Pasal 13
Ngege’enge’ – ngenge’enge’ kasa kesampetan
1
E nyi’i nyi’a mouw i wee eng kateluna niaku mineiy wia nikouw: Tare mouw ampit e lelila’an ne rua ka’apa telu tou sairi e nesa kapualitan en sah.
2
Wia nisea, se witu e nedo limangkoiyla se simiwo en dosa, wo wia em baya ne tou walina, neiy mouw i lila’kula eng kasa ketareanna wo niaku ku laa lumila’la nyi’a mekasape’ kasi – en teakan witu e nedo niaku nu minewa’akatan ampit nikouw minakatena’ tanu witu e nedo kine’e eiyku eng karuana – kaa niaku ku reiy’ laa meneselela nisea witu e nedo niaku nu meiy kasi.
3
Karengan nikouw kouw pa’ar e nesa tuu’, kaa si Kristus si mengila-ngila’ ampit e nieletangku, wo Nisia si reiy’ lewea’ witu nikouw, ta’an i te si makakuwasa witu eng keuneran niouw.
4
Karengan e ma’anouw tu’u Sia neiy mouw i salibla karengan eng kalewea’an, ta’anouw Nisia si matou-tou karengan eng kuwasa ni Empung. Memang nikeiy nyi’a mouw keiy lewea’ witu Nisia, ta’an nikeiy keiy laa tumou mewali-wali ampit Nisia i wee nikouw karengan eng kuwasa ni Empung.
5
Wa’awa’anouw en toumu nuesa, sapa ku’a re’en nikouw kouw minena-ena’ timaga’ witu e neman. Soisapenola en toumu! Sapa ku’a re’en kouw reiy’ ma’emanla en toumu, kaa si Kristus Yesus si witu eng gorem en tou miouw? Karengan sa reiy’ tuana, kouw reiy’ taang i wa’awa’.
6
Ta’an niaku ku maarap, kaa nikouw kouw mete’u, kaa e reiy’ nikeiy si reiy’ taang i wa’awa’.
7
Nikeiy keiy masombayang wia si Empung, rio kouw te’a sumiwo lewo’ e reiy’ o rio keiy pakaloo’o-loo’ola taang i wa’awa’, ta’an i te rio nikouw i yi’i kouw toro sumiwo sapa e le’os, ma’anouw tu’u nikeiy nuesa keiy paloo’ola reiy’ taang i wa’awa’.
8
Karengan nikeiy keiy reiy’ mete’u sumiwo sapa-sapa sumu’usuk eng kaulitan; en toro siwon neiy nyi’a mouw ni’i wee eng kaulitan.
9
Karengan nikeiy keiy mepa’a-pa’ar, sakawisa keiy lewea’ wo nikouw kouw ente’. Wo nyi’i mouw e neiy i sombayang meiyla, nyi’a i ti’i rio kouw mamuali reiy’ siperoan.
10
Ni’itu mouw eng karenganna e mekasa i yi’i niaku ku minatikla wia nikouw eng katoroan niaku nu minewa’akatan ampit nikouw, rio sa aku witu eng keuneran niouw, niaku ku reiy’ kalupuan mewewinta’ kete i ki’it eng kuwasa neiy i anugerahla ni Tuhan wia niaku kaa laa mebebangun wo e reiy’ kaa laa rumewala.
Tabea
11
Kesampetanna, patuariku waya, mepa’a-pa’arola, pe’inakutenola en toumu rio reiy’ siperoan. Sungkulenouw e reiy’ sa mina’asa e nge’enge’ku! Esa nga ate esa nga ghenangouw nikouw, wo tumou mouw witu e le’os eng kale’osan; takar si Empung, kembu’an e nupus wo e le’os eng kale’osan si laa rumapitla nikouw!
12
Mee mouw tabea siesa wia se walina ampit en siong e kudus. Tabea waki em baya ne tou kudus wia nikouw.
13
E nupus karunia ni Tuhan Yesus Kristus, wo e nupus ni Empung, wo em paasa-asa’an e Roh Kudus e rumapitla nikouw nu waya.