¹ Niaku ku pa’ar, rio kouw mete’ula, ee patuari waya, kaa se nene moyang ta nu waya se witu em bawa’ en tinerungan e linaak wo kaa nisea nu waya se limeasome en tasik. ² Kaa laa mamuali maki’i-ki’it si Musa nisea nu waya se binaptisola witu e linaak wo witu en tasik. ³ Nisea nu waya se kimaan eng kekaanen rohani e masuat ⁴ wo nisea nu waya se kimoo’ eng kekoo’on rohani e masuat, karengan nisea se kimoo’mi waki watu ruso rohani e maki’itla nisea, wo em batu ruso i ti’i nyi’a mouw si Kristus. ⁵ Ta’an ma’anouw tu’u tuana si Empung si reiy’ mepa’ar wia em beteng kasa sela waki nisea, karengan nisea se pinatela waki patar kaerisan. ⁶ Em baya nyi’a i yi’i e minamuali mola tanume em pa’asa-asaran i wee nikita kaa laa mapange’enge’la nikita, rio te’a kita mepa’arla eng kapualitan-kapualitan e lewo’ tanu en siniwo nea mola, ⁷ wo rio te’a kita mamuali sumesempe-sumesempe em paepungen, masuat tanu se pirala tou wia nisea, tanu wawean neiy i kepatik: “Takar rumuberouw se bangsa i ti’i kaa laa kumaan wo kumoo’; eng kamurian tumo’orouw sea wo melaya-laya’.” ⁸ Te’a mouw kita matuanala em pesa’amekan, tanu em patuananla ne pirala tou wia nisea, i ka’ayo witu e nendo mekasa se minate mola se rua nga pulu’ o telu nga riwu tou. ⁹ Wo te’a mouw kita mewewa’awa’la si Tuhan, tanu em patuananla ne pirala tou wia nisea, i ka’ayo sea minate kinulat ni leloiy’. ¹⁰ Wo te’a mouw mengu’ungu-ngu’ungul, tanu em patuananla ne pirala tou wia nisea, i ka’ayo sea pinunengla ni malaikat em patean. ¹¹ Em baya nyi’a i yi’i en timoro mola nisea tanume em pa’asa-asaran wo neiy i patikla kaa laa mamuali ngenge’enge’ wia nikita nu matou-tou witu e nedo, wisa en zaman kesampetan e mina’ayo mouw. ¹² Karengan e ni’tu seiy si mapokeiyla, kaa nisia si te’etep rimedeiy, maato-ato mouw rio sia reiy’ i ka’anu! ¹³ Em pewa’awa’an-pewa’awa’an em pine’an niouwla nyi’a mouw em pewa’awa’an-pewa’awa’an karengan, e reiy’ limantouwla eng kaente’an ni tou. Karengan si Empung si lale’ wo karengan e ni’itu Nisia si reiy’ laa mayala nikouw wa’awa’an e lumantouwla eng kaente’annu. Witu e nedo nikouw nu wa’awa’an Nisia si laa meela wia nikoo e lalan merero’ula, i ka’ayo kouw toro tumanggong nyi’a. ¹⁴ Karengan e ni’itu, ee patuariku waya i koupus, wa’akatenola em pasempean paepungen! ¹⁵ Niaku ku mesesusuiy wia nikoo tanu se tou-tou sama’, Pemili-milingenola nuesa sapa e neiyku i lila’la! ¹⁶ Reiy’ ku’a re’en eng kower patotoran syukur, witu nyi’a kita matotorla syukur, nyi’a mouw em paasa-asa’an ampit e raa’ ni Kristus? Reiy’ ku’a re’en e roti pinemete-mete’ tala nyi’a mouw em paasa-asa’an ampit e nouwak ni Kristus? ¹⁷ Karengan e roti nyi’a mouw e nesa, takar nikita, ma’anouw tu’u kita laker, ta esa nouwak, karengan nikita nu waya ta minaka’ato weteng witu e roti esa i ti’i. ¹⁸ Weeanola ghenang se bangsa Israel i ki’it e le’ona: reiy’ ku’a re’en nisea se kimaan sapa e neiy i sempe’la ne minaka’ato weteng witu em pasempungan e mezbah? ¹⁹ Sapa ku’a re’en ni’i pemaksutkula ampit e lelila’an i ti’i? Kaa en sesempe paepungen nyi’a mouw e wo’o sapa? ²⁰ E reiy! Sapa neiy i maksutkula nyi’a mouw, kaa en sesempe nea nyi’a mouw en sesempe wia se roh-roh lewo’, e reiy’ wia si Empung. Wo niaku ku so’o, kaa nikouw kouw maasa’an ampit se roh-roh lewo’. ²¹ Nikouw kouw reiy’ mete’u kumoo’ witu eng kower ni Tuhan wo kangkasi witu eng kower ne roh-roh lewo’. Nikouw kouw reiy’ mete’u maka’ato weteng witu em pesakeiyan ni Tuhan wo kangkasi witu em pesakeiyan ne roh-roh lewo’. ²² Ka’apa pa’ar ku’a re’en kita meteto’ori en tetayuren ni Tuhan? Sapa ku’a re’en nikita ta lebe ente’ ta’an Nisia? ²³ “E reiy’ sa mina’asa wo’o sapa ni’i pangintorola.” E nulit, ta’an en deiy’ e reiy’ sa mina’asa wo’o sapa makaka’ara’an. “E reiy’ sa mina’asa wo’o sapa ni’i pangintorola.” E nulit, ta’an en deiy’ e reiy’ sa mina’as wo’o sapa mebangun. ²⁴ Te’a siesa tou tu’u si masero eng kamangna nuesa, ta’an satorona susur tou si sumero eng kamang ne tou walina. ²⁵ Nikouw kouw toro kumaan e reiy’ sa mina’asa wo’o sapa ni’i pewangker waki pewangkeran e le’ona, e reiy’ ampit sumiwola pasoisapan karengan em peroan-peroan e nate nurani. ²⁶ Karengan: “Em bumi ma’an e reiy’ sa mina’asa em pumpunena nyi’a mouw eng kapunya’an ni Tuhan.” ²⁷ Sa koo nieri’ kumaan niesa tou reiy’ ma’eman, wo e neri’an i ti’i en sinungkulmu, kumaanouw sapa i te neiy i akirla wia nikoo, e reiy’ sumoisapla karengan em peroan-peroan e nate. ²⁸ Ta’an sa siesa tou lumila’ wia nikoo: “Ni’itu en sesempe paepungen!” Te’a mouw koo mekekaan nyi’a, karengan nisia si limila’la eng kapualitan i ti’i wia nikoo wo eng karengan em peroan-peroan e nate. ²⁹ Em pemaksutkula ampit em peroan-peroan e reiy’ mouw em peroan-peroan e nate le’osmu nuesa, ta’an em peroan-peroan e nate le’os ne tou walina i ti’i. Wo’o wona’na wawean tou se meila’: “Ka’a eng kewaya’angku i te e lewo’ sa reiy’ i tantula em peroan-peroan e nate nurani ne tou walina? ³⁰ Sa aku matotor syukur witu en sapa e niaku kimi’it kimaan nyi’a, ka’a se tou se meila’ e lewo’ en tanume niaku karengan eng kekaanen, e witu nyi’a aku matotor syukur?” ³¹ Niaku ku miningkot: Sa koo kumaan ka’apa sa koo kumoo’, ka’apa sa koo matuanala e wo’o sapa walina, tuananola em baya nyi’a i ti’i i wee eng kewangko’an ni Empung. ³² Te’a mouw koo melelentutla em papokeiy witu e nate ni tou, le’os se tou Yahudi ka’apa se tou Yunani ka’apa tu’u se jema’at ni Empung. ³³ Masuat tanu niaku kangkasi ku me’inakut mesesenaangla e nate em baya ne tou witu e reiy’ sa mina’asa kapualitan, e reiy’ i wee em pe’uku-ukumen en touku, ta’an i wee em pe’uku-ukumen ne tou kelaker, rio sea toro melawir.