¹ Nyaku maila kaulitan tunggorem Kristus, nyaku ku raai matowo, wo suara nateku masaksi mawali-wali Roh Kudus, ² ka kasusaangku sela karengan wo ndaai mena masusa tunggorem nateku. ³ Ka nyaku maarap nawak-eku yaai kutuken, karooumei witu si Kristus ka nikau patuari-patuariku, nikau kabangsaku witu jasmani ⁴ niitu tou-tou Israel, makataintu hak maangkat mamuali oki-oki ni Empung. Tumerima kamuliaan, kakawaren-kakawaren, tumerima pawehemei Nukum Taurat, Ibadah, wo kawar-kawar. ⁵ Niseamong se taranak-taranak ne bapa-bapa ata rior, wo witu nantara neate Kristus nyai toumei kumiit leona, nisia, siamong si Empung witu natas pakasaan, wo si palooren makar kaure-ure. Nulit! ⁶ Taan Firman ni Empung ndaai gagal. Ka ndaai pakasaan witu setou Israel setou Israel karengan, ⁷ wo ndaai pakasaan se taranak ni Abraham se oki-oki ina, taan, se pailaan taranakemu, sea se taranak ni Ishak. ⁸ Nyaai waya nartina, ka ndaai oki-oki kumiit leona, se rineken tanu oki-oki ni Empung, taan oki-oki kakawaren te se rineken mamuali taranak. ⁹ Ka nyaaimong limila witu kawar tiin: "Witu mong nendo yaai nyaku ku mai, wo si Sara si makaindo oki tuama." ¹⁰ Ndaai te nyaai, taan witu si Ribka, si mahali-alimong nawak se oki-oki witu si esa tou, sia si Ishak tu'a ta rior, ¹¹ ka se raaipe nyai tou mei se oki-oki tiin, wo se raaipe masiwo sapa niitu leos kaapa lewo, rior kapaaran ni Empung kumura se si siren na wo se ketena, ndaai ka peniwo-niwon, taan ka nisia si matowa, ¹² lilaana witu si Ribka: "Si oki tu'a si sumelewir se tuarina." ¹³ Tanu nyai patik: "Nyaku ku maupus si Yakub taan nyaku maseso si Esau." ¹⁴ Niitumong sapa lilaata? Sapa si Empung raai adil? Niitu ndaai karengan! ¹⁵ Ka nisia lumila witu si Musa: "Nyaku kumehe nupus witu si sei si kapaareku, mawewehe nupus, wo nyaku ku kumura ate witu sei sei si kapaareku muraan nate." ¹⁶ Niitumong nyaai ndaai gimantong witu kapaaran, kaapa paayangen wuter ne tou, taan wia si Empung si timurumei kamurahan na. ¹⁷ Ka witu buk suci limila witu si Firaun: "Ka witu nalasan yaai nyaku mangkat nikou, rior nyaku tumuru mako kuasaku witu gorem-emu, wo ngaran-eku, nahabarako witu pakasaan kaoatan." ¹⁸ Niitumong si Empung mehe nupus ena wia si sei te sia si kapaarena, wo kumete nate wia si sei si kapaarena. ¹⁹ Niitumong nikau lumila wia nyaku, "Kaa sia si pasoleken ne? Ka sei si paar tumantang kapaaran na? ²⁰ Putarei, sei reen nikau, kaun tou? Wo kau mabanta si Empung? Sapa itu siniwomong, wo lumila witu si simiwo, kaakou sumiwo nyaku tanu nyaai?" ²¹ Sapa si meniwo kure si raai wana si hak witu tana pulut tiin, ka masisiwo witu sangaerur tana masuat, tanu bejana papaken witu pailaan mulia, wo bejana walina siwon papaken witu kahinaan? ²² Kumura sa si Empung maan sia mapaar matuturu ka pengupian na wo nyumata kuasa na, wo timanggongou kasabaran sela tu sinaru bejana-bejana kapengupian na siniapou witu kabinasaan? ²³ Nisia si sumiwo niitu mapailek kakayaan kamuliaan na tu natas bejana-bejana kaleosan na, siniapnamong witu kamuliaan. ²⁴ Niitu nikita tinowa namei, ndaai te witu nantara ne tou Yahudi, taan kahai se witu nantara ne bangsa-bangsa walina. ²⁵ Tanuakan kahai nyai na firman witu gorem buk Hosea: "Nisea se raai umateku, se lilaangku umateku, wo se raai kaupuseku se lilaangku witu leos." ²⁶ Wo witu tampa ni Empung limila rior karengan: "Nikau raai umateku, witu tampa tiin nisea pailaan oki-oki ni Empung se matou-tou." ²⁷ Wo si Yesaya mahame se Israel: "Maane se oki-oki ne Israel kalakeran nea tanu resak witu laut, taan se telaau-telaau neate se kalempot, ²⁸ ka si Empung si sumiwo firman-Eta witu natas kaoatan, sempurna wo segera." ²⁹ Tanu nyai nubuat ni Yesaya: "Sa si Empung pakasaan kaoatan, raai tumelaaume taranak wia nikita, nikita minamulimong tanu Sodom wo mengasuatan o Gomora." ³⁰ Niitumong sapape lilaata? Ka se bangsa-bangsa raai Yahudi se raai makiit kaulitan, se minakaindomong kaulitan, niitu kaulitan witu iman o mai, ³¹ taan, bangsa Israel se maulit karengan makikiit kaulitan Nukum Taurat, taan simiwo nisea raai nyai kaayo witu Nukum tiin? ³² Kaa? Ka nisea se raai rimawoi kaampit iman, taan kaampite te perbuatan. Nisea se nyai kasuusu witu mbatu kasuusuan. ³³ Tanu nyai patik: "Lohone nyaku kumeta mako witu Sion nesa watu kasuusuan, wo nesa watu karang, wo seite si mapercaya nisia, si raai papairang."