Paulus witu em pasempunganna ¹ Tanume se ka’ampit-ka’ampit esa nga pepa’ayangen, nikeiy keiy ngume’enge’la nikouw, rio kouw te’a sumiwo mamuali reiy’ sipenoron e nupus karunia ni Empung, en sinungkul miouw mola. ² Karengan si Empung si minee nuwu’: “Witu e nedo Niaku nu mepa’ar, Niaku ku laa lumingala nikoo, wo witu e nendo Niaku nu lumawirla, Niaku ku laa male’ nikoo.” Eng kaulitna, e nedo i yi’i nyi’a mouw e nedo pangapepa’aran i ti’i; eng kauitna, e nendo i yi’i nyi’a mouw e nendo pelawiran i ti’i. ³ Witu eng kapualitan sapa tu’u nikeiy keiy reiy’ mee karengan se tou i kasu’usu’, rio em pasempungan neiy te’a i ka’ayo weleiyen. ⁴ Eng kapurikitna, witu e reiy’ sa mina’asa kapualitan nikeiy keiy minapa’atola, kaa nikeiy nyi’a mouw keiy sumesempung ni Empung, nyi’a i ti’i: witu e metaang ampit e wuta eng kasabaaran witu em peme’itan, kase’esekan wo eng kapedisan, ⁵ Witu metanggong em bewetu, witu eng gorem em penjara wo eng karungkea’an, witu em bedu rawoiy, witu e menayu-nayur wo maposo; ⁶ witu eng kalenasan e nate, tine’u, eng kasabaaran, wo eng kamura’an e nate; witu e Roh Kudus wo e nupus reiy’ linsu’; ⁷ witu em paabaran eng kaulitan wo eng kakuwasa’an ni Empung; ampit mepakela en saliatan-saliatan ka’adilan kaa laa mererego ka’apa tu’u kaa laa mererapit ⁸ eng katoroan sighi’in wo eng katoroan sero’an; eng katoroan ri’awuten ka’apa eng katoran lo’oren; eng katoroan i papokeiyla tanume si le’ekok, ta’anouw niemanla, ⁹ tanume sitou reiy’ kasine’uan, ta’anouw si kasa kasine’uan; tanume sitou weitouw mate, wo ulit nikeiy keiy matou-tou; tanume sitou winetuan, ta’anouw reiy’ minate; ¹⁰ tanume sitou mengasi’, ta’anouw reiy’ siena’na mepa’a-pa’ar; tanume sitou lengeiy, ta’anouw mepekaya laker tou; tanume sitou reiy’ makapunya, ma’anouw tu’u keiy makapunya e reiy’ sa mina’asa wo’o sapa. ¹¹

Te’a wawean kasi en sering ka’alifuruan

Heiy tou eng Korintus! Nikeiy keiy simusuiyola minakaredeiy wia nikouw, e nate meiy neiy i kawuka’ minakapena-penar i wee nikouw. ¹² Wo i wee nikouw e wawean tampa pelas witu e nate meiy, ta’an i wee nikeiy keiy tiniro’an i te tampa peset witu eng gorem e nate miouw. ¹³ Takar en teakan, rio materenan – niaku ku lumila’ tanu wia se oki-oki’ku –: Wuka’anouw e nate miouw esa nga kapena-penarna! ¹⁴ Te’a mouw kouw metanula si kepaar reiy’ minaterenan ampit se tou-tou reiy’ ma’eman. Karengan eng kemasuatan sapa ku’a re’en eng kina’atoan e nelet eng kaulitan wo eng kalewo’an? Ka’apa kumura ku’a re’en en terang o toro maesa’an ampit e reiydem? ¹⁵ Kemasuatan sapa ku’a re’en eng kina’atoan e nelet ni Kristus wo ni Belial? Sapa ku’a re’en e weteng mewali ne tou-tou ma’eman ampit ne tou-tou reiy’ ma’eman? ¹⁶ Sapa ku’a re’en e maato-atoanna em bait ni Empung ampit em paepungen? Karengan nikita nyi’a mouw ta bait waki si Empung e matou-tou i ki’it e nuwu’ ni Empung i yi’i: “Niaku ku laa mena’ mewali-wali ampit nisea wo tumou witu eng keuneran nea, wo niaku ku laa mamuali Empung nea, wo nisea se laa mamuali umat-Ku. ¹⁷ Karengan e ni’itu: Rumo’u momi kouw waki elet nea, wo i ta’atasomi en toumu waki nisea, e nuwu’ ni Tuhan, wo te’a mouw koo mesese’u sapa en seremor, takar Niaku ku laa sumungkul nikouw. ¹⁸ Wo Niaku ku laa mamuali Ama’mu, wo nikouw kouw mamuali oki-oki’-Ku tuama wo oki-oki’-Ku wewene tuana mouw e nuwu’ ni Tuhan, Si Kasakuwasa.”