¹ Niitumong ka ndaai mong wana pahukumen wia setou witu gorem ni Yesus Kristus, ² ka nukum Roh penou-nouan tunggorem Yesus Kristus minerdekamong nikau witu nukum dosa wo patean. ³ Ka sapa ndaai toro siwon ni Nukum Taurat, ka siniwo lemah o leona, siniwomong ni Empung kaampit nisia rumehomei si oki ina sandiri, mamuali masuat ose tou, seberdosa, kaapa masiwo tanu matoro ndosa, sia mehe nukuman witu dosa tunggorem leona, ⁴ rior patuntuten Nukum Taurat lekepen, wia nikita, ndaai tumou kumiit leona, taan makiit si Roh. ⁵ Ka wia nisea timou makiit leona, se magenangete tumou kumiit leona, taan wia nisea se timou makiit Roh, se magenangete tumou witu Roh. ⁶ Ka sa magenangete patoro witu leona niitu patean, taan gegenang patoro witu Roh, niitu nidop wo dame sejahtera. ⁷ Ka gegenang matoro witu leona, matantang si Empung, ka si raai tumuutuk witu nukum si Empung, makar nisia si raai masiwo niitu. ⁸ Wo nisea se tumou tunggorem daging seraai sumenang nate ni Empung. ⁹ Mako taintu nikau raai timou tunggorem leona, taan tunggorem Roh, saitu mena ulit wia nikau. Ka sa si tou raai wana si Roh Kristus, sia si raai taintuna. ¹⁰ Taan, sa si Kristus wia gorem niu, maan nawak-emu minatemong ka dosa, taan si Roh matou-tou ka kaulitan. ¹¹ Taan saitu Roh Empung si timoorei si Yesus witu patean, mena wia gorem-emu, nisia si timoorei si Yesus witu patean tiin si mehe katotouan witu nawak-emu fana tiin, lumalan witu Roh-Ena si minena witu gorem niu. ¹² Niitumong patuari-patuariku, nikita ta tou wewehan nutang, taan ndaai witu leona, rior penouan kumiit leona. ¹³ Ka sa nikau timou makiit leona, nikau, kau mate, taan sa wia Roh nikau mate peniwo-niwon nawak-emu, nikau, kau tumou. ¹⁴ Ka pakasaan setou se pinimpin ni Roh Empung seamong se oki-oki ni Empung. ¹⁵ Ka nikau raai timerima Roh pabudaken kahai masiwo kaindean, taan nikau timerimamong Roh, si minangkatomei nikau, mamuali oki-oki ni Empung, ka limalalan witu si Roh tiin nikita matowa: "Abba, Bapa!" ¹⁶ Roh tiin si maksi mawali si Roh-ta, ka nikita ta oki-oki ni Empung, ¹⁷ sa nikita pailaan oki, nikita kahai ta pawaris-pawaris ni Empung, wo masuat pawaris kaampit si Kristus, sa kita ulit-ulit mapeendis mawali nisia, kita kahai mamuali pengasa-ngasaran mawali-wali nisia. ¹⁸ Ka nyaku maanggap, ka kasusaan-kasusaan tarekan yaai, ndaai pemasuatanong kamuliaan, nyatamei wia nikita. ¹⁹ Ka pakasaan siniwo, niitu mengena-ngena kampat lelo witu se oki-oki ni Empung nyata mei. ²⁰ Ka pakasaan siniwo nyai nong katuutuk witu ndaai wana si kaaraan ndaai witu kapaaran sandiri, taan kumiit kapaaran ni Empung si kimalamong niitu, tu dasar pangharapan. ²¹ Rior witu pakasaan siniwo tiin sandiri, niitu kahai siwon merdeka witu pabudaken kapapatean, tumoro witu kamardekaan ne oki-oki ni Empung wuta kamuliaan. ²² Ka kailekanta, ka pakasaan siniwo, masuat memao-maos, wo mapendam rumara, matotou mei si oki makar tarekan. ²³ Wo ndaai te niitu, taan nikita sandiri kahai tatimerima mbuana katare, Roh kahai mapaos, witu gorem nawaketa sandiri, witu ta maana angkaten mamuali oki, niitumong tumubus nawaketa. ²⁴ Ka nikita nyai kalempot witu pangharapan. Taan pangharapan palolohon ndaai pailaan pangharapan, ka sei si maarap witu sapate niitu, wo kina lohoanamong? ²⁵ Taan nikita, sa kita maarap witu sapa-sapa, ndaaipe linohota, kita maana niitu kaampit katekunan. ²⁶ Taintukan kahai, Roh masawang nikita witu kalemahanta, ka ndaai kailekanta, kumura sa masombayang, taan si Roh sandiri si makiupus ka nikita, kaampit paos-paoseta, ndaai toro lilaata. ²⁷ Wo nisia si maselidik nate, makailek sapa kapaar Roh tiin ka nisia, si makiupus wia setou-tou kudus masuat kapaaran ni Empung. ²⁸ Ka sea se kenalenamong katarepe, sea kahai tinantumong katare-tare mamuali masuat wo gambar ni oki ina, rior nisia mamuali anak tu'a witu nantare selaker patuari. ²⁹ Nisea se tinantunamong witu katare-tare sea se towaan na wo se tinowaa na, se uliten na, wo nisea se niulitena, sea semulian na. ^{30 31} Niitumong sapape lilaata tu pakasaan yaai? Sa si Empung wia pihak eta, sei si sumaru nikita? ³² Nisia si raai maupus si oki ina sandiri, taan si merakanako nisia ka wehe nikita waya, kumurape nisia mawali-wali kaampit nisia, o raai kumaru nyamei sapa-sapa wia nikita? ³³ Sei si toro dumawa se tou-tou sinisir ni Empung? Si Empung si mulit nisea. ³⁴ Sei si mehe nukuman? Yesus Kristus si minatemong, o sia nyai toorei witu patean, rimuhumun witu sangaweka leleos ni Empung, sia si makiupus nikita. ³⁵ Sei si toro rumoume nikita witu nupus ni Kristus? Sapa niitu patindasen, kaapa kasusaan, kaapa pawantian, kaapa naharem, kaapa kapotayan, kaapa bahaya sambel? ³⁶ Tanu nyai patik: "Ka nikou, wo kai witu gorem silaka patean, kalambotan nendo, nikai tanu se domba-domba pa reretan." ³⁷ Taan witu pakasaan nyaai, nikita lembe witu se minuntung, wia nisia maupus nikita. ³⁸ Ka nyaku, kinapercayaan ka ndaai patean kaapa katotouan, ndaai kan kahai malaikat-malaikat kaapa pamarentah-pamarentah, ndaai kan kahai witu sapa-sapa tarekan yaai, kaapa sapa mange mai, kakuasaan, ³⁹ ndaai kan kahai se witu natas kaapa se witu bawah, kaapa se siniwo walina, se mampu o toro rumoumei nikita witu nupus ni Empung witu gorem ni Yesus Kristus Empung eta.