¹ Wo en teakan, ee patuari waya, niaku ku pa’ar makighenangla nikouw witu e Injil neiyku i abarla wia nikoo wo en sinungkul miouw, wo witu eng goremna kouw te’etep rimedeiy. ² Karengan e Injil i ti’i nikouw kouw linawirla, asal kouw te’etep timiboiy witu nyi’a, tanu neiyku i abarla wia nikoo – ta’an i te sa kouw mina ghio-ghio i tela mina’eman. ³ Karengan eng kasa pe’uku-ukumen e neiy mouw i pa’ayokula wia nikoo, nyi’a i ti’i sapa en sinungkul ku mola nuesa, nyi’a mouw kaa si Kristus si minate mouw karengan en dosa-dosa ta, minatoroan ampit eng Kaol Lenas, ⁴ kaa Nisia si neiy mouw i le’osla, wo kaa Nisia si tino’oromi, witu e nendo katelu, minatoroan ampit eng Kaol Lenas; ⁵ kaa Nisia si minapa’ato mola en tou wia si Kefas wo eng kamurian wia se mapulu’ o rua murit-Na. ⁶ Nu reiy’ mouw i tu Sia mapa’atola en tou wia se lebe lima nga atus patuari pinekasa; kelakeran wia nisea se matou-toupe’ i ka’ayomi en teakan, ta’an se pirala witu e neletna se timayanouw. ⁷ Tumodongla nyi’a Sia mapa’atola en tou wia si Yakobus, kamurian wia em baya ne rasul. ⁸ Wo eng kasa kesampetanna witu em baya nyi’a Nisia si minapa’atola en tou kangkasi wia niaku, masuat tanu wia sioki’ si minatou nu reiy’pe’ e nedona. ⁹ Karengan niaku nyi’a mouw si kasa kumeng wia em baya ne rasul, awes tare ku reiy’ waar patotoren rasul, karengan niaku ku simiasa mouw se Jema’at ni Empung. ¹⁰ Ta’an eng karengan e nupus karunia ni Empung niaku nyi’a mouw ku tanu eng kumura niaku nu wia en teakan, wo e nupus karunia neiy i anugerah-Nala wia niaku e reiy’ minaghio. Eng kapurikitna, niaku ku mina’ayangouw minengente’ ta’an nisea nu waya; ta’an e reiy’ niaku, ta’an i te e nupus karunia ni Empung e rimapitla niaku. ¹¹ Karengan e ni’itu, le’os niaku, ka’apa tu’u nisea, en tuana mouw nikeiy nu mawee teturu’ wo en tuana mouw kouw nu mina’eman. ¹² NI’itu mouw, sakawisa keiy mabarla, kaa si Kristus si tino’ori waki elet ne tou minate, kumura wona’na o wawean si witu e nelet miouw si lumila’la, kaa e reiy’la eng keteto’or ni tou minate? ¹³ Sa reiy’la eng keteto’or ni tou minate, takar si Kristus kangkasi si reiy’ tino’ori. ¹⁴ Ta’an sa wona’na si Kristus si reiy’ tino’ori, takar e minaghio mouw e niabaran neiy wo e minaghio mouw kangkasi eng ka’emanan niouw. ¹⁵ E lumantouwla e ni’itu nikeiy keiy pakaloo’o-loo’ola timowo wia si Empung, karengan en tanume Nisia nikeiy keiy limila’la, kaa Nisia si timo’oromi si Kristus – e nulitna Nisiia si reiy’ timo’ori-Nisia, sa wona’na ulit, kaa se tou minate se reiy’ tino’ori. ¹⁶ Karengan sa ulit sitou minate si reiy’ tino’ori, takar si Kristus kangkasi si reiy’ tino’ori. ¹⁷ Wo sa si Kristus si reiy’ tino’ori, takar e minaghio mouw eng ka’emanan niouw wo nikouw kouw matou-toupe’ witu en dosamu. ¹⁸ Tuana mouw se minapuneng kangkasi se tou-tou se minate witu si Kristus. ¹⁹ Sa wona’na nikita witu i te em patou-touan i yi’i kita minee paarapen wia si Kristus, takar nikita nyi’a mouw ta tou-tou kasa pedis waki se reiy’ sa mina’asa tou. ²⁰ Ta’an e nulit nyi’a mouw, kaa si Kristus si tino’oromi waki elet ne tou minate, tanume si polon waki se tou-tou timayanouw. ²¹ Karengan e masuat tanu em patean e mineiy karengan siesa nga touan tou, tuanakan kangkasi eng keteto’or ni tou minate e mineiy karengan siesa nga touan tou. ²² Karengan e masuat tanu em baya ne tou minate witu em paasa-asa’an ampit si Adam, en tuanakan kangkasi em baya ne tou se laa touni sumoup witu em paasa-asa’an ampit si Kristus. ²³ Ta’an susur tou i ki’it eng katodongna: Kristus si tanume si wu’ana polon; nu reiy’ mouw i tu nisea se mamuali kapunya’an-Na witu e nedo ke’e eiy-Na. ²⁴ Kamurian i ka’ayo momi eng kesampetanna, nyi’a i ti’i sakawisa Sia sumarakan eng Karaja’an wia si Ama’ Empung, nu reiy’ mouw Nisia nu minunengla e reiy’ sa mina’asa em paperenta’an, eng kakuwasa’an, wo eng kaente’an. ²⁵ Karengan Nisia si lewo’ sa reiy’ tumiboiy em paperenta’an tanume si raja i ka’ayo si Empung nu rumeta’la em baya ne kesaru-Na witu em bawa’ e ne’a-Na. ²⁶ Si kesaru kasa kesampetan, pinunengla nyi’a mouw si patean. ²⁷ Karengan e reiy’ sa mina’asa wo’o sapa e neiy mouw i tu’utuk-Nala witu em bawa’ e ne’a-Na. Ta’an sa i lila’la, kaa “e reiy’ sa mina’asa wo’o sapa e neiy mouw i tu’utukla“, takar e n terangouw, kaa Nisia nuesa si timu’utukola e reiy’ sa mina’asa wo’o sapa witu em bawa’ e ne’a ni Kristus ni’itu e reiy’ neiy i kaghorem witu eng gorem e nyi’a. ²⁸ Ta’an sa e reiy’ sa mina’asa wo’o sapa e neiy mouw i tu’utukla witu em bawa’ ni Kristus, Takar Nisia nuesa tanume si Oki’ si laa tumu’utukla en tou-Na witu em bawa’ ni Empung, si timu’utukola e reiy’ sa mina’asa wo’o sapa witu em bawa’-Na, rio si Empung si mamuali waya-waya witu em baya-waya. ²⁹ Sa reiy’ tuana, sapa ku’a re’en eng ka’ara’anna em pasiwo-siwon ne tou-tou binaptis i wee se tou minate? Sa sitou minate si kasa reiy’ tino’ori, ka’a sea pa’ar baptisen i wee se tou-tou timayanouw? ³⁰ Wo nikeiy kangkasi – ka’a ku’a re’en keiy susur e nedo keiy mali en tou meiy witu em bahaya? ³¹ Patuari waya, susur e nendo niaku ku mesaruan ampit em patean. Karengan eng kesawa’angkula wia nikouw witu si Kristus Yesus, Tuhan ta, niaku ku lumila’me, kaa eng kapualitan i yi’i e nulit. ³² Sa mato’otol i tela em pemili-milingen - pemili-milingen ni tou niaku ku mine’inakutola simaru si tekapen lela’ waki Efesus, sapa ku’a re’en eng ka’ara’anna eng kapualitan i ti’i i wee niaku? Sa sitou minate si reiy’ to’oreni, takar “meiy mouw kita kumaan wo kumoo’, karengan wo’odo kita mate“. ³³ Te’a mouw kouw seip: Makasewokan e wuruk en tumerila eng kenaramen e le’os. ³⁴ Mawena’asouw sumoup makale’o-le’os wo te’a mouw masiwo en dosa kasi! Wawean witu e nelet miouw si reiy’ sumine’u si Empung. Eng kapualitan i yi’i ni’i lila’kula, rio kouw meirang.

Keteto’or e nouwak

³⁵ Ta’an wona’na e wawean tou si mawueiy: “Kumura ku’a re’en sitou minate tino’ori? Wo ampit e nouwak sapa ku’a re’en sea laa meiy sumoup?” ³⁶ Heiy tou we’engel! Sapa e neiymu i kerorla e reiy’ laa tumou wo matou-tou, sa sia reiy’ matepe’la. ³⁷ Wo e neiymu i kerorla e reiy’ mouw e nouwak en tanemen e laa tumou, ta’an e watuna reiy’ sikuli’, e nulur e watuna eng gandum ka’apa e watuna walina. ³⁸ Ta’an si Empung si mineela wia nisia e nesa ouwak, en tanu neiy i kepa’ar-Nala: Nisia si mineela witu en susur watuna e nouwakna nuesa. ³⁹ E reiy’ em baya e le’ona e masuat: e le’ona ni tou e laeng ta’an e le’ona ni tekapen, e laeng ta’an e le’ona ni wara, laeng ta’an e le’ona ni sera’. ⁴⁰ Wawean e nouwak sorgawi wo wawean e nouwak eng kaoatan, ta’an eng kewangko’an e nouwak sorgawi e laeng ta’an eng kewangko’an e nouwak eng kaoatan. ⁴¹ Kewangko’an ni endo e laeng ta’an eng kewangko’an ni sumedot wo eng kewangko’an ni sumedot e laeng ta’an eng kewangko’an ne sumesena’-sumesena’ wo eng kewangko’an ni sumesena’ esa e minelaengan ampit eng kewangko’an ne sumesena’ walina. ⁴² Tuana mouw kangkasi eng kapualitanna ampit eng keteto’or ne tou minate. Neiy i wu’uwurla witu eng kapunengan, tino’ori witu e reiy’ kinapunengan. ⁴³ Neiy i wu’uwurla witu eng kakumengan, en tino’ori witu eng kewangko’an. Neiy i wu’uwurla witu eng kalewea’an en tino’ori witu eng kaketeran. ⁴⁴ Neiy i wu’uwurla nyi’a mouw e nouwak eng kaoatan, en tino’ori nyi’a mouw e nouwak rohaniah. Sa wawean e nouwak eng kaoatan, takar e wawean kangkasi e nouwak rohaniah. ⁴⁵ Tanu wawean neiy i kepatik: “Sitou eng kasa ketare-tare, Adam si minamuali makhluk e matou-tou“, ta’an si Adam eng kamurian si minamuali roh mangintoula. ⁴⁶ Ta’an eng ketare-tare mineiy e reiy’ rohaniah, ta’an eng kaoatan; kamurian tare mouw i te meiy e rohaniah. ⁴⁷ Sitou eng kasa ketare-tare si asal waki riawu en tana’ wo maka kalakuan e nouwak, sitou karua siasal waki sorga. ⁴⁸ Se makhluk-makhluk eng kaoatan se masuat ampit nisia se asal waki riawu en tana’ wo se makhluk-makhluk sorgawi se masuat ampit Nisia se asal waki sorga. ⁴⁹ Masuat tanu nikita ta minake mouw rupa waki kaoatan, tuanakan kangkasi nikita ta laa make e rupa waki sorgawi. ⁵⁰ Patuari waya, nyi’i mouw e laaku i pelelila’la wia nikoo, nyi’a i ti’i kaa e le’ona wo e raa’ e reiy’ minaka’ato weteng witu eng Karaja’an ni Empung wo kaa se minapuneng se reiy’ maka’ato weteng witu en sapa e reiy’ minapuneng. ⁵¹ Eng kaulitna niaku ku minapaloo’o-loo’ola wia nikoo e nesa i pengiro-ngirong: nikita ta reiy’ laa mate waya ta’an nikita nu waya ta laa soupen, ⁵² witu e reiy’ kinapi’ipitan em beren, witu e nedo legu’an en sesebungen kesampetan. Karengan en sesebungen e laa lumegu’ wo se tou-tou minate se laa to’oren witu eng ka’ada’an reiy’ mete’u punengen wo nikita nu waya ta laa soupen. ⁵³ Karengan se toro mapuneng i yi’i se lewo’ sa reiy’ makela e reiy’ mete’u mapuneng, wo se toro mate i yi’i se makela e reiy’ toro mate. ⁵⁴ 54 Wo nu reiy’ mouw se toro mapuneng i yi’i nu makela e reiy’ toro mapuneng wo se toro mate i yi’i se makela e reiy’ toro mate, takar e laa mouw malekep e nuwu’ ni Tuhan neiy i kepatik: “Em patean e nine’enepola witu eng kamang. ⁵⁵ 55 Heiy patean wisa ku’a re’en e kamangmu? Heiy patean, wisa ku’a re’en em be’imu?” ⁵⁶ Em be’ina em patean nyi’a mouw en dosa wo eng kuwasa dosa nyi’a mouw e nukum Torat. ⁵⁷ Ta’an syukur wia si Empung si minee mola wia nikita eng kamang kaa si Yesus Kristus, Tuhan ta. ⁵⁸ Karengan e ni’itu, ee patuariku waya i koupus, rumedeiy mouw te’etep, te’a i kaoghe, wo lumingkama’ mouw reiy’ maena-ena’ witu em pepa’ayangen ni Tuhan! Karengan eng kete’uan niouw, kaa witu em paasa-asa’an ampit si Tuhan em bedu rawoiymu e reiy’ minaghio.