¹ Wo niaku, patuari waya, witu e nedo ni’itu ku reiy’ mete’u sumusuiy ampit nikouw tanu ampit sitou rohani, ta’an ampit i te sitou eng kaoatan si reiy’pe’ timu’a witu si Kristus. ² En susu mouw ni’i weekula wia nikoo, e reiy’ kekaanen kete, karengan nikouw kouw reiy’pe mete’u sumungkul e nyi’a. Wo en teakan tu’u nikouw kouw reiy’pe’ mete’u sumungkul e nyi’a. ³ Karengan nikouw kouw toupe’ eng kaoatan. Karengan, sa witu e nelet miouw wawean iri ate wo em pesali’isi’an e reiy’ ku’a re’en eng kapualitan i ti’i e maturu’la, kaa nikouw kouw tou eng kaoatan wo kaa nikouw kouw matou-tou eng kenaramen en touna? ⁴ Karengan sa siesa tou si lumila’: “Niaku ku waki weteng ni Paulus.” Wo se walina se mila’: “Niaku ku waki weteng ni Apolos,” E reiy’ ku’a eng kapualitan i ti’i e maturu’la, kaa nikouw kouw tou eng kaoatan reiy’ rohani? ⁵ Ni’itu mouw sapa ku’a re’en si Apolos? Sapa ku’a re’en si Paulus? Se sumesempung-sumesempung ni Tuhan karengan nisea o kouw ma’eman, siesa o siesa i ki’it e lalan neiy i weela ni Tuhan wia nisea. ⁶ Niaku ku timanem, Apolos si maserew, ta’an si Empung si minee eng kapatouna. ⁷ Karengan e ni’itu em pe’uku-ukumen e reiy’ mouw si timanem ka’apa si simereuw, ta’an i te si Empung si minee eng kapatouna. ⁸ Le’os si timanem ka’apa tu’u si simerew se masuat; wo siesa o siesa se laa maka’ato en tetorona minatoroan ampit em pepa’ayangenna nuesa. ⁹ Karengan nikeiy keiy maka’ampit esa nga pepa’ayangen ni Empung, nikouw nyi’a mouw e numa ni Empung, walewangko’ ni Empung.

To’otolan wo em bale

¹⁰ Minatoroan ampit e nupus karunia ni Empung, neiy i anugerahla wia niaku, niaku ku tanume siesa tou kasasigha’ em bale si kasigha’ rimeta’ mola en to’otolan, wo se tou walina se reiy’ maena-ena’ mewale witu natasna. Ta’an susur tou se lewo’ sa reiy’ maweela ghenang, kumura sia lewo’ sa reiy’ mewale witu natasna. ¹¹ Karengan e reiy’la siesa tou tu’u si toro rumeta’la en to’otolan walina ta’an i te en to’otolan neiy mouw i reta’la, nyi’a i ti’i si Yesus Kristus. ¹² Andi ku’a re’en se tou mewewale witu natas en to’otolan i yi’i ampit e mas, perak, watu permata, kayu, rukut pera ka’apa en daami, ¹³ witu e mekasa ee sangari em pepa’ayangen niesa o niesa e laa mapaloo’. Karengan e nendo ni Tuhan e laa mapaloo’o-loo’ola nyi’a, karengan nisia si laa mapa’ato ampit e napi wo kumura em pepa’ayangen niesa o niesa e laa ujin e napi i ti’i. ¹⁴ Sa em pepa’ayangen neiy i redeiy ni tou taang i pewa’awa’, nisia si laa maka’ato tetoro. ¹⁵ Sa em pepa’ayangenna minarengis, nisia si laa peme’itan eng karugian, ta’an nisia nuesa si laa lawireni, ta’an en tanu waki ghorem e napi. ¹⁶ E reiy’ mete’u ku’a re’en nikouw, kaa nikouw nyi’a mouw kouw bait ni Empung wo kaa e Roh ni Empung e minena-ena’ witu eng gorem miouw? ¹⁷ Sa wawean tou si mepepunengla em bait ni Empung, takar si Empung si laa munengla nisia. Karengan em bait ni Empung nyi’a mouw eng kudus wo em bait ni Empung i ti’i nyi’a mouw nikouw. ¹⁸ Te’a mouw wawean tou si lume’ekok en touna nuesa. Sa wawean witu e nelet miouw si mapokeiyla en touna mekesama’i ki’it eng kaoatan i yi’i, ma’anouw sia mawe’engel, rio sia mekesama’. ¹⁹ Karengan en sama’ eng kaoatan i yi’i nyi’a mouw eng kawe’engelan wia si Empung. Karengan wawean neiy i kepatik: “Nisia si simikop sitou mekesama’ witu eng kelali’iketanna.” ²⁰ Wo waki tampa walina: “Tuhan si mete’ula en tetiro’an-tetiro’an ne tou mekesama’; eng kaulitna em baya nyi’a e minaghio-ghio waya.” ²¹ Karengan e ni’itu te’a mouw wawean tou si mesawa’la en touna witu sitou, karengan e reiy’ sa mina’asa wo’o sapa nyi’a mouw eng kapunya’annu: ²² le’os si Paulus, Apolos, ka’apa tu’u si Kefas, le’os eng kaoatan, em patou-touan, ka’apa tu’u mate, le’os e nedo teakan, ka’apa tu’u e nedo laa meiy. Em baya nyi’a em punya miouw. ²³ Ta’an nikouw nyi’a mouw kouw kapunya’an ni Kristus wo si Kristus nyi’a mouw si kapunya’an ni Empung.