¹ Tuana mouw kangkasi, eng katoroan niaku nu mineiy wia nikouw, patuariku waya, niaku ku mineiy reiy’ ampit e lelila’an-lelila’an wangun ka’apa ampit en sama’ kaa laa ma’ayola eng kasairian ni Empung wia nikouw. ² Karengan niaku ku timenggolola kaa laa reiy’ mete’ula sapa-sapa witu e nelet miouw ta’an i te si Yesus Kristus, nyi’a i ti’i Sia si neiy i salibla. ³ Niaku kangkasi ku mineiy mouw wia nikoo witu eng kalewea’an wo ampit eng kasa meide’ wo kori’. ⁴ Leos e lelila’angku ka’apa tu’u em paabarangku e reiy’ neiyku i pa’ayola ampit e lelila’an-lelila’an hikmat maka emanen witu eng kaketeran e Roh, ⁵ rio e neman miouw te’a kumayong witu eng hikmat ni tou, ta’an witu eng kaketeran ni Empung.

g hikmat e ulit

⁶ Ma’anouw tu’u tuana nikeiy keiy maabarla eng hikmat witu e wuntul nea se minawowosouw, nyi’a i ti’i en sama’ e reiy’ waki kaoatan i yi’i, wo e reiy’ waki se makuwa-kuwasa – makuwa-kuwuasa eng kaoatan i yi’i, nyi’a i ti’i se makuwa-kuwasa – makuwa-kuwasa se laa perere’inla. ⁷ Ta’an ni’i paabar meiyla nyi’a mouw eng hikmat ni Empung neiy i kakirong wo em pengiro-ngirong, nu reiy’pe’ eng kaoatan i yi’i nu siniwola, en tiniro’ mola ni Empung i wee eng kewangko’an ta. ⁸ E reiy’la waki se makuwa-kuwasa eng kaoatan i yi’i se sumine’u nyi’a, karengan sa wona’na sea sumine’u nyi’a, nisea se reiy’ simalibla si Tuhan e wangko’. ⁹ Ta’an en tanu wawean neiy i kepatik: “Sapa e reiy’ ma’an mekasa loo’on em beren, wo e reiy’ ma’an mekasa lingan en talinga, wo e reiy’ ma’an mekasa lumentuti witu e nate ni tou: em baya en tiniro’la ni Empung i wee nisea se moupusla Nisia.” ¹⁰ Karengan wia nikita si Empung si minapaloo’o-loo’o mola nyi’a karengan e Roh, karengan e roh e masoisapla e reiy’ sa mina’asa wo’o sapa, awes tare eng kapualitan-kapualitan neiy i kakirong witu en tou ni Empung. ¹¹ Seiy ee pasil si witu e nelet ni tou si mete’u, sapa eng kina’atoan witu eng gorem en tou ni tou ta’a i te e roh ni tou nuesa em bitu eng goremna? Tuana mouw kangkasi e reiy’la sitou si mete’u, sapa eng kina’atoan witu en tou ni Empung ta’an i te e Roh ni Empung. ¹² Nikita ta reiy’ sumungkul e roh eng kaoatan, ta’an e roh asal waki si Tuhan, rio ta mete’u, sapa neiy i karuniala ni Empung wia nikita. ¹³ Wo eng karengan nikeiy keiy minapawona’la eng kapualitan-kapualitan rohani wia nisea se makapunya e Roh, nikeiy keiy melila-lila’ en tanume eng karunia-karunia ni Empung ampit e lelila’an e reiy’ neiy i turu’la wia nikeiy kaa en sama’ ni tou, ta’an eng karengan e Roh. ¹⁴ Ta’an se tou eng kaoatan se reiy’ simungkul sapa e nasal waki Roh ni Empung, karengan eng kapualitan i ti’i i wee nisea nyi’a mouw e nesa kawe’engelan; wo nisea se reiy’ mangarti nyi’a, karengan eng kapualitan i ti’i en toro i te paloo’ola kenaramen rohani. ¹⁵ Ta’an sitou rohani si maloo’la e reiy’ sa mina’asa wo’o sapa, ta’an nisia nuesa si reiy’ paloo’ola ne tou walina. ¹⁶ Karengan: “Seiy ku’a si mete’ula eng genang ni Tuhan, i ka’ayo sia toro ngume’enge’la Nisia?” Ta’an nikeiy keiy makapunya eng genang ni Kristus.