Pasal 14
Mekasape’ kasi en tanume eng karunia e Roh
1
Pekeki’itenouw e nupus i ti’i wo pe’inakutenola en toumu maka’ato eng karunia-karunia e Roh, eng kasa i paketa-ketare eng karunia kaa laa mawenti’.
2
Seiy si mengila-ngila’ ampit em baasa roh, si reiy’ mengila’ngila’ wia sitou, ta’an wia si Empung. Karengan e reiy’la siesa tou tu’u si mangarti em baasana; karengan e Roh nisia si matotorla eng kapualitan-kapualitan em pengiro-ngirong.
3
Ta’an seiy si mawenti’, nisia si mengila-ngila’ wia sitou, nisia si mebangun, mange’enge’la wo meibor.
4
Seiy si mengila-ngila’ ampit em baasa roh, nisia si mebangun en touna nuesa, ta’an seiy si mawenti’, nisia si mebangun en Jema’at.
5
Niaku ku pa’ar, rio nikouw nu waya kouw mengila-ngila ampit em baasa roh, ta’an e lumantouwla e ni’itu, rio kouw mawenti’. Karengan sitou mawenti’ si lebe maka arga ta’an sitou mengila-ngila’ ampit em baasa roh, ta’an i te sa sitou i ti’i kangkasi si mapaloo’o-loo’ola nyi’a, i ka’ayo se Jema’at se toro wangunen.
6
Ni’itu mouw, ee patuari waya, sa aku meiy wia nikoo wo mengila-ngila’ ampit em baasa roh, sapa ku’a re’en eng ka’ara’anna e ni’itu i wee nikoo, sa aku reiy’ ma’ayola wia nikoo e lelila’an ni Empung ka’apa en tine’u, ka’apa e wenti’ ka’apa en teturu’?
7
E masuat eng kapualitanna ampit em pakakas-pakakas e reiy’ si’imukur, ta’an e malegu’, tanu en sesulingen wo no’olingen – kumura ku’a re’en se tou o toro mete’ula eng kekantaren sapa ku’a re’en ni’i pepa’ayangla en sesulingen ka’apa e no’olingen, sa e marua-rua nyi’a e reiy’ maro’umi legu’an mange’an?
8
Ka’apa, sa en sesebungen e reiy’ maro’umi legu’an katerang, seiy ku’a re’en si timiro’la en tou kaa laa sumeke’
9
Tuanakan kangkasi nikouw si mengila-ngila’ ampit em baasa roh: sa kouw reiy’ mepeka’arala e lelila’an-lelila’an e leno, kumura ku’a re’en se tou o toro mangarti sapa e neiymu i lila’la? E lelila’an-lelila’annu e minaghio-ghio i te neiy miouw i totorla waki reghe-reghesan!
10
Wawean kelaker – andi pira eng kelaker – minegheghioan em baasa wia eng kaoatan; ma’anouw tu’u tuana e reiy’la siesa tu’u witu e neletna si makapunyala legu’an e reiy’ sipenoron.
11
Ta’an sa aku reiy’ mete’ula em penoron em baasa i ti’i, niaku ku minamuali tou wo’oseiy i wee nisia si minepeka’arala nyi’a wo nisia sitou wo’oseiy i wee niaku.
12
Tuanakan kangkasi ampit nikouw: nikouw kouw memang me’inakut kaa laa maka’ato eng karunia-karunia Roh, ta’an e lumantouwla e ni’itu satorona nikouw kouw me’inakut mepeka’arala nyi’a kaa laa mebebangun en Jema’at.
13
Karengan e ni’itu seiy si mengila-ngila’ ampit em baasa roh, nisia si lewo’ sa reiy’ sumombayang, rio wia nisia ni’i weela kangkasi eng karunia kaa laa melelila’la nyi’a.
14
Karengan sa aku sumombayang ampit em baasa roh, takar e rohku mouw e masombayang, ta’an eng genang le’osku e reiy’ kumi’it masombayang.
15
Ni’itu mouw, sapa ku’a re’en e lewo’ sa reiy’ siwongku? Niaku ku laa sumombayang ampit e rohku, ta’an niaku ku laa sumombayang kangkasi ampit eng genang le’osku; niaku ku laa kumantar wo lumo’or kangkasi ampit eng genang le’osku.
16
Karengan, sa koo matotor syukur ampit e rohmu i te, kumura ku’a re’en se tou karengan se witu tanume se lumelinga o toro lumila’la “amin“ witu em patotoran syukurmu? Reiy’ ku’a re’en nisia si reiy’ mete’u sapa e neiymu i lila’la?
17
Karengan ma’anouw tu’u em patotoran syukurmu i ti’i eng kasa le’os, ta’an se tou walina se reiy’ binangun e nyi’a.
18
Niaku ku matotor syukur wia si Empung, kaa niaku ku mengila-ngila’ ampit em baasa roh ta’an i te nikouw nu waya.
19
Ta’an witu em pinate’upan ne Jema’at niaku ku lebe pa’ar tumotorla e lima lelila’an en toro pangartian kaa laa mee teturu’ se tou walina kangkasi, ta’an i te e mangariwu-riwu totor ampit em baasa roh.
20
Patuari waya, te’a mouw masuat tanu si anakoki’ witu eng genangmu. Mamuali mouw anakoki’ witu eng kalewo’an, ta’an tou sela mouw witu eng geghenangannu!
21
Witu e nukum Torat wawean neiy i kepatik: “Karengan se tou-tou se makapunyala em baasa walina wo kaa en suma ne tou-tou wo’oseiy Niaku ku laa sumusuiy wia se bangsa i yi’i, ma’anouw tu’u tuana nisea se reiy’ laa lumingala Niaku, e nuwu’ ni Tuhan.”
22
Karengan e ni’itu eng karunia em baasa roh nyi’a mouw eng kowa’, e reiy’ i wee se tou maka eman, ta’an i wee se tou reiy’ maka eman; kasuatan eng karunia kaa laa mewewenti’ nyi’a mouw eng kowa’, e reiy’ i wee se tou reiy’ maka eman, ta’an ni’i wee se tou maka eman.
23
Ni’itu mouw, sa em baya ne Jema’at se merur mewali-wali wo susur tou si mengila-ngila’ ampit em baasa roh, laa o ghumoremouw se tou-tou luar ka’apa se tou-tou reiy’ maka eman, reiy’ ku’a re’en e laa i lila’ neala, kaa nikouw kouw sepereng?
24
Ta’an sa em baya nea se mawenti’, laa o ghumorem se tou reiy’ maka eman ka’apa se tou weru, nisia si laa emanenla em baya nea wo soisapen nea nu waya;
25
E reiy’ sa mina’asa em pengiro-ngirong eng kima’ampet witu eng gorem e natena e laa pakaloo’o-loo’ola, i ka’ayo sia laa kumudu sumempe si Empung wo makaredeiy: “Maka uli-ulit, si Empung si witu eng keuneran niouw.”
E natoran witu em pinate’upan ne Jema’at
26
Ni’itu mouw kumura en teakan, ee patuari waya? Sakawisa kouw merur, satorona susur tou si sumempela wo’o sapa: siesa tou e mazmur, se walina en teturu’, ka’apa e lelila’an ni Empung, ka’apa eng karunia baasa roh, ka’apa eng karunia kaa laa melelila’la em baasa roh, ta’an em baya nyi’a i ti’i e lewo’ sa reiy’ pinakela kaa laa mebebangun.
27
Sa wawean si mengila-ngila’ ampit em baasa roh, i wayala se rua ka’apa kasa laker se telu tou, siesa kaa siesa, wo e lewo’ sa reiy’ wawean siesa tou walina kaa laa melelila’la nyi’a.
28
Sa reiy’la tou si toro lumila’la nyi’a, satorona sea se makapenes witu em pinate’upan ne Jema’at wo toro i te mengila-ngila’ witu en touna nuesa wo wia si Empung.
29
En tanume se nabi-nabi – le’osouw se rua ka’apa telu tou witu e neletna se mengila-ngila’ wo se walina se melelingala sapa em peila’ neala.
30
Ta’an sa siesa tou walina si rimuber witu si maka’ato e lelila’an, takar si kasa ketare-tare i ti’i si lewo’ sa reiy’ makapenes en tou.
31
Karengan nikouw nu waya kouw toro menti’ siesa karengan siesa, i ka’ayo nikouw nu waya kouw toro metete’u wo maka’ato kaketeran.
32
Eng karunia ni nabi en tu’utuk wia se nabi-nabi.
33
Karengan si Empung si reiy’ mepa’arla eng karungkea’an, ta’an i te e le’os eng kale’osan.
34
Masuat tanu witu em baya en Jema’at ne tou-tou kudus, se wewene-wewene se lewo’ sa reiy’ makapenes en tou witu em pinate’upan-pinate’upan ne Jema’at. Karengan nisea se reiy’ i weela laa lumila’. Nisea se lewo’ sa reiy’ tumu’utukla en tou tanukan neiy i lila’la kangkasi e nukum Torat.
35
Sa sea pa’ar mamete’ula e wo’o sapa, le’osouw sea mueiyla nyi’a wia si tu’atuamana waki wale. Karengan e reiy’ wangun wia si wewene kaa laa mesesusuiy witu em pinate’upan ne Jema’at.
36
Ka’apa sapa ku’a re’en e nuwu’ ni Empung eng kimetaremi waki nikouw? Ka’apa wia nikouw i te ku’a e nuwu’ i ti’i mineiy?
37
Sa siesa tou si mapokeiyla en touna nabi ka’apa sitou minaka’atola karunia rohani, nisia si lewo’ sa reiy’ mawena’as, kaa en sapa neiyku i lila’la wia nikoo nyi’a mouw em perenta ni Tuhan.
38
Ta’an sa sia reiy’ meweweeghenangla nyi’a, te’a mouw koo meweweeghenangla nisia.
39
Karengan e ni’itu, ee patuariku waya, pe’inakutela en toumu kaa laa maka’ato eng karunia kaa laa mewewenti’ wo te’a mouw ma’ape’la sitou mengila-ngila’ ampit em baasa roh.
40
Ta’an e reiy’ sa mina’asa wo’o sapa e lewo’ sa reiy’ lumaa ampit e rinda wo e minatu’utul.