Pasal 3
Sumesempung-sumesempung en teta’aran weru
1
Sapa ku’a re’en nikeiy keiy muleiy kasi melelo’orla en tou meiy? Ka’apa padung ku’a re’en nikeiy tanu se tou-tou walina mapa’atola en surat palo’oran wia nikouw ka’apa waki nikouw?
2
Nikouw nyi’a mouw kouw surat palo’or meiy e neiy i kepatik witu e nate meiy wo eng kasine’uan wo en toro wacan em baya ne tou.
3
Karengan em pinakaloo’o-loo’o mola, kaa nikouw nyi’a mouw kouw surat ni Kristus, neiy i patik kaa em pasempungan neiy, neiy’ i patik reiy’ ampit en tinta, ta’an ampit e Roh waki si Empung matou-tou, e reiy’ witu e loh-loh watu, ta’an i te witu e loh-loh e le’ona, nyi’a i ti’i witu eng gorem e nate ni tou.
4
Tuana mouw eng kaselana eng ka’emanan neiy wia si Empung kaa ni Kristus.
5
Ampit en tou meiy nuesa keiy reiy’ makawoo kaa laa maparerekenla e wo’o sapa en tanu mokan em pepa’ayangen neiy nuesa; e reiy’, eng kawooan neiy nyi’a mouw em pepaya’ngen ni Empung.
6
Nisia mouw si simiwo nikeiy kangkasi o keiy makawoo mamuali sumesempung-sumesempung waki e nesa teta’aran weru, e reiy’ neiy i karedeiyi waki ukum neiy i kepatik, ta’a waki e Roh, karengan e nukum neiy i kepatik e mekepaten, ta’an e Roh e makatoun.
7
Pasempungan e ma’aka-aka witu em patean neiy i kalumi ampit e nuruf witu e loh-loh watu. Ma’anouw tuana eng kewangko’an ni Empung e rimapitla nyi’a witu e nedo nyi’a nu neiy i weela. Karengan ma’anouw tu’u tu kumeas kangkasi, en sena’na eng gio ni Musa en tuana eng katerang, i ka’ayo em beren ne tou-tou Israel e reiy’ tumaang matu’usla nyi’a. Sa em pasempungan i ti’i e meiy ampit eng kewangko’an tuana
8
kumura eng kasa kaselana kasi eng kewangko’an e rumapitla em pasempungan e Roh!
9
Karengan, sa em pasempungan e ma’aka-aka wia em peukuman i ti’i e wangko’, kumura eng kewangko’na kasi em pasempungan e ma’aka-aka witu em paulitan.
10
E nulitna sapa eng ketareanna linoo’ola wangko’, sa i pememange’anla ampit eng kewangko’an e maatasla e reiy’ sa mina’asa wo’o sapa i yi’i, eng kasa reiy’ sipenoron.
11
Karengan, sa eng keas i ti’i e rinapitla ampit eng kewangko’an, o weta’ eng kalebena kasi e reiy’ keas i ti’i e rinapitla eng kewangko’an.
12
Karengan nikeiy keiy makapunya paarapen tuana, takar keiy kime’ang wuta ampit eng kaberanian,
13
e reiy’ tanu si Musa, si timutuwla eng giona, rio em beren ne tou-tou Israel te’a lumoo’ eng kineleliongna en sena’ eng kasuatan i te ni’itu.
14
Ta’an eng genang nea e mina sumpulouw, karengan i ka’ayomi wia e nendo i yi’i en tetutuw i ti’i e minena-ena’ timutuwla nisea, sa sea maca en teta’aran ure i ti’i reiy’ ampit neiy i welarla, karengan si Kristus i te si toro melarla nyi’a.
15
Awes tare i ka’ayomi wia e nendo i yi’i, susur sea maca eng kaol ni Musa, wawean kekelung en timutuwla e nate nea.
16
Ta’an sakawisa e nate niesa tou e minurikitla wia si Empung, takar eng kekelung i ti’i e nedoni waki nisia.
17
Karengan si Tuhan nyi’a mouw si Roh; wo wisa em bawean e Roh ni Empung, witu em bawean kamerdeka’an.
18
Wo nikita nu waya kita mapaseremingla eng kewangko’an ni Tuhan ampit eng gio reiy’ makakekelung. Wo karengan eng kewangko’an i ti’i eng kine’e eiyna e waki si Tuhan nyi’a mouw e Roh takar nikita ta soupen mamuali mange’an ampit e lumian-Na, witu eng kewangko’an makaselala.