Pasal 7
En tanume em pekawengan
1
Wo en teakan en tanume eng kapualitan-kapualitan e neiy miouw i patikla wia niaku. Nyi’a mouw e le’os wia si tuama, sa sia reiy’ kumaweng,
2
ta’an maghenang em bahaya em pasa’amekan, le’osouw susur tuama si makapunya tu’awewenena nuesa wo susur wewene si makapunya tu’atuamana nuesa.
3
Satorona si tu’atuama si mewewutala e lewo’ sa reiy’na wia si tu’awewenena, tuanakan kangkasi si tu’awewene wia si tu’atuamana.
4
Tu’awewene si reiy’ makakuwasa witu e nouwakna nuesa, ta’an i te si tu’atuamana, tuanakan kangkasi si tu’atuamana si reiy’ makakuwasa witu e nouwakna nuesa, ta’an i te si tu’awewenena.
5
Te’a mouw kouw mewewa’akatala, ta’an i te ampit em pinaiyonan mewali i wee eng kasuatan e nedo, rio kouw maka’ato kalempotan kaa laa sumombayang. Nu reiy’ mouw i tu satorona kouw mareng tumou mewali-wali, rio si Iblis si reiy’ mewewilotla nikouw, karengan nikouw kouw reiy’ taang parondo.
6
Eng kapualitan i yi’i ni’i lila’kula wia nikouw tanume eng kapenasan, e reiy’ tanume em perenta.
7
Ma’anouw tuana kumura e le’osna, sa em baya ne tou se tanu niaku; ta’an susur tou si minaka’atomi waki si Empung eng karuniana wuntul, siesa tou eng karunia i yi’i, se walina eng karunia i ti’i.
8
Ta’an wia se tou-tou reiy’ kimaweng wo wia se balu-balu ni’i nge’enge’kula, rio le’osouw sea mena’ witu eng ka’ada’an tanu niaku.
9
Ta’an sa sea reiy’ mete’u kumuwasala en tou, le’osouw sea kumaweng. Karengan e lebe le’os sea kumaweng ta’an i te marengis karengan en serit.
10
Wia se tou-tou kimawengouw niaku ku – e reiy’, e reiy’ niaku, ta’an si Tuhan – minerentala, rio siesa tu’awewene si reiy’ toro tuma’atasla si tu’atuamana.
11
Wo sa wona’na sia meta’atasan, nisia si lewo’ sa reiy’ minena-ena’ tumou e reiy’ situ’atuama ka’apa male’osan ampit si tu’atuamana. Wo siesa tu’atuama si reiy’ toro tuma’atasla si tu’awewenena.
12
Wia se tou-tou walina niaku, e reiy’ si Tuhan, limila’la: sa wawean siesa patuari si makatu’awewenela siesa tou reiy’ maka eman wo siesa wewene i ti’i si pa’ar tumou mewali-wali ampit nisia, te’a mouw si patuari i ti’i meteta’atasla nisia.
13
Wo sa wawean siesa tu’awewene maka tu’atuamala siesa tuama reiy’ maka eman wo si tuama i ti’i si pa’ar tumou mewali-wali ampit nisia, te’a mouw sia meteta’atasla si tuama i ti’i.
14
Karengan si tu’atuama reiy’ maka eman i ti’i si linenasola ni tu’awewenena wo si tu’awewene reiy’ maka eman i ti’i si kinudusola ni tu’atuamana. Sa wona’na e reiy’ tuana, tantu mouw se oki-oki’mu nyi’a mouw se oki’ kewur, ta’an en teakan nisea nyi’a mouw se oki-oki’ kudus.
15
Ta’an sa sitou reiy’ maka eman i ti’i si pa’ar meta’atasan, ma’anouw sia meta’atasan; witu eng kapualitan tuana si kalo ka’apa si karia se reiy’ neiy i kewa’akes. Ta’an si Empung si kimeret nikouw kaa laa tumou witu e le’os eng kale’osan.
16
Karengan kumura mouw ku’a re’en koo mete’ula, heiy tu’awewene, sapa ku’a re’en koo reiy’ laa lumawirla si tu’atuamamu? Ka’apa kumura ku’a re’en koo mete’ula, heiy tu’atuama, sapa ku’a re’en koo reiy’ laa lumawirla si tu’awewenemu?
Tumou witu eng ka’ada’an tanu e nedo kineret ni Empung
17
Tumodongla nyi’a satorona susur tou si minena-ena’ matou-tou tanu e neiy mouw i tantula ni Tuhan wia nisia wo witu eng ka’ada’an tanu e nedo nisia nu kineret ni Empung. Nyi’i mouw eng katataapan neiyku i weela wia em baya ne jema’at.
18
Sa siesa tou si kineret witu eng ka’ada’an maka sunat, te’a mouw sia me’inakut merere’ila eng kowa’-kowa’ en sunat i ti’i. Wo sa siesa tou si kineret witu eng ka’ada’an reiy’ maka sunat, te’a mouw sia pa’ar e maka sunat.
19
Karengan e maka sunat ka’apa e reiy’ maka sunat e reiy’ poongena. Em poongena nyi’a mouw e melale’la e nuku-ukum ni Empung.
20
Le’osouw susur tou si minena’ witu eng ka’ada’an, tanu e nedo nisia nu kineret ni Empung.
21
Sapa ku’a re’en koo hamba e nedo nikoo nu kineret? Ni’itu e reiy’ sapa-sapa! Ta’an sa wona’na koo maka’ato kalempotan kaa laa i wayami, i ka’ara mola eng kalempotan i ti’i.
22
Karengan siesa hamba si kineret ni Tuhan witu em pasempungan-Na, nyi’a mouw sitou waya’an i te, kapunya’an ni Tuhan. Tuanakan kangkasi sitou waya’an i te si kineret ni Kristus, nyi’a mouw si hamba-Na.
23
Nikoo koo tinelesouw wo e nargana e re’epesouw winear. Karengan e ni’itu te’a mouw koo mamuali hamba ni tou.
24
Patuari waya, satorona susur tou si mena’ witu en sinaru ni Empung witu eng ka’ada’an tanu witu e nedo nisia nu kineret.
25
En teakan en tanume em baya ne reraa. I wee nisea niaku ku reiy’ minaka’atomi perenta waki si Tuhan. Ta’an niaku ku meela eng genangku tanume siesa tou si toro emanen karengan e rendem sinungkulnami waki si Empung.
26
Niaku ku maka ghenang, kaa, maghenang e nedo mase’esek en teakan, sapa tare e le’os wia sitou kaa laa minena-ena’ witu eng ka’ada’anna.
27
Sapa ku’a re’en nikoo koo neiy i kewa’akes wia siesa wewene? Te’a mouw koo mememe’inakutla em peta’atasan! Sapa ku’a re’en nikoo koo reiy’ neiy i kewa’akes wia siesa wewene? Te’a mouw koo mesesero siesa tou!
28
Ta’an, sa koo kumaweng, koo reiy’ maka dosa. Wo sa siesa reraa si kumaweng, nisia si reiy’ simiwo en dosa. Ta’an se tou-tou tuana se laa toron eng kasusa’an e nouwak wo niaku ku pa’ar meleliseiyi nikouw waki kasusa’an i ti’i.
29
Patuari waya, nyi’i mouw ni’i pemaksutkula, nyi’a i ti’i: e nedo eng kasa mouw potot! Karengan e ni’itu witu e nedo en timele’upe’ i yi’i se tou-tou maka tu’awewene se lewo’ sa reiy’ ma’asa-asar tanu mokan se reiy’ maka tu’awewene;
30
wo se tou-tou maame’ tanu mokan se reiy’ maame’; wo se tou-tou mepa’a-pa’ar tanu mokan se reiy’ mepa’a-pa’ar; wo se tou-tou timeles tanu mokan se reiy’ makapunya sapa en tineles nea;
31
awes tare se tou-tou mepakela em barang-barang eng kaoatan se tanu mokan kasa reiy’ mepakela nyi’a. Karengan eng kaoatan tanu eng kasine’uan ta en teakan e laa lumangkoiy.
32
Niaku ku pa’ar, rio kouw tumou reiy’ ampit eng kalieiyan. Sitou reiy’la situ’awewene si minakatorola eng ghenangna witu eng kapualitan ni Tuhan, kumura si Tuhan mekepa’aren wia nisia.
33
Sitou makatu’awewene si minapatorola eng genangna witu eng kapualitan eng kaoatan, kumura o sia toro sumenaangla si tu’awewenena,
34
wo ampit en tuana eng genangna e minawete-weteng. Si wewene reiy’ maka tu’atuama wo se oki-oki’ reraa se minapatorola eng genang nea witu eng kapualitan ni Tuhan, rio e nouwak wo e imukur nea eng kudus. Ta’an si wewene maka tu’atuama si minapatorola eng genangna witu eng kapualitan eng kaoatan, kumura o sia toro sumenaangla si tu’atuamana.
35
Em baya nyi’a i yi’i ni’i lila’kula i wee eng kapoongan niouw nuesa, e reiy’ kaa laa mengape-ngape’la nikouw witu eng kewaya’an niouw, ta’an eng kapurikitna rio kouw tumuanala sapa e nulit wo e le’os, wo masempungla si Tuhan reiy’ ampit eng kareungan.
36
Ta’an sa wona’na siesa tou si mapokeiyla, kaa nisia si reiy’ matuanala e waar witu si reraana, sa si reraana i ti’i si minawesouw eng katu’a wo nisia si uli-ulit mapedam, kaa nisea se lewo’ sa reiy’ kumaweng, le’osouw sea kumaweng, sa sia mepa’arla nyi’a. Eng kapualitan i ti’i e reiy’ dosa.
37
Ta’an sa wawean siesa tou, si reiy’ pinupusan kaa laa sumiwo en tuana, si uli-ulit ma’eman witu e natena wo si uli-ulit makuwasala eng kepa’aranna, minedo mola katenggolan kaa laa reiy’ kumaweng ampit si reraana, nisia si simiwo le’os.
38
Ni’itu mouw sitou si kimaweng ampit si reraana si simiwo le’os, wo sitou reiy’ kimaweng ampit si reraana si simiwo e lebe le’os.
39
Tu’awewene si neiy i kewa’akes eng keurean si tu’atuamana nu matou-tou. Sa si tu’atuamana minate mouw, nisia si waya’an i te laa kumaweng ampit si seiy i te si neiy i kepa’arna, asal sitou i ti’i nyi’a mouw siesa tou ma’eman.
40
Ta’an i ki’it eng genangku, nisia si lebe ma’aruiy, sa sia minena-ena’ witu eng ka’ada’anna. Wo niaku ku maka ghenang, kaa niaku kangkasi ku makapunya e Roh ni Empung.