Pasal 1
Tabea
1
Waki si Paulus, kaa eng kepa’aran ni Empung si minamuali rasul ni Kristus Yesus, wo waki si Timotius patuari ta, i wee se jema’at ni Empung waki Korintus ampit em baya ne tou kudus waki e minapekasa Akhaya.
2
E nupus karunia wo e le’os eng kale’osan waki si Empung, Ama’ ta, wo waki si Tuhan Yesus Kristus e rumapitla nikouw.
En totor syukur
3
Lino’orouw si Empung, Ama’ Tuhan ta Yesus Kristus, Ama’ si wuta en tongkoupusen wo si Empung eng kembu’an e reiy’ sa mina’asa em pangiboran,
4
si meibor nikeiy witu e reiy’ sa mina’asa em peme’itan neiy, i ka’ayo keiy makawoo me’ibor nisea, witu e minegheghioan peme’itan ampit em pangiboran eng kina’atoan neiymi nuesa waki si Empung.
5
Karengan e masuat tanu nikeiy nu minaka’ato weteng e minangaloko-lokon witu em peme’itan ni Kristus, tuanakan kangkasi kaa si Kristus o keiy maka’ato pangiboran e minangaloko-lokon.
6
Sa keiy peme’itan, eng kapualitan i ti’i e minamuali pangiboran wo eng kelawiran niouw; sa keiy iboren, takar eng kapualitan i ti’i nyi’a mouw ni’i wee em pangiboran niouw, i ka’ayo kouw maka’ato kaketeran kaa laa ampit en sabaar peme’itan eng kasusa’an e masuat tanu em pineme’itan neiymi kangkasi.
7
Wo em paarapen neiy witu nikouw nyi’a mouw en te’etep, karengan eng kete’uan neiy, kaa e masuat tanu nikouw nu kimi’it minedo weteng witu eng kasusa’an neiy.
8
Karengan nikeiy keiy pa’ar, ee patuari waya, rio kouw mete’ula witu em peme’itan pine’an neiymi waki Asia Oki’. Em pemesa’anen neiy i tanggongla wia nikeiy nyi’a mouw en tuana eng kasela wo en tuana eng kawuter, i ka’ayo keiy kina’apuanouw arapan kangkasi witu em patou-touan neiy.
9
Awes tare nikeiy keiy mapedam, tanu mokan keiy wineeanouw ukuman paten. Ta’an eng kapualitan i ti’i e minamuali, rio keiy te’a meela kapa’emanan witu en tou meiy nuesa, ta’an wia i te si Empung si timo’ori se tou-tou minate.
10
Waki em patean tuana mekeide’en Nisia si limawiromi wo laa lumawirla nikeiy: wia-Nisia keiy meela em paarapen neiy, kaa Nisia si laa lumawirla nikeiy kasi,
11
karengan nikouw kangkasi kouw kimi’it simawang simombayangla nikeiy, rio laker se tou matotor syukur witu eng karunia kina’atoan neiyla kaa eng kelakerna en sombayang nea i wee nikeiy.
Peroba’an witu en tetiro’an ni Paulus
12
Nyi’i mouw e neiy meiy i sawa’la, nyi’a i ti’i kaa en totor e nate meiy e minee kasairian wia nikeiy, kaa em patou-touan neiy wia eng kaoatan i yi’i, e wuntulna witu em paato-atoan neiy ampit nikouw, eng kinuwasa’ala eng kauli-ulitan wo eng kalenasan waki si Empung e reiy’ kaa en sama’ eng kaoatan, ta’an kaa eng kaente’an e nupus karunia ni Empung.
13
Karengan nikeiy keiy minatik i tela wia nikouw sapa en toro wacan niouw wo i papamangartila. Wo niaku ku maarapla, satorona kouw laa mangartila nyi’a uli-ulit,
14
tanu e neiy miouw mouw i papamangartila esa nga wetengna waki nikeiy, nyi’a i ti’i kaa witu e nendo ni Tuhan Yesus nikouw kouw laa sumawa’ witu nikeiy tanu nikeiy kangkasi keiy laa sumawa’ witu nikouw.
15
Timo’otolela witu eng kapa’emanan i yi’i niaku ku mekasa mouw minetetiro’la kaa laa melelalese’ nikouw e rerior, rio kouw toro sumungkul e nupus karunia i wee eng karuana.
16
Eng kamurian niaku ku pa’ar mapawee-weela em pakela-kelangangku mea waki Makedonia, laa o waki Makedonia ku marengi kasi wia nikouw, rio kouw male’ niaku witu em pakela-kelangangku mea waki Yudea.
17
Ni’itu mouw, sapa ku’a re’en niaku ku mawinta’ waya’an i te witu e metetiro’la eng kapualitan i yi’i? Ka’apa sapa ku’a re’en niaku ku simiwo en tetiro’an i ti’i neiy i ki’it eng kepa’arangku nuesa, i ka’ayo wia niaku e makarengan kina’atoan “iyon“ wo “e reiy”?
18
Kaa si Empung e lale’, en ta’ar meiy wia nikouw e reiy’ makarengan “iyon” wo “e reiy”.
19
Karengan si Yesus Kristus, Oki’ ni Empung, si neiy mouw i abar meiyla witu eng keuneran niouw, nyi’a i ti’i kaa niaku wo kaa ni Silwanus wo ni Timotius, e reiy’ kaa “iyon” wo “e reiy”, ta’an eng kapurikitna witu Nisia e wawean i te “iyon”.
20
Karengan si Kristus nyi’a mouw si “iyon” i wee em baya en ta’ar ni Empung. Ni’itu mouw eng karenganna kaa Nisia kita lumila’la “Amin” kaa laa mewewangko’la si Empung.
21
Karengan Nisia si time’etepola nikeiy mewali-wali ampit nikouw witu si Kristus, nyi’a mouw si Empung si minisu’ mola,
22
mewewa’ilela eng kowa’ kapunya’an-Na wia nikita wo si mineela e Roh Kudus witu eng gorem e nate ta tanume e neram witu em baya en tiniro’ mola i wee nikita.
23
Ta’an niaku ku kimeret si Empung tanume si sairiku – Nisia si sumine’u niaku –, kaa eng karenganna niaku ku reiy’ mineiy waki Korintus nyi’a mouw kaa laa mo’upusla nikouw.
24
E reiy’ karengan keiy pa’ar mepeperentala sapa e lewo’ sa reiy’ emanen niouwla, karengan nikouw kouw rimedeiy te’etep witu e nemanmu. Eng kapurikitna, nikeiy keiy pa’ar kumi’it ma’ayang i wee e mepa’a-pa’armu.