Pasal 4
Em budel rohani witu en sempe tana’
1
Kaa eng kamura’an ni Empung nikeiy keiy minaka’ato mola em pasempungan i yi’i. Karengan e ni’itu nikeiy keiy reiy’ tewang ate.
2
Ta’an nikeiy keiy masede’ e reiy’ sa mina’asa em pasiwo-siwon neiy i kakirong e mapairangla; nikeiy keiy reiy’ mawiles wo reiy’ menowo-nowola e nuwu’ ni Empung. Eng kapurikitna nikeiy keiy minapaloo’o-loo’ola eng kaulitan wo ampit en tuana nikeiy keiy simarakanla en tou meiy kaa laa pemili-milingela em baya ne tou witu en sinaru ni Empung.
3
Sa e Injil neiy i abar meiyla e minapenete’ kangkasi, takar nyi’a neiy i kapenet i wee nisea, se laa mapuneng,
4
nyi’a i ti’i se tou-tou reiy’ ma’eman, eng genangna e rinapa mola ni ilah en zaman i yi’i, i ka’ayo sea reiy’ maloo’ en sena’na e Injil en tanume eng kewangko’an ni Kristus, nyi’a mouw e lumian ni Empung.
5
Karengan e reiy’ en tou meiy e neiy i abar meiyla, ta’an si Yesus Kristus si tanume si Tuhan, wo en tou meiy keiy tanume si hambamu karengan eng kepa’aran ni Yesus.
6
Karengan si Empung si minuwu’ mola: “Waki ghorem e reiydem e laa rumetik en terang!”, Nisia kangkasi si simiwo en terang-Na en sumena’ witu eng gorem e nate ta, rio kita maka’ato en terang waki tine’u en tanume eng kewangko’an ni Empung e niato witu eng gio ni Kristus.
7
Ta’an em budel i yi’i e mina punya meiy witu en sempe tana’ pulut, rio pakaloo’o-loo’ola, kaa eng kaketeran mineloko-lokon i ti’i e nasal waki si Empung, e reiy’ waki en tou meiy.
8
Witu e reiy’ sa mina’asa eng kapualitan nikeiy keiy pakopiten, ta’an nikeiy keiy reiy’ kinakopitan; nikeiy keiy kina’apuan akal, ta’an keiy reiy’ minategol arapan;
9
nikeiy keiy siniasa, ta’an keiy reiy’ neiy i wayala maesa-esa, nikeiy keiy neiy i wansalela, ta’an e reiy’ minapuneng.
10
Nikeiy keiy reiy’ maena-ena’ maali eng kinepatean ni Yesus witu e nouwak meiy, rio em patou-touan ni Yesus kangkasi e mamuali pakaloo’o-loo’ola witu e nouwak meiy.
11
Karengan nikeiy, nu matou-toupe’ i yi’i, keiy reiy’ maena-ena’ i pasarakan witu em patean karengan si Yesus, rio kangkasi em patou-touan ni Yesus e mamuali pakaloo’o-loo’ola witu e nouwak meiy laa materi i yi’i.
12
Takar tuana mouw em patean e minengente’ witu e nouwak meiy wo en timou minengente’ witu nikouw.
13
Ta’an eng karengan nikeiy keiy makapunya e roh eman masuat, tanu neiy i kepatik: “Niaku ku ma’eman, karengan e ni’itu niaku ku mengila-ngila’”, takar nikeiy kangkasi keiy ma’eman wo karengan e ni’itu nikeiy kangkasi keiy mengila-ngila’.
14
Karengan kete’uan neiy, kaa Nisia, si timo’oromi si Tuhan Yesus, si laa tumo’orla nikeiy kangkasi mewali-wali ampit si Yesus. Wo Nisia si laa sumarula nikeiy mewali-wali ampit nikouw witu en tou-Na.
15
Karengan em baya nyi’a i ti’i e minamuali eng karengan nikouw, rio e nupus karunia, e makaselala minato’orongan ampit eng kelakerna ne tou mina’eman, kimarenganla eng kasa minakalokonla en totor syukur i wee eng kewangko’an ni Empung.
Te’a tewang ate, o kangkasi e nedo mesesarula em patean
16
16 Karengan e ni’itu nikeiy keiy reiy’ tewang ate, ta’an ma’anouw tu’u en tou lahiria meiy e makako’okosouw, ta’an en tou batinia meiy em binerula waki esa nga endo lumaa esa nga endo.
17
17 Karengan em peme’itan wure’ en teakan i yi’i, e mepa’ayangla i wee nikeiy eng kewangko’an ke’ekel e limantouwla em baya-wayana, e wa’akat lebe wangko’ ta’an e waki peme’itan neiy.
18
18 Karengan nikeiy keiy reiy’ mawee ghenangla em paloo’ola, ta’an i te e reiy’ paloo’ola, karengan em paloo’ola nyi’a mouw eng kasuatan i te, kasuatan e reiy’ paloo’ola nyi’a mouw eng ke’ekel.