Pasal 12
Minegheghioan karunia, ta’an esa Roh
1
Teakan en tanume eng karunia-karunia e Roh, Niaku ku pa’ar, patuari waya, rio kouw mete’ula eng kaulitanna.
2
Nikouw kouw mete’u, kaa witu e nedo nikouw nu reiy’pe’ makasine’u si Empung, nikouw kouw reiy’ ampit e ghimenang kouw kineong witu em paepungen-paepungen wowo’.
3
Karengan e ni’itu niaku ku pa’ar maki emanla nikouw, kaa e reiy’la siesa tou tu’u si mengila-ngila’ karengan e Roh ni Empung, si toro lumila’: “I kakutokola si Yesus!” wo e reiy’la siesa tou tu’u, si toro maaku: “Yesus nyi’a mouw si Tuhan”, e reiy’ siwalina karengan e Roh Kudus.
4
Wawean e minegheghioan karunia, ta’an esa Roh.
5
Wo wawean e minegheghioan pasempungan ta’an esa Tuhan.
6
Wo wawean e minegheghioan pasiwo-siwon maka’erangen, ta’an si Empung nyi’a mouw si esa si mina’ayangla em baya nyi’a witu em baya ne tou.
7
Ta’an wia se susur tou kinaruniala em pinapaloo-loo’an e Roh i wee em pe’uku-ukumen mewali-wali.
8
Karengan wia siesa tou e Roh e mineela karunia kaa laa melila-lila’ ampit eng hikmat, wo wia se walina e Roh masuat e mineela karunia melila-lila’ ampit en tine’u.
9
Wia siesa tou e Roh masuat e mineela eman, wo wia se walina Nisia si mineela karunia kaa laa melele’osla.
10
Wia siesa tou e Roh e mineela kuwasa kaa laa sumiwola e maka’erangen, wo wia se walina Nisia si mineela karunia kaa laa menti’, wo wia se walina kasi Nisia si mineela karunia kaa laa mememange’anla e minegheghioan roh. Wia siesa tou Nisia si mineela karunia kaa laa melila-lila’ ampit em baasa roh, wo wia se walina Nisia si mineela karunia kaa laa mapaloo’o-loo’ola em baasa roh i ti’i.
11
Ta’an em baya nyi’a i yi’i em pina’ayangla e Roh esa wo masuat, e mineela karunia wia se susur tou esa nga kenaramen wuntul, tanu neiy i kepa’ar-Nala.
Laker weteng, ta’an esa nouwak
12
Karengan masuat tanu e nouwak i ti’i e nesa wo em beteng-wetengna eng kelaker, wo e reiy’ sa mina’asa em beteng i ti’i, ma’anouw tu’u tu laker, en tanula e nesa nouwak, tuanakan kangkasi si Kristus.
13
Karengan nikita nu waya ta witu e nesa Roh, le’os se tou Yahudi, ka’apa tu’u se tou Yunani, le’os se ata, ka’apa tu’u se tou merdeka, se binaptisouw minamuali esa nouwak wo nikita nu waya ta wineean kumoo’ witu e nesa Roh.
14
14 Karengan e nouwak kangkasi e reiy’ neiy i karedeiyi witu e nesa weteng, ta’an witu eng kelaker weteng.
15
15 Sa wona’na e ne’a e lumila’la: “Karengan niaku ku reiy’ lawas, niaku ku reiy’ neiy i kaghorem e nouwak?
16
Wo sa wona’na en talinga e lumila’: “Karengan niaku ku reiy’ weren, niaku ku reiy’ neiy i kaghorem e nouwak”, ni’itu mouw ulit ku’a re’en nisia si reiy’ neiy i kaghorem e nouwak?
17
17 Sa wona’na e nouwak e minapekasana em beren, witu e wisa ku’a re’en e lelinga? Sa wona’na e minapekasana en talinga, witu e wisa ku’a re’en en sesengut?
18
Ta’an si Empung si minee mola wia se weteng, siesa o siesa eng kenaramen wuntul, esa tampa witu e nouwak, tanu e neiy i kepa’ar-Nala.
19
Sa wona’na em baya nyi’a e nesa weteng, witu e wisa ku’a re’en e nouwak?
20
Memang e wawean kelaker weteng, ta’an e nesa i te e nouwak.
21
Ni’itu mouw em beren e reiy’ mete’u lumila’ wia si lawas: “Niaku ku reiy’ mepadungla nikoo.” Wo eng kokong e reiy’ mete’u lumila’ wia si ne’a: “Niaku ku reiy’ mepadungla nikoo.”
22
Awes tare se weteng-weteng e nouwak se paloo’ola kasa lewea’, se kasa pemandungen.
23
Wo wia se weteng-weteng e nouwak i ki’it em paloo’antala e reiy’ kasa pasighi’in, kita meela sesighi’an wuntul. Wo witu em beteng-weteng ta e reiy’ wangun, kita meela gheghenang wuntul.
24
Eng kapualitan i ti’i e reiy’ pemandungen em beteng-weteng ta kewangun. Empung si rimansunola e nouwak ta tuana rupa, i ka’ayo wia se weteng-weteng e reiy’ wangko’ se wineean en sesighi’ wuntul,
25
Rio te’a o mamuali peta’atasan witu e nouwak, ta’an rio se weteng-weteng mange’an i ti’i se meweweeanla ghenang.
26
Karengan e ni’itu sa siesa weteng peme’itan, em baya ne weteng se kumi’it peme’itan; sa siesa weteng si pasighi’in, em baya ne weteng se kumi’it mepa’a-pa’ar.
27
Nikouw nu waya nyi’a mouw e nouwak ni Kristus wo nikouw siesa o siesa nyi’a mouw em betengna.
28
Wo si Empung si timantu mola pira tou witu en Jema’at: kasa ketare-tare si tanume si rasul, karua si tanume si nabi, katelu si tanume si mememee teturu’. Tumodongla nyi’a nisea se minaka’ato karunia kaa laa masiwola e maka’erangen, kaa laa lume’osla, kaa laa masempungla, kaa laa ma’aka-aka, wo kaa laa melila-lila’ witu em baasa roh.
29
Sapa ku’a re’en nisea nu waya se rasul, ka’ap rabi, ka’apa mememee teturu’? Sapa ku’a re’en nisea nu waya se minaka’ato karunia kaa laa mesesiwola e maka’erangen,
30
ka’apa kaa laa melele’osla, ka’apa kaa laa melila-lila’ witu em baasa roh, ka’apa kaa laa mapaloo’o-loo’ola em baasa roh?
31
Ni’itu mouw me’inakutouw kaa laa maka’ato eng karunia-karunia kasa i paketa-ketare. Wo niaku ku tumudu’la wia nikoo e lalan e lebepe’ i paketa-ketare kasi.