Pasal 10
En tiro’ ni Paulus
1
Niaku, Paulus, siesa tou reiy’ berani sa mesaruan eng gio ampit nikouw, ta’an berani witu nikouw sa minewa’akatan, niaku ku ngume’enge’la nikouw kaa si Kristus si rinda wo le’os ate.
2
Niaku ku makiwee wia nikouw: te’a kouw mapupusla niaku kaa laa mapa’atola eng kaberaniangku wia en tawi, tanume eng kumura niaku nu mepa’ar mewewinta’la ente’ witu se tou-tou neiy i ketantu se mapokeiyla, kaa nikeiy keiy matou-tou eng kenaramen eng kaoatan.
3
Memang nikeiy keiy matou-toupe’ wia eng kaoatan, ta’an nikeiy keiy reiy’ mame’inakut ampit eng kenaramen eng kaoatan,
4
karengan en saliatan neiy witu em pe’inakutan e reiy’ mouw en saliatan eng kaoatan, e reiy’ siwalina en saliatan pinalekepla ampit eng kuwasa ni Empung, e makawoo kaa laa mererewala em benten-benten.
5
Nikeiy keiy marepu’la susur en siasat ne tou wo makolo’la susur e rereen neiy i to’orla kaa eng katingkeiyan ni tou kaa laa mepepero em panginsine’uala si Empung. Nikeiy keiy timaang e reiy’ sa mina’asa eng genang wo tumu’utukla nyi’a wia si Kristus,
6
wo nikeiy keiy timiro-tiro’ kangkasi kaa laa mukum susur eng kalewo’an, sa eng kelale’an niouw e minamuali mouw reiy’siperoan.
7
Loo’onouw e leno witu en saruan em beren niouw! Sa wawean siesa tou uli-ulit ma’eman, kaa nisia nyi’a mouw si kapunya’an ni Kristus, satorona nisia si ghumenang witu eng gorem e natena, kaa nikeiy kangkasi nyi’a mouw keiy kapunya’an ni Kristus masuat tanu nisia.
8
Awes tare, sa wona’na niaku ku wo’o wona’na mekelaa-laana mola mesawa’ witu eng kuwasa, neiy i karuniala ni Tuhan wia nikeiy kaa laa mebebangun wo e reiy’ kaa laa mererewala nikouw, takar witu eng kapualitan i ti’i niaku ku reiy’ laa maka’ato irang.
9
Ta’an niaku ku so’o paloo’ola tanu mokan ku mengide-ide’la nikouw ampit en surat-suratku.
10
Karengan, em pokeiy ne tou, en surat-suratna e memang ledos wo kete ta’an sa mesaruan eng gio eng kapawinta’na e lewea’ wo e lelila’an-lelila’anna e reiy’ sipenoron.
11
Ta’an satorona se tou-tou se meila’ en tuana se mawena’asla, kaa eng kapawinta’ meiy, sa mesaruan eng gio, e masuat tanu e lelila’an neiy witu en surat-surat meiy, sa reiy’ minesaruan eng gio.
Genang ni Paulus en tanume en touna
12
Memang nikeiy keiy reiy’ berani manginwetengla en tou wia ka’apa mememange’anla en tou ampit se tou-tou neiy i ketantu se malo’orla en tou nuesa. Nisea se meukur en touna ampit e nukuran nea nuesa wo mememange’anla en tou nea ampit en tou nea nuesa. O weta’ eng kawe’engelna nisea!
13
Eng kapurikitna nikeiy keiy so’o mesesawa’la e lumantouwla e nakaran, ta’an i te e minena-ena’ witu eng gorem em paakaran-paakaran en daerah papa’ayangan e neiy i te’edek ni Empung i wee nikeiy, eng kimere neiy i ka’ayo wia nikouw kangkasi.
14
Karengan witu e maabarla e Injil ni Kristus nikeiy keiy mina’ayo momi wia nikouw, i ka’ayo keiy reiy’ limangkoiyla em paakaran en daerah papa’ayangan neiy, en tanu mokan nikeiy keiy reiy’pe’ mina’ayomi wia nikouw.
15
Nikeiy keiy reiy’ mesawa’ witu em pepa’ayangen en tinuanala ne tou walina witu en daerah papa’ayangan e reiy’ tine’edek i wee nikeiy. Ta’an nikeiy keiy maarap, kaa sakawisa e nemanmu e makatou momi, nikeiy keiy laa maka’ato kasesighi’an sumelala kasi witu e nelet miouw, sa i pememange’anla ampit en daerah papa’ayangan en tine’edek i wee nikeiy.
16
Yon, nikeiy keiy matou-tou, rio keiy toro maabarla e Injil waki daerah-daerah e lebe wa’akat ta’an en daerah miouw wo reiy’ mesawa’la witu e wua’na-wua’na e niayola ne tou walina witu en daerah papa’ayangan en tine’edek i wee nisea.
17
“Ta’an seiy i te si sumawa’ satorona nisia si sumawa’ witu si Tuhan.”
18
Karengan e reiy’ sitou si malo’or en tou si taang i wa’awa’, ta’an i te sitou si lino’or ni Tuhan.