Pasal 9
Hak wo eng kalewo’sareiy’an ne rasul
1
E reiy’ ku’a re’en niaku ku rasul? Reiy ku’a re’en niaku ku tou waya’an i te? Reiy’ ku’a re’en niaku ku limoo’o mouw si Yesus, Tuhan ta? E reiy’ ku’a re’en nikouw mouw si wu’ana em pepa’ayangengku wia si Tuhan?
2
Ma’anouw tu’u wia se tou walina niaku ku reiy’ rasul, ta’an wia nikouw niaku mouw si rasul. Karengan em patou-touannu witu si Tuhan nyi’a mouw e wa’il eng kerasulangku.
3
Nyi’i mouw e rerapitangku witu nisea se mapero niaku.
4
Reiy’ ku’a re’en nikeiy keiy makapunya hak kaa laa kumaan wo kumoo’?
5
reiy’ ku’a re’en nikeiy keiy makapunya hak kaa laa maali siesa tu’awewene Kristen, witu em pakela-kelangan neiy, tanu en tinuanala ne rasul-rasul walina wo se patuari-patuari ni Tuhan wo ni Kefas?
6
Ka’apa niaku i te wo si Barnabas ku’a re’en si reiy’ makapunya hak kaa laa i wayami waki pepa’ayangen e lawas?
7
Seiy ku’a re’en si mekasa mouw kumi’it witu em paseke’an witu e nongkosna nuesa? Seiy ku’a re’en si timanemla witu e numa anggor wo si reiy’ kimaan em bu’ana? Ka’apa seiy ku’a re’en si rimawirla se kawang ne domba wo si reiy’ kimoo’ en susu ne domba i ti’i?
8
Sapa e neiyku i lila’la i yi’i e reiy’ kaa eng genang ni tou i te. E reiy’ ku’a re’en e nukum Torat kangkasi e mengila-ngila’ en tuana?
9
Karengan witu e nukum ni Musa wawean neiy i kepatik: “Te’a mouw koo metetongko’esemla en suma ni sapi si kasuatan meirik!” Sapi ku’a re’en si paweean ghenangla ni Empung?
10
Ka’apa nikita mouw ta i pemaksut-Nala? Iyon, i wee nikita mouw eng kapualitan i yi’i neiy i patik, nyi’a i ti’i si mememajeko si lewo’ sa reiy’ majeko witu em paarapan wo si mememuus si lewo’ sa reiy’ muus witu em paarapan kaa laa maka’ato em betengna.
11
Ni’itu mouw, sa keiy kimerorola en tanemen rohani i wee nikouw, talebe-lebe mouw ku’a re’en, sa keiy mupu’mi em bua’na eng kaoatan waki nikouw?
12
Sa se tou walina se makapunya hak kaa laa ma’arapi eng kapualitan i ti’i waki nikouw, e reiy’ ku’a re’en nikeiy keiy makapunyala hak lebe wangko’? Ta’an nikeiy keiy reiy’ minepeka’arala eng hak i ti’i. Eng kapurikitna, nikeiy keiy timanggong e reiy’ sa mina’asa wo’o sapa, rio te’a keiy sumiwola paape’ witu em paabaran e Injil ni Kristus.
13
Reiy’ mete’u ku’a re’en nikouw kaa nisea se masempungla witu en tampa kudus se maka’ato em patou-touanna waki tampa kudus i ti’i wo kaa nisea se masempungla e mezbah, se maka’ato e weteng nea witu e mezbah i ti’i?
14
Tuanakan kangkasi si Tuhan si timantu mola, kaa nisea se minabarola e Injil, se lewo’ sa reiy’ tumou waki paabaran e Injil i ti’i.
15
Ta’an niaku ku reiy’ ma’an mekasa mepeka’arala e nesa tu’u witu eng hak-hak i ti’i. Niaku ku reiy’ minatik em baya nyi’a i yi’i, rio aku tu’u ku patuananla kangkasi tuana. Karengan niaku ku lebe pa’ar mate ta’an i te….! Uli-ulit, eng kesawa’angku e reiy’ mete’u re’inla ni seiy i te tu’u kangkasi!
16
Karengan sa aku maabarla e Injil, niaku ku reiy’ makapunya to’otolan kaa laa mesesawa’la en tou. Karengan e ni’itu nyi’a mouw eng kalewo’sareiy’an i wee niaku. Cilaka mouw niaku, sa aku reiy’ mabarla e Injil.
17
Sa andeiyna niaku matuanala nyi’a i ki’it eng kepa’arangku nuesa, memang niaku ku mekehak maka’ato tetoro. Ta’an eng karengan niaku ku timuanala nyi’a reiy’ kimi’it eng kepa’arangku nuesa, em paabaran i ti’i nyi’a mouw e lukar petetuana’an e neiy i tanggongla wia niaku.
18
Sa tuana sapa ku’a re’en en tetoroku? En tetoroku nyi’a mouw e nyi’i: kaa niaku ku toro maabarla e Injil ma’an e reiy’ sitetoro, wo kaa niaku ku reiy’ mepeka’arala eng hakku tanume si mengengabar e Injil.
19
Ma’anouw tu’u aku waya’an i te witu em baya ne tou, niaku ku simiwola en touku hamba waki em baya ne tou, rio aku toro kumamangla esa nga kelaker wona’na tou.
20
Tuana mouw wia se tou Yahudi niaku ku minamuali tanu se tou Yahudi, rio aku kumamangla se tou-tou Yahudi. Wia se tou-tou matou-tou witu em bawa’ e nukum Torat, ma’anouw tu’u niaku nuesa ku reiy’ matou-tou witu em bawa’ e nukum Torat, rio aku toro kumamangla nisea se matou-tou witu em bawa’ e nukum Torat.
21
I wee se tou-tou reiy’ matou-tou witu em bawa’ e nukum Torat niaku ku minamuali tanu se tou-tou reiy’ matou-tou witu em bawa’ e nukum Torat, ma’anouw tu’u aku reiy’ matou-tou witu e luar e nukum ni Empung, karengan niaku ku matou-tou witu em bawa’ e nukum ni Kristus, rio aku toro kumamangla nisea se reiy’ matou-tou witu em bawa’ e nukum Torat.
22
I wee se tou-tou lewea’ niaku ku minamuali tanu se tou lewea’, rio aku toro lumawirla nisea nu lewea’. I wee em baya ne tou niaku ku minamuali em baya-wayana, rio aku satorona wona’ ku kumamangla se pirala tou witu nelet nea.
23
E reiy’ sa mina’asa wo’o sapa i yi’i en tinuanakula karengan e Injil, rio ku maka’ato weteng witu nyi’a.
24
Reiy’ mete’u ku’a re’en nikouw kaa witu em papa’ayangan palowa’an em baya ne kimi’it se maki’it matingkas, ta’an laa siesa tou i te si minaka’ato tetaber? Karengan e ni’itu tumingkasouw tuana rupa, i ka’ayo kouw maka’atola nyi’a!
25
Susur tou si minedo weteng witu em palowa’an, si kimuwasala en touna witu e reiy’ sa mina’asa kapualitan. Nisea se simiwo en tuana kaa laa maka’ato esa mahkota laa mare’i, ta’an nikita ta laa maka’ato esa mahkota ke’ekel.
26
Karengan e ni’itu niaku ku reiy’ matingkas kaa e reiy’la pelelaa’an wo niaku ku reiy’ kumekunteiy waya’an i te mawewe.
27
Ta’an niaku ku limati e nouwakeku wo kimuwasala em baya nyi’a, rio nu reiy’ mouw e minabarla Injil wia se tou walina, te’a niaku nuesa ku i sede’.