Pasal 11
1
Mamuali mouw maki’i-ki’it niaku, masuat tanu niaku kangkasi ku minamuali maki’i-ki’it si Kristus.
Lelo’or eng kokong ni wewene
2
Niaku ku lewo’ sa reiy’ lumo’or nikouw, karengan witu e reiy’ sa mina’asa wo’o sapa nikouw kouw minena-ena’ maghenang niaku wo te’etep timiboiy witu en teturu’ neiy i papawee-weekula wia nikoo.
3
Ta’an niaku ku pa’ar, rio kouw mete’ula eng kapualitan i yi’i, nyi’a i ti’i eng Kokong waki ne susur tuama nyi’a mouw si Kristus, eng kokong ne susur wewene nyi’a mouw si tuama, wo eng Kokong ni Kristus nyi’a mouw si Empung.
4
Susur tuama si masombayang ka’apa mawenti’ ampit eng kokong makapeporong, si masero’ eng kokongna.
5
Ta’an susur wewene se masombayang ka’apa mawenti’ ampit eng kokong reiy’ pinorongan, si masero’ eng kokongna, karengan nisia si masuat ampit si wewene sinukur em bu’ukna.
6
Karengan sa si wewene si reiy’ pa’ar mepeporongla eng kokongna, takar e lewo’ sa reiy’ mouw nisia kangkasi si kumunting em bu’ukna. Ta’an sa i wee se wewene nyi’a mouw em pasero’an, kaa em bu’ukna eng kinunting ka’apa sinukur, takar e lewo’ sa reiy’ mouw sia maporongla eng kokongna.
7
Karengan si tuama si reiy’ mepadung maporongla eng kokokongna: nisia si masena’la e lumian wo eng kewangko’an ni Empung. Ta’an si wewene si masena’la eng kewangko’an ni tuama.
8
Karengan si tuama si reiy’ asal waki si wewene, ta’an si wewene si asal waki si tuama.
9
Wo si tuama si reiy’ siniwola karengan si wewene, ta’an si wewene si siniwola karengan si tuama.
10
Karengan e ni’itu, si wewene si lewo’ sa reiy’, make eng kowa’ wewinta’an witu eng kokongna karengan em baya ne malaikat.
11
Ma’anouw tuana, witu si Tuhan e reiy’la si wewene sa reiy’ ampit si tuama wo e reiy’la si tuama sa reiy’ ampit si wewene.
12
Karengan e masuat tanu si wewene si asal waki si tuama, tuanakan kangkasi si tuama si’i patoumi ni wewene; wo e reiy’ sa mina’asa wo’o sapa e nasal waki si Empung.
13
Pemili-milingenola nuesa: Waar ku’a re’en si wewene masombayang wia si Empung ampit eng kokong reiy’ pinorongan?
14
Reiy’ ku’a re’en e nalam nuesa e minapaloo’o-loo’ola wia nikoo, kaa nyi’a mouw eng kasero’an i wee si tuama, sa sia makawu’uk labot,
15
ta’an kaa nyi’a mouw eng kasighi’an wia si wewene, sa sia makawu’uk e labot? Karengan em bu’uk e neiy i weela wia si wewene kaa laa mamuali paporong.
16
Ta’an sa wawean tou si pa’ar mepepero, nikeiy ka’apa tu’u se jema’at-jema’at ni Empung keiy reiy’ makapunya eng kenaramen tuana.
Eng kenaramen-kenaramen selok witu em pesakeiyan wengi
17
Witu e natoran-natoran tumodongla niaku ku reiy’ mete’u lumo’or nikouw, karengan em pinasungkulan-pinasungkulannu e reiy’ minapa’eiymi eng kale’osan, ta’an e minapa’eiymi eng kawurukan.
18
Karengan eng ketare-tare niaku ku liminga, kaa sakawisa kouw merur tanume se jema’at, wawean pineta’atasan witu e nelet miouw, wo eng kapualitan i ti’i e wo’o wona’na niaku ku ma’eman.
19
Karengan witu e nelet miouw kouw lewo’ sa reiy’ wawean peta’atasan rio pakaloo’o-loo’ola ee sangali seiy ku’a re’en si witu e nelet miouw si taang wa’awa’an.
20
Sakawisa kouw merur kouw reiy’ mouw merur kaa laa mekekaan en sesakeiyan ni Tuhan.
21
Karengan witu en sesakeiyan i ti’i susur tou si kumaane’la rerior eng kumaanna nuesa, i ka’ayo siesa si maarem wo se walina se tinoek.
22
Sapa ku’a re’en kouw reiy’ siwale nuesa kaa laa kumaan wo kumoo’? Ka’apa pa’ar ku’a re’en koo mesesero’la se jema’at ni Empung wo mepeirangla se tou-tou reiy’ sisapa-sapa? Sapa ku’a re’en e neiyku i lila’la wia nikouw? E lumo’or nikouw? Witu eng kapualitan i yi’i niaku ku reiy’ malo’or.
23
Karengan sapa e neiy mouw i papawee-weekula wia nikoo, eng kina’atoangkumi waki si Tuhan, nyi’a i ti’i kaa si Tuhan Yesus, witu em bengi e nedo Nisia nu neiy’ i sarakan, si minedo roti
24
wo nu reiy’ mouw i tu Sia tumotor syukur witu nyi’a; Sia mengebi-ngebi’la nyi’a wo lumila’: “Nyi’i mouw e nouwak-Ku, neiy i sarakan i wee nikouw; siwonouw nyi’i mamuali paghenangan Niaku!”
25
Tuanakan kangkasi Sia nu minedo eng kower, ni’itu nu kimaanola, laa o lumila’: “Eng kower i yi’i nyi’a mouw en teta’aran weru wina’ilela en daa’-Ku; siwonouw e nyi’i, susur kouw kumoo’ nyi’a, e mamuali paghenangan Niaku!”
26
Karengan susur kouw nu kumaan e roti i yi’i wo kumoo’ eng kower i yi’i, nikouw kouw maabarla em pinatean ni Tuhan i ka’ayo Sia meiy.
27
Ni’itu mouw seiy i te ampit eng kenaramen e reiy’ waar kumaan e roti ka’apa kumoo’ eng kower ni Tuhan, nisia si makadosa witu e nouwak wo en daa’ ni Tuhan.
28
Karengan e ni’itu satorona susur tou si ma’awa’ en touna nuesa wo nu reiy’ mouw i tu sia kumaan roti wo kumoo’omi waki kower i ti’i.
29
Karengan seiy i te si kumaan wo kumoo’ reiy’ ampit e maakula e nouwak ni Tuhan, nisia si mapa’eiy e nukuman witu en touna.
30
Karengan e ni’itu laker se witu e nelet miouw se lewea’ wo rara’an, wo se reiy’ toyo’ se timayan.
31
Sa kita ma’awa’ en tou ta nuesa, e nukuman e reiy’ laa tumoro nikita.
32
Ta’an sa kita maka’ato ukuman waki si Tuhan, kita tinuru’, rio kita reiy’ laa ukumen mewali-wali ampit eng kaoatan.
33
Karengan e ni’itu, patuariku waya, sa kouw ma’erur kaa laa kumaan, pa’ena’annu mola siesa laa se walina.
34
Sa wawean se maarem, le’osouw sia kumaane’la rior witu em balena, rio kouw te’a merur kaa laa ukumen. Eng kapualitan-kapualitan walina e neiy ku tu’utulen, sa aku meiy.