Pasal 4
Tuhan nyi’a mouw si maesa-esana akim
1
Tuana mouw satorona se tou maloo’ola nikeiy: tanume se hamba-hamba ni Kristus, wia nisea neiy i emanla em pengiro-ngirong ni Empung.
2
Eng kesampetanna eng ke’ini waki se sumesempung-sumesempung se tuana nyi’a mouw, kaa nisea se pinakaloo’o-loo’ola toro emanen.
3
I wee niaku en toyo’ kasa em penoronna andi ku’a re’en niaku ku niakim miouwla ka’apa e nesa paadilan ne tou. Awes tare en touku nuesa tu’u e reiy’ niakimku.
4
Karengan e memang niaku ku reiy’ wena’asla witu e wo’o sapa, ta’an e reiy’ karengan e ni’itu mouw niaku neiy i ulitla. Nisia, si minakimla niaku, nyi’a mouw si Tuhan.
5
Karengan e ni’itu, te’a mouw maakimla nu reiy’pe’ e nedona, nyi’a i ti’i nu reiy’pe’ si Tuhan nu mineiy. Nisia si laa tumerangi, o kangkasi sapa neiy i kakirong witu eng kareiydeman, wo Nisia si laa mapaloo’ola sapa en tiniro’la witu eng gorem e nate. Takar susur tou si laa sumungkul e lelo’or waki si Empung.
Kumengenola en toumu
6
Patuari waya, e lelila’an-lelila’an i yi’i em pinakekula witu en touku nuesa wo wia si Apolos, karengan nikouw, rio waki patoka’an neiy nikouw kouw metete’ula sapa ku’a re’en em penoronna e lelila’an i yi’i: “Te’a melelantouwla e wawean neiy i kepatik”, rio te’a wawean witu e nelet miouw si metetingkeiyla en tou ampit e lalan si me’ukumla si esa ta’an se walina.
7
Karengan seiy ku’a re’en si mapokeiyla nikoo koo tuana pe’uku-ukumen? Wo sapa ku’a re’en eng kapunya’annu, e reiy’ sinungkulmu? Wo sa memang koo simungkul e nyi’a, ka’a ku’a re’en koo mesawa’la en tou, tanu mokan koo reiy’ minaka’atola nyi’a?
8
Nikouw kouw wesu mouw, nikouw kouw minekaya mouw, e reiy’ ampit nikeiy nikouw kouw mineraja mouw. Oh, kumura eng kale’osna sa ulit tuana, kaa nikouw kouw minamuali mouw raja, i ka’ayo nikeiy tu’u keiy kimi’it minamuali raja ampit nikouw.
9
Karengan, i ki’it eng genangku, si Empung si mineela wia nikeiy, em baya ne rasul, en tampa kasa kumeng, masuat tanu se tou-tou tinenggolanola e nukuman paten, karengan nikeiy keiy minamuali mouw peleloo’on i wee eng kaoatan, i wee se malaikat-malaikat wo i wee se tou.
10
Nikeiy keiy we’engel karengan si Kristus, ta’an nikouw kouw sama’ witu si Kristus. Nikeiy keiy lewea’, ta’an nikouw kouw ente’. Nikouw kouw wangko, ta’an nikeiy keiy kumeng.
11
Ika’ayomi wia e nedo i yi’i nikeiy keiy maarem, re’o, poteiy, winewe wo timou malepu-lepu,
12
nikeiy keiy matuanala em pepa’ayangen wuter. Sa keiy abuten, keiy merkatla; sa keiy ghioan, keiy sabaar;
13
sa keiy sero’an, keiy reiy’ mena’ mawingkot ampit e rinda; nikeiy keiy minamuali mouw masuat ampit e liwoka eng kaoatan, masuat ampit em pesaan waki e reiy’ sa mina’asa wo’o sapa, i ka’ayomi wia nedo i yi’i.
14
Eng kapualitan i yi’i e neiyku i patikla e reiy’ kaa laa mapairangla nikouw, ta’an kaa laa tumogor nikouw tanume se oki-oki’ku i koupusku.
15
Karengan ma’anouw tu’u kouw makapunya mangariwu-riwu mememee teturu’ witu si Kristus, nikouw kouw reiy’ makapunya laker ama’. Karengan niaku mouw si witu si Kristus Yesus si minamuali mouw ama’mu karengan e Injil neiyku i abarla wia nikoo.
16
Karengan e ni’itu niaku ku ngume’enge’la nikouw: ki’itanola em pasiwo-siwongku le’os!
17
Awes tare ni’itu mouw eng karenganna niaku ku minapa’alila wia nikoo si Tmotius, nyi’a mouw si urangku i koupus wo si lale’ witu si Tuhan. Nisia si laa ngume’enge’la nikouw witu em patou-touan eng kini’itangkula witu si Kristus Yesus, en tanu neiyku i turu’la wisa i te witu en susur ne jema’at.
18
Ta’an e wawean se pirala tou se minatingkeiy, karengan nisea se mapokeiyla, kaa niaku ku reiy’ laa meiy wia nikoo.
19
Ta’an niaku ku laa makarengan meiy wia nikoo, sa si Tuhan si mepa’arla nyi’a. Takar niaku ku laa mete’u, reiy’ en tanume e lelila’an ne tou-tou se tingkeiy i ti’i, ta’an en tanume eng kaente’an nea.
20
Karengan eng Karaja’an ni Empung e reiy’ neiy i karedeiymi waki lelila’an, ta’an e waki kuwasa.
21
Sapa ku’a re’en eng kepa’aran niouw? E lewo’ sa reiy’ ku’a niaku meiy wia nikoo ampit en sesa’alit ka’apa ampit e nupus wo ampit e nate rinda?