¹ Sapa tu raai kailekan niu, ei kau patuari-patuariku (Ka nyaku maila wia nisea se makailek Nukum Taurat), Ka Nukum Taurat makuasa witu natas nawak nitou kaurean nisia menou-noupe? ² Niitumong, si wewene si kimawengou, nyai kawaakes witu nukum wia si kaawuna, kaurean sia menou-noupe, taan sa sia minatemong si kaawuna tiin, nisia si bebasen witu nukum kinawengan. ³ Wo sa si wewene tiin mamuali kaawu ni tuama walina, taan si kaawuna karengan si raaipe minate, nisiamong si pailaan simiwo sina, sa sia kumaweng o si tuama walina. ⁴ Niitumong, patuari-patuariku, nikau kahai, kau minatemong witu Nukum Taurat, limalan witu nawak ni Kristus, rior kau mamuali taintu newalina, nisiamong si Yesus nyai toorei witu patean, makar nikita toro mehe wua wia si Empung. ⁵ Ka witu kita menou-noupe, witu kapaaran leona, kapaaran dosa rinangsang ni Nukum Taurat, mapaayang witu gorem nawak-eta, mehe wu'ana witu patean. ⁶ Taan, tarekan ta binebasou witu Nukum Taurat, minatemong tu sinaru sapa minaakes nikita, makar tarekan kita toro malayani, witu kaadaan weru, kumiit si Roh, ndaaimong kumiit nukum nure nyai patik. ⁷ Sa taintu, sapape lilaata? Sapa Nukum Taurat tiin, dosa? Niitu ndaai karengan, saitu putarei, nyaku ku raaimong kumenal ndosa, kacuali kumiit Nukum Taurat, ka nyaku ku raai mangarti sapa niitu mapaar taintu ne tou walina, saitu Nukum Taurat raai limila: "Tia mapaar." ⁸ Taan, dosa minindomong kasempatan limalan witu prenta tiin, rior mehe wu'ana, waya-waya kapaaran witu nawak-eku, ka sa raai wana Nukum Taurat ndosa tiin mate. ⁹ Rior nyaku matou-tou ndaai wana si Nukum Taurat, taan mangmai nukum tiin, dosa timou wo nyaku mate. ¹⁰ Wo prentah yaai, pinaindo mali witu penou-nouan, taan si minalite nyaku witu patean. ¹¹ Ka ndosa tiin minindo kesempatan witu nukum tiin, limoho nyaku wo minate nyaku. ¹² Niitumong Nukum Taurat tiin niitu kudus, wo nukum tiin kudus, nulit wo leos. ¹³ Sa taintu, sapa geleos tiin mahalimei patean wia nyaku? Niitu ndaai! Ndosa tiin mawua patean, wia goremeku limalan sapa geleos, rior nyumata dosa tiin niitu dosa, wo kaampit nukum tiin dosa mako palolohon kabardosaan na. Mengindo-ngindoan Tunggorem Nawak-Eta ¹⁴ Ka kailekanta ka Nukum Taurat tiin niitu rohani, taan sa nyaku, ku jasmani kawangker witu mbawa dosa. ¹⁵ Ka nyaku ku raai mangarti, sapa pasiwongku, ka nyaku ku raai masiwo sapa kapaareku, taan nyaku masiwo sapa kasesooku. ¹⁶ Taan sa nyaku masisiwo sapa-sapa ndaai kapaareku, nyaku masetuju Nukum Taurat tiin geleos. ¹⁷ Niitumong tarekan, ndaaimong nyaku si masiwo, taan ndosa si tumou wia goremeku. ¹⁸ Ka kailekangku, ndaai wana si geleos wia gorem nawak-eku, niitu tunggorem leonaku, ka kapaaran tiin, wia goremeku, taan samasiwo geleos niitu ndaai. ¹⁹ Ka nyaku raai masiwo geleos, witu kapaarangku, taan nyaku masiwo lewo ndaai kapaareku. ²⁰ Niitumong sa aku masiwo sapa-sapa ndaai kapaareku, niitu ndaaimong nyaku si masiwo niitu, taan dosa si tumou wia gorem nawak-eku. ²¹ Wo nyaku minakaindo nukum yaai, niitu: Witu nyaku paar masisiwo sapa niitu geleos, kalewoan kahai mawali-wali nyaku. ²² Ka nyaku mapaar nukum ni Empung, tunggorem nateku, ²³ taan ku nyai kaloho nukum walina, witu gorem anggota-anggota nawak-eku maberjuang, masaru nakal budiku, wo tumawan nyaku, witu gorem nukum dosa witu gorem anggota-anggota nawak-eku. ²⁴ Nyaku ku tou silaka! Sei si toro lumempot nyaku witu nawak patean yaai? ²⁵ Syukur wia si Empung, lumalan witu si Yesus Kristus! ²⁶ Niitumong kaampit nakal budiku, nyaku malayan nukum ni Empung taan witu nawak-eku jasmani nyaku kahai malayani nukum dosa.