tanume eng kapualitan i ti’i, e wo’o wona’na maka ka’ara’an i wee nikoo. Memang rengane’ en te’un limangkoiyla kouw muleiy tumuanala nyi’a wo medo katenggolan kaa laa mesesampetla nyi’a kangkasi. ¹¹ Takar en teakan, i sampetola kangkasi em petetuana’anla nyi’a i ti’i! Satorona em petuana’anla nyi’a e minatoroan ampit eng kepa’aran em pa’armu, wo tuananola ni’itu ampit en sapa em bia nikoo. ¹² Karengan sa kouw kaa eng kepa’aran em pa’ar kaa laa mewewee, takar neiy i weemu e laa sungkulen, sa em beweemu i ti’i en timo’otolela witu en sapa em bia nikoo, e reiy’ timo’otolela en sapa e reiy’la wia nikoo. ¹³ Karengan nikouw kouw winuterala e reiy’ mouw rio se tou-tou walina se maka’ato kawure’an, ta’an rio wawean kemasuatan. ¹⁴ Takar satorona en teakan i yi’i eng kalebean niouw e mawesla eng kareiy’awesan nea, rio eng kalebean nea kamurian e mawesla eng kareiy’awesan niouw, rio wawean eng kemasuatan. ¹⁵ Tanu wawean neiy i kepatik: “Sitou si minerurla laker, si reiy’ kinalebean wo sitou minerurla en toyo’, si reiy’ kinareiy’awesan.”

Titus neiy i toke

¹⁶ Syukur wia si Empung, eng karengan nikouw kouw kimaruniala eng kauli-ulitan en tuanakan kangkasi witu e nate ni Titus kaa laa mesesawang nikouw. ¹⁷ Memang nisia si simungkul e nge’enge’ meiy, ta’an witu eng kauli-ulitanna kasela i ti’i nisia ampit eng kepa’aran em pa’ar si minea wia nikouw. ¹⁸ Mewali-wali ampit nisia nikeiy keiy timoke si patuari ta, si kasa palo’oren wia em baya en jema’at karengan em pepa’ayangenna witu em paabaran e Injil. ¹⁹ Wo e reiy’ ni’itu i te! Nisia kangkasi si tinudu’ mola ne jema’at-jema’at kaa laa mekeka’ampitla nikeiy witu em pasempungan e nupus i yi’i, en tinuana meiyla i wee eng kewangko’an ni Tuhan wo en tanume en turu’ eng kapa’aran em pa’ar meiy. ²⁰ Karengan nikeiy keiy laa meleliseiy’la eng kapualitan i yi’i: kaa wawean tou si toro meleiy nikeiy witu eng kapualitan pasempungan e nupus en tinuana meiyla wo em bua’na eng kasela i yi’i. ²¹ Karengan nikeiy keiy maghenangla e le’os, e reiy’ i te witu en sinaru ni Tuhan, ta’an kangkasi witu en sinaru ne tou. ²² Mewali-wali ampit nisea nikeiy keiy timoke siesa tou walina kasi, nyi’a i yi’i si patuari ta, si wo’o minakapira mola i wa’awa’ meiy wo pakaloo’o-loo’ola si reiy’ maena-ena’ me’inakut laa mesesawang. Wo en teakan nisia si kasa me’inakut karengan eng kaselana eng ka’emananna wia nikouw. ²³ Titus nyi’a mouw si ka’ampitku si mepa’ayang mewali-wali ampit niaku i wee nikouw; se patuari-patuari meiy walina i ti’i nyi’a mouw se tetoke ne jema’at-jema’at wo e nesa kewangko’an i wee si Kristus. ²⁴ Karengan e ni’itu i tudu’ mola wia nisea witu en sinaru ne jema’at-jema’at en turu’ e nupusmu wo en turu’ eng kesawa’angku witu nikouw.