Pasal 12
Paulus minaka’ato em pineleloo’ wo em pinapaloo-loo’an
1
1 Niaku ku lewo’ sa reiy’ sumawa’, ma’anouw tu’u memang eng kapualitan i ti’i e reiy’la sika’ara’anna, ma’anouw tuana niaku ku laa ma’abarla em pineleloo’-pineleloo’ wo em pinapaloo-loo’an – pinapaloo-loo’an en sinungkulkumi waki si Tuhan.
2
2 Niaku ku mete’u en tanume siesa tou Kristen; e mapulu’ o epat nge te’un limangkoiyla – andi witu eng gorem e nouwak, niaku ku reiy’ mete’u, andi witu luar e nouwak, niaku ku reiy’ mete’u, Empung si mete’ula nyi’a – sitou i ti’i i kalo’ositi si niadeti mineiy waki ransun katelu waki sorga.
3
Niaku kangkasi ku mete’u en tanume sitou i ti’i, – andi witu eng gorem e nouwak andi witu luar e nouwak, niaku ku reiy’ mete’u, Empung si mete’ula nyi’a –
4
nisia i kalo’ositi si kina’adetan minea waki Firdaus wo nisia si liminga e lelila’an-lelila’an e reiy’ i keila’la, e reiy’ toro i totorla ni tou.
5
Witu sitou i ti’i niaku ku laa mesesawa’, ta’an witu en touku nuesa niaku ku reiy’ laa sumawa’, reiy’ siwalina witu eng kalewea’an-kalewea’angku.
6
Karengan sa wona’na niaku ku laa mesesawa’la kangkasi, niaku ku reiy’ mouw tou we’engel kasi, karengan niaku ku meila’la eng kaulitan. Ta’an niaku ku metaang en touku, rio te’a wawean tou si rumekenla wia niaku e lumantouwla ta’an e linoo’ nea wia niaku ka’apa e lininga neala wia niaku.
7
Wo rio aku te’a rumakekla en tou karengan em pinapaloo-loo’an – pinapaloo-loo’an e wuntul i ti’i, takar niaku ku wineean esa tetune witu eng gorem e le’onaku, nyi’a i ti’i siesa tou tetoke ni Iblis kaa meiy lumalesi niaku ampit eng kaketena, rio aku te’a rumakekla en tou.
8
En tanume eng kapualitan i ti’i niaku ku makatelu mouw maaleiy wia si Tuhan, rio si tetoke ni Iblis i ti’i si rumo’u wia niaku.
9
Ta’an e wingkot ni Tuhan wia niaku: “Awesouw e nupus karunia-Ku i wee nikoo, karengan awes tare e witu eng kalewea’anouw eng kuwasa-Ku e mamuali reiy’ siperoan.” Karengan e ni’itu kasa lebe pa’ar niaku mesawa’ witu eng kalewea’angku, rio eng kuwasa ni Kristus en tumumpa tumerungi niaku.
10
Karengan e ni’itu niaku ku senaang wo kasa pa’ar witu eng gorem eng kalewea’an, witu eng gorem em papedisen, witu eng gorem eng kapedisan, witu eng gorem em pasiasa’an wo eng kase’esekan eng karengan si Kristus. Karengan sa aku lewea’, takar niaku ku ente’.
Eng kalieiyan ni Paulus
11
E nulit niaku ku mina we’engelouw; ta’an nikouw kouw limupu niaku. Eng kaulitna niaku ku lewo’ sa reiy’ lo’oren niouw. Karengan ma’anouw tu’u ku reiy’ simakapenoron ma’an oki’ i te tu’u, ta’an witu e reiy’ sa mina’asa eng kapualitan niaku ku reiy’ kala wia se rasul-rasul e wuntul i ti’i.
12
E reiy’ sa mina’asa wo’o sapa e minapatuu’la, kaa niaku nyi’a mouw ku esa rasul, tinuana mola witu eng keuneran niouw ampit e reiy’ sa mina’asa kasabaaran kaa eng kowa’-kowa’, e maka’erangen-maka’erangen wo eng kuwasa-kuwasa.
13
Karengan witu eng kapualitan wisa ku’a re’en o kouw neiy i murila sa pasuatela ampit se jema’at-jema’at walina, reiy’ si walina ta’an i te witu eng kapualitan i yi’i, nyi’a i ti’i kaa niaku nuesa ku reiy’ minamuali esa pemesa’anen wia nikouw? Ampunganola eng kareiy’adilangku i yi’i!
14
Eng kaulitna en teakan i wee mouw eng kateluna niaku timiro’ kaa laa lumalesla nikouw, wo niaku ku reiy’ laa i tanula e nesa pemesa’anen i wee nikouw. Karengan e reiy’ em budelmu em penerongku, ta’an i te nikouw nuesa. Karengan e reiy’ se oki-oki’ se lewo’ sa reiy’ merurla em budel i wee se tu’ana, ta’an i te se tu’a mouw i wee se oki-oki’na.
15
Karengan e ni’itu niaku ku pa’ar tumulela eng kapunya’angku, awes tare tumulela en touku i wee nikouw. Ni’itu mouw sa aku kasa moupusla nikouw, ma’an tu’una niaku ku kasa mouw reiy’ awes i pakoupusla?
16
Le’osouw, niaku nuesa ku reiy’ i tanula siesa pemesa’anen i wee nikouw, ta’an – nikouw kouw limila’la – witu eng kawilesangku niaku ku mine’etesouw nikouw ampit em biles kawilesan.
17
Ni’itu mouw mekasa mouw ku’a re’en niaku minedomi kamang waki nikouw karengan siesa tou waki elet nea, si neiyku i toke wia nikouw?
18
Memang niaku ku kimiwee mola si Titus kaa laa mea wo mewali-wali ampit nisia niaku ku timoke si patuari e walina i ti’i. Sapa ku’a re’en si Titus si maedomi kamang waki nikouw? Reiy’ ku’a re’en nikeiy nu rua keiy matou-tou i ki’it e roh e masuat wo reiy’ ku’a re’en nikeiy keiy mawinta’ i ki’it eng kenaramen e masuat?
19
Nure mouw wona’na kouw mapokeiyla, kaa nikeiy keiy laa mererapit en tou witu en saruan niouw. Witu en sinaru ni Empung wo kaa si Kristus keiy limila’: em baya nyi’i, ee patuari-patuariku i koupus, e minamuali kaa laa mebebangun e neman miouw.
20
Karengan niaku ku lieiy, kaa sakawisa niaku meiy niaku ku matola nikouw kouw reiy’ tanu e neiyku i kepa’arla wo nikouw kouw matola niaku ku reiy’ tanu si neiy miouw i kepa’arla. Niaku ku lieiy sa laa wawean pesali’isi’an, iri ate, nupi’, me’uku-ukum en tou nuesa, sero’, matena-tena’an, katingkeiyan, wo eng karungkea’an.
21
Niaku ku lieiy, kaa sakawisa ku meiy kasi, Empungku si laa kumumengla niaku witu en sarun niouw, wo kaa niaku ku laa mengasi’ witu se laker tou se witu e nedo limangkoiyla se simiwo en dosa wo se reiy’pe’ kasi minakedo’mi waki kakewuran, pesa’amekan wo kareiy’siadatan en tinuana neala.