Pasal 6
Masero ka’adilan wia se tou-tou se reiy’ maka’eman
1
Sapa ku’a re’en e wawean siesa tou witu e nelet miouw, sa mesali’isi’an ampit se tou walina, si berani sumero eng ka’adilan wia se tou-tou reiy’ ulit, wo e reiy’ wia se tou-tou kudus?
2
Ka’apa e reiy’ mete’u ku’a re’en nikouw, kaa se tou-tou kudus se laa makimla eng kaoatan? Wo sa em paakiman eng kaoatan em bitu e lawas miouw, e reiy’ ku’a re’en kouw makawoo kaa laa malar eng kapualitan-kapualitan e reiy’ sipenoron?
3
E reiy’ mete’u ku’a re’en nikouw, kaa nikita ta laa ma’akimla se malaikat-malaikat? Ni’itu mouw sapape’ kasi eng kapualitan-kapualitan karengan witu em patou-touan ta susur e nendo.
4
Ma’anouw tu’u tuana, sa kouw lewo’ sa reiy’ malar eng kapualitan-kapualitan karengan, nikouw kouw sumarakan eng kapualitan i ti’i wia nisea se reiy’ sipenoron witu en jema’at?
5
Eng kapualitan i yi’i ni’i lila’kula kaa laa mapairangla nikouw. E reiy’la ku’a re’en siesa tou witu e nelet miouw nu mekesama’, si toro malar eng kapualitan-kapualitan wia se patuari-patuarina?
6
Wawean ku’a re’en si patuari esa si sumero eng ka’adilan wia si patuari walina, wo awes tare wia se tou-tou reiy’ ma’eman?
7
Waweanna i te eng kapualitan witu nelet miouw siesa wia se walina tanu mouw eng kekala’an i wee nikouw. Ka’a kouw kasa so’o peme’itan eng kareiy’adilan? Ka’a ku’a re’en kouw kasa so’o rinugin?
8
Ta’an nikouw nuesa kouw matuanala eng kareiy’adilan wo nikouw nuesa kouw mapa eiymi eng karugian, wo eng kapualitan i ti’i en siniwo miouw wia se patuari-patuarimu.
9
Ka’apa e reiy’ mete’u ku’a re’en nikouw, kaa se tou-tou reiy’ adil se reiy’ laa maka’ato weteng witu eng Karaja’an ni Empung? Te’a mouw seip! Tou sa’amek, sumesempe em paepungen, tou masiwo en sa’amek, polia, tou memee murian,
10
rongkit, tou te’etew, tetoeken, menenero’ wo lumele’ekok se reiy’ laa maka’ato weteng witu eng Karaja’an ni Empung.
11
Wo se pirala tou witu e nelet miouw tuana mouw eng ketareanna. Ta’an nikouw kouw minee mola en toumu linenasla, nikouw kouw kinudusola, nikouw kouw neiy mouw i ulitla witu e ngaran ni Tuhan Yesus Kristus wo witu e Roh ni Empung ta.
Nge’enge’ witu em pesa’amekan
12
E reiy’ sa mina’asa wo’o sapa en toro i te i wee niaku, ta’an e reiy’ em baya nyi’a e makaka’ara’an. E reiy’ sa mina’asa wo’o sapa en toro i te i wee niaku, ta’an niaku ku reiy’ mayala en touku hamban e nesa sapa tu’u.
13
Eng kekaanen nyi’a mouw i wee en tian wo en tian i wee eng kekaanen: ta’an e marua-rua nyi’a e laa punengen ni Empung. Ta’an e nouwak e reiy’ i wee em pesa’amekan, ta’an i te i wee si Tuhan, wo si Tuhan i wee e nouwak.
14
Empung, si timo’ori si Tuhan, si laa tumo’ori nikita kangkasi karengan eng kuwasa-Na.
15
E reiy’ mete’u ku’a re’en nikouw, kaa e nouwakmu nyi’a mouw em beteng ni Kristus? E laa ku edon ku’a re’en em beteng ni Kristus kaa laa mesesarakanla nyi’a witu em pesa’amekan? Ma’an mekasa e reiy’!
16
Ka’apa e reiy’ mete’u ku’a re’en nikouw, kaa seiy si mina’akesla en touna wia si wewene sa’amek, si mina esa nouwak ampit nisia? Karengan en tuana mouw em pokeiy e nats: “Sea nu rua se laa mamuali esa le’ona.”
17
Ta’an seiy si mina’akesla en tou wia si Tuhan, si mamuali esa roh ampit Nisia.
18
I wa’akatomi en toumu waki pesa’amekan! Susur en dosa walina en tinuanala ni tou, e minamuali witu luar en touna. Ta’an sitou si masiwola em pesa’amekan si makadosa witu en touna nuesa.
19
Ka’apa e reiy’ mete’u ku’a re’en nikouw, kaa e nouwakmu nyi’a mouw em bait Roh Kudus e minena’ witu nikouw, e Roh Kudus kina’atoan niouwmi waki si Empung, – wo kaa nikouw kouw reiy’ kapunya’an niouw nuesa?
20
Karengan nikouw kouw tinelesouw wo e nargana e re’epesouw winear: Karengan e ni’itu wangko’enola si Empung ampit e nouwakmu!