Pasal 7
1
Patuariku waya i koupus, karengan nikita en teakan ta makapunyala en ta’ar-ta’ar i ti’i, meiy mouw ta lumenasi en tou ta waki em baya eng kakewuran jasmani wo e rohani, wo ampit en tuana e mapareiy’siperoanla eng kakudusan ta witu e meide’la si Empung.
Mepa’a-pa’ar nu reiy mouw e mengasi’
2
Weeanouw tampa i wee nikeiy witu eng gorem e nate miouw! Nikeiy keiy reiy’ ma’an mekasa sumiwo en selok wia siesa tou tu’u, e reiy’ siesa tou tu’u si rinugi meiyla, wo reiy’ waki siesa tou tu’u keiy masero eng kamang.
3
Niaku ku meila’ tuana, reiy’ kaa laa meweweela ukuman wia nikouw, karengan eng ketare neiyku mouw i lila’la, kaa nikouw kouw minaka’ato mola tampa witu eng gorem e nate meiy, i ka’ayo nikita ta esa nga patou-touan esa nga patean.
4
Niaku ku kasa minakaredeiy witu nikouw; ta’an niaku kangkasi ku kasa mesawa’la nikouw. Witu e reiy’ sa mina’asa em peme’itan neiy niaku ku kasa kinai’iboran wo e mepa’a-pa’arku e mineloko-lokon.
5
Awes tare eng katoroan nikeiy nu i ka’ayola waki Makedonia’ keiy reiy’ minaka’ato kaleneran i wee e nouwak meiy, Wisa-wisa i te nikeiy keiy mape’anla eng kasusa’an: waki luar em pe’isingan wo e waki ghorem eng kineide’an.
6
Ta’an si Empung, si miniborla se tou kumeng ate, miniborola nikeiy ampit eng kine’e eiy ni Titus.
7
E reiy’ i te kaa eng kine’e eiyna, ta’an kangkasi kaa em pangiboran eng kineipianna witu eng keuneran niouw. Karengan nisia si minakite’u mola wia nikey en tanume eng kaleloannu, e nga’angalmu, eng kauli-ulitannu kaa laa mererapit niaku, i ka’ayo eng kasa minaka’awesola e mepa’a-pa’arku.
8
Ni’itu mouw ma’anouw tu’u ku simusa mola e natemu ampit en suratku i ti’i, ta’an niaku ku reiy’ mineneselela nyi’a. Memang mekasa mouw niaku mineneselela nyi’a, karengan e linoo’oku, kaa en surat i ti’i en simusala natemu – ma’anouw tu’u i wee esa nga katoroan i te eng keurena -,
9
ta’anouw en teakan niaku ku mepa’a-pa’ar, e reiy’ karengan nikouw kouw minengasi’ mola, reiy’ siwalina karengan e mengasi’mu en simiwo nikouw minakedo’. Karengan e mengasi’mu i ti’i nyi’a mouw neiy i ki’it eng kepa’aran ni Empung, i ka’ayo nikouw ma’an oki’ i te tu’u kouw reiy’ rinugila eng karengan nikeiy.
10
Karengan e mengasi’ i ki’it eng kepa’aran ni Empung e mawua’la pakedo’an e minali eng kelawiran wo e reiy’ laa peneselen, ta’an e mengasi’ waki kaoatan i yi’i e mawua’la em patean.
11
Karengan weeanola ghenang kumura e nawes tare e mengasi’ i ki’it eng kepa’aran ni Empung i ti’i e mina’ayangla wia nikouw eng kauli-ulitan e wangko’, awes tare em perapitan en tou, e makaupi’in, kineide’an, kaleloan, kalingkama’an, peukuman! Witu eng gorem em baya nyi’a i ti’i nikouw kouw minapatuu’ mola, kaa nikouw kouw reiy’ siselok witu eng kapualitan i ti’i.
12
Karengan e ni’itu, sa niaku ku minatikola surat wia nikouw, takar e reiy’ mouw eng karengan sitou si simiwo selok, ka’apa eng karengan sitou si peme’itan em pasiwo-siwon selok, ta’an i te rio eng kepa’aranem pa’armu witu nikeiy e mamuali pakaloo’o-loo’ola i wee nikouw witu en sinaru ni Empung.
13
Karengan e ni’itu mouw nikeiy keiy kinaiboran. Wo e walinana em pangiboran kina’atoan neiyla i ti’i, keiy lebepe’ kasi mepa’a-pa’ar eng karengan e mepa’a-pa’ar ni Titus, karengan nikouw nu waya kouw simegaya’la e natena.
14
Niaku ku simawa’la nikouw wia nisia, wo nikouw kouw reiy’ minoki’atela niaku. Nikeiy keiy reiy’ siena’na meila’la sapa e nulit wia nikouw, tuanakan kangkasi eng kesawa’an neiy witu en sinaru ni Titus em pinakaloo’o-loo’o mola ulit.
15
Wo e nupusna e maawes eng kasela witu nikouw, sakawisa sia ghumenang eng kelale’an niouw nu waya, kumura kouw simungkul eng kine’e eiyna ampit e meide’ wo kori’.
16
Niaku ku mepa’a-pa’ar, karengan niaku ku toro meela ka’emanan wia nikouw witu e reiy’ sa mina’asa kapualitan.