Pasal 2
1
Niaku ku minedo mouw katenggolan witu e nateku, kaa niaku ku reiy’ laa meiy kasi wia nikoo witu e mengasi’.
2
karengan, sa aku sumusala e natemu, seiype’ kasi si toro sumiwo niaku melaya-laya’ ta’an i te nisia si mengasi’ karengan niaku.
3
Wo awes tare ni’itu mouw e maksut en suratku i yi’i, nyi’a mouw rio sa aku meiy, te’a o ku mengasi’ kaa nisea, se lewo’ sa reiy’ sumiwo niaku melaya-laya’. Karengan niaku ku ma’eman en tanume nikouw nu waya, kaa e mepa’a-pa’arku nyi’a mouw kangkasi e mepa’a-pa’ar miouw.
4
Niaku ku minatik wia nikouw ampit e nate kasa kimori’ wo en se’esek wo ampit en timiisla kelaker lue’, reiy’ o rio kouw mete’u kumura eng kaselana e nupusku wia nikouw nu waya.
5
Ta’an sa wawean tou si kimarenganla eng kasusa’an, takar e reiy’ e nateku en sinusanala, ta’an i te e nate miouw nu waya, ka’apa satorona wona’ – rio te’a ku melebe-lebela –, e nate ne pirala tou witu e nelet miouw.
6
Wia sitou tuana nawesouw en togoran ne esa nga weteng wangko’ waki nikouw,
7
i ka’ayo eng kapurikitna kouw lewo’ sa reiy’ ma’ampungela wo mibor nisia, rio sia te’a mapuneng kaa eng kasusa’anna e limantouw eng kawuter.
8
Karengan e ni’itu niaku ku ngume’enge’la nikouw, rio kouw uli-ulit meupusla nisia.
9
Karengan awes tare ni’itu mouw e maksutna niaku ku minatikla en surat wia nikouw, nyi’a i ti’i kaa laa ma’awa’ nikouw, sapa ku’a re’en kouw lale’ witu e reiy’ sa mina’asa wo’o sapa.
10
Karengan seiy i te si ampungan niouwla eng kaselokanna, niaku ku mampungela nyi’a kangkasi. Karengan sa aku mampungela, – sa wona’na wawean si lewo’ sa reiy’ ampungangkula –, takar eng kapualitan i ti’i en siniwoku karengan nikouw kouw witu en sinaru ni Kristus,
11
rio si Iblis si te’a maka’ato kamang witu nikita, karengan nikita ta mete’u sapa e maksutna.
Kakori’an wo eng kapenasan ni Paulus waki Troas wo waki Makedonia
12
12 Eng katoroan niaku nu i ka’ayola waki Troas kaa laa ma’abarla e Injil ni Kristus, niaku ku minatola, kaa si Tuhan si minuka’ mola lalan i wee em papa’ayangen maname.
13
13 Ta’an e nateku e mengori-ngori’, karengan niaku ku reiy’ limalesla si patuariku Titus. Karengan e ni’itu niaku ku limila’ mola wo mae waki Makedonia.
14
Ta’an syukur wia si Empung, witu si Kristus si reiy’ maena-ena’ maali nikeiy witu e lalan eng kamang-Na. Ampit e nieletan neiy Nisia si minu’uwurla em bouna em pinakisine’uala Nisia waki wisa i te.
15
Karengan i wee si Empung nikeiy nyi’a mouw keiy wouna le’os waki si Kristus witu eng keuneran nea nu linawirla wo witu e nelet nea se minapuneng.
16
I wee eng kasa kesampetan nikeiy nyi’a mouw keiy wouna em patean mekepaten wo i wee si kasa ketare e wouna em patou-touan makatoun. Ta’an seiy ku’a re’en si makawoo sumampetla e lukar tuana?
17
Karengan nikeiy keiy reiy’ masuat ampit se kelakeran tou walina se masero eng kamang witu e nuwu’ ni Empung. Eng kapurikitna witu si Kristus nikeiy keiy masusuiy kumura e lewo’ sa reiy’na ampit e maksut-maksut lenas witu em perenta ni Empung wo witu en sinaru-Na.