¹ Kumura e le’osna, sa kouw sabaar witu eng kawe’engelangku e noki’ i ti’i. Memang nikouw kouw sabaar witu niaku! ² Karengan niaku ku iri ate wia nikouw ampit e iri ate kaempungan. Karengan niaku ku minapatunanganola nikouw wia siesa tuama kaa laa ma’ali nikouw tanume si reraa lenas wia si Kristus. ³ Ta’an niaku ku meide’, e wo’o wona’na eng genang miouw ni’i seipi waki kelale’an niouw e nuli-ulit wia si Kristus, masuat tanu si Hawa nu pinonge’la ni leloiy’ i ti’i ampit eng kawilesanna. ⁴ Karengan nikouw kouw sabaar i te, sa wawean siesa tou meiy mabarla si Yesus e walina ta’an i te si neiy mouw i abar meiyla, ka’apa meela wia nikouw e roh walina ta’an i te en sinungkul miouw mola ka’apa e Injil e walina ta’an i te si sinungkul miouw mola. ⁵ Ta’an i ki’it eng genangku e noki’ tu’u niaku ku reiy’ mamuri wia se rasul-rasul e reiy’la sikasuat i ti’i. ⁶ Sa wona’na aku reiy’ kasa mangarti witu eng kapualitan meila-ila’, e reiy’ mouw tuana witu eng kapualitan en tine’u; karengan nikeiy keiy minapaloo’o-loo’o mola nyia wia nikouw witu e reiy’ sa mina’asa e nedo wo witu e reiy’ sa mina’asa eng kapualitan. ⁷ Sapa ku’a re’en niaku ku masiwo en selok, sa aku kumumengla en tou kaa laa mererakekla nikouw, karengan niaku ku maabarla e Injil ni Empung wia nikouw ampit em petaber? ⁸ Jema’at-jema’at walina se rino’obitangku mola ampit simungkuli en sesawang waki nisea, rio aku toro sumempungla nikouw! ⁹ Wo eng katoroan niaku nu witu eng kareiy’awesan witu eng keuneran niouw, niaku ku reiy’ simusala siesa tou tu’u, karengan sapa e reiy’ awes wia niaku, niawesla ne patuari-patuari se waki Makedonia o meiy, witu e reiy’ sa mina’asa kapualitan niaku ku maalar en touku, rio te’a mamuali pemesa’anen i wee nikouw, wo niaku ku laa mena-ena’ masiwo en tuana. ¹⁰ Kaa eng kaulitan ni Kristus witu en touku, niaku ku lumedosla, kaa eng kesawa’angku i ti’i e reiy’ laa ape’en ni seiy’ i te tu’u waki daerah-daerah Akhaya. ¹¹ Ka’a reiy’? Sapa ku’a re’en karengan niaku ku reiy’ moupusla nikouw? Empung si mete’ula nyi’a. ¹² Ta’an sapa en tinuanakula, e laa mena-ena’ tuanangkula kaa laa mepepalouwla nisea se masero eng kalempotan kaa laa mapaloo’o-loo’ola, kaa niesea se masuat ampit nikeiy witu eng kapualitan en toro i sawa’la. ¹³ Karengan se tou-tou i ti’i nyi’a mouw se rasul-rasul reiy’ ulit, se memema’ayang-memema’ayang wiles, se ma’asa-asar tanume se rasul-rasul ni Kristus. ¹⁴ Eng kapualitan i ti’i e reiy’ perlu maka’erangen, karengan si Iblis tu’u si minasar tanume si malaikat en Terang. ¹⁵ Ni’itu mouw e reiy’ mouw e nesa kapualitan e reiy’ lekep, sa se sumesempung-sumesempungna se minasar tanume se sumesempung-sumesempung eng kaulitan. Eng kesampetan nea e laa matoroan ampit em pasiwo-siwon nea. ¹⁶ Soupengkula kasi: te’a satorona wawean tou si mapokeiyla niaku ku we’engel. Wo sa nikouw kangkasi kouw mapokeiyla en tuana, sungkulenouw niaku tanu sitou we’engel rio aku tu’u ku toro sumawa’la oki’. ¹⁷ Sapa e neiyku i lila’la, niaku ku limila’la nyi’a reiy’ ku tanume siesa tou si meila’la i ki’it e nuwu’ ni Tuhan, reiy’ siwalina ku tanume siesa tou we’engel si maka ka’emanan, kaa nisia si toro sumawa’. ¹⁸ Karengan laker tou se mesawa’ eng kenaramen eng kaoatan, niaku ku pa’ar sumawa’ kangkasi. ¹⁹ Karengan nikouw kouw pa’ar masabaar witu se tou we’engel, karengan nikouw kouw tuana eng kesama’: ²⁰ karengan nikouw kouw sabaar, sa sitou mepehambala nikouw, sa sitou rume’erep nikouw, sa sitou kumuwasala nikouw, sa sitou mawinta’ tingkeiy witu nikouw, sa sitou sumepe’ nikouw. ²¹ Ampit eng kasa meirang niaku ku lewo’ sa reiy’ maakula, kaa witu eng kapualitan tanu e ni’itu nikeiy keiy taleus lewea’. Ta’an sa se tou-tou walina se berani memangko-mangko’la e wo’o sapa, takar niaku tu’u – niaku ku limila’ witu eng kawe’engelan – berani kangkasi! ²² Sapa ku’a re’en nisea se tou Ibrani? Niaku kangkasi ku tou Ibrani! Sapa ku’a re’en nisea se tou Israel? Niaku kangkasi ku tou Israel. Sapa ku’a re’en nisea se see’ ni Abraham? Niaku kangkasi ku see’ ni Abraham! ²³ Sapa ku’a re’en nisea se sumesempung ni Kristus? – niaku ku meila’ tanu sitou sepereng – niaku ku lebepe’ kasi! Niaku ku lebe laker minemedu-medu; lebe re’eregh witu eng gorem em penjara; pawewen reiy’ siniakaran; re’eregh kasa witu em bahaya em patean. ²⁴ Minaka lima niaku winewe ne tou Yahudi susur maka epat nga pulu’ ro’uan esa wewewe, ²⁵ maka telu niaku winewe, mekasa niaku ku linawala ampit em batu, maka telu mine’anla eng kapal rima’aser, esa nga endo esa nga wengi niaku ku malentu-lentut waki uner en tasik. ²⁶ Witu em pakela-kelangangku niaku ku re’eregh pe’iwetan em bahaya en songker wo em bahaya ne rumero’obit, em bahaya waki weteng ne tou-tou Yahudi wo waki weteng ne tou-tou e reiy’ Yahudi; em bahaya witu eng kota, em bahaya waki patar kaerisan, em bahaya witu nuner en tasik, wo em bahaya waki weteng ne patuari-patuari reiy’ ulit. ²⁷ Niaku ku laker minemedu-medu wo mepa’ayang wuter; re’eregh kasa niaku reiy’ matekel; ku maarem wo mare’o; re’eregh kasa niaku maposo, maghe’egher wo limengat, ²⁸ wo, reiy’ ampit matotor laker eng kapualitan walina kasi, e nurusangku susur nendo, nyi’a i ti’i kaa laa ma’alar em baya ne jema’at-jema’at. ²⁹ Sa wawean tou si mapedam lewea’, reiy’ ku’a re’en niaku ku kumi’it mapedam lewea’? Sa wawean tou neiy i kasu’usu’, e reiy’ ku’a re’en e nateku eng kemu kaa e mangasi? ³⁰ Sa aku lewo’ sa reiy’ sumawa’, takar niaku ku laa sumawa’ witu eng kalewea’angku. ³¹ Empung, nyi’a i ti’i si Ama’ waki Yesus, Tuhan ta, si palo’oren i ka’ayo eng keure-urena, si mete’u, kaa niaku ku reiy’ matowo. ³² Waki Damsyik si wali em banua ni raja Aretas si rimeo tumeper eng kota ne tou-tou en Damsyik kaa laa mesesikop niaku. ³³ Ta’an witu e nesa karanjang niaku ku neiy i tumpami waki e nesa ansouw mea waki luar em beton kota wo ampit en tuana niaku ku neiy i kaliseiyi waki lawasna.