¹ Niitumong sapa pe lila-ata? Sapa kita memehe-mehe masiwo ndosa rior anugerah mako mahawes? ² Tantu niitu ndaai! Kumurapa sakita minatemong witu dosa tu toro kita tumou tunggorem niitu? ³ Kaapa sapa raai kailekan niu, ka kita waya ta nyaimong lendem tunggorem Yesus Kristus, wo ta nyainong lendem witu kapapate na? ⁴ Niitumong nikita ta kinuburou mawali-wali nisia, witu nikita nyai lendem, witu gorem kapapatena, rior masuat tanu si Yesus si nyai toorei witu nantara ne tou minate, limalan witu kamuliaan ni Bapa, nikita kahai toro kumelang tunggorem kaweruan penou-nouan. ⁵ Ka, sakita, ni esa mong mawali-wali nisia, tunggorem kasusuatan kapapatena, nikita nulit kahai ta esan tunggorem kasusuat katotoornamei. ⁶ Kailekanta ka, tou ureta sinalipou mawali si Kristus, wo nawak dosa ta ndaai nyai liong, makar nikita raai mahamba pe witu dosa. ⁷ Ka, si tou sa sia minatemong sia si binebasou witu dosa. ⁸ Tarekan, sakita minatemong mawali si Kristus, ta mapercaya ka nikita ta tumou mawali-wali nisia. ⁹ Kailekan tamong, ka si Kristus si nyai toorei witu nantara ne tou minate, si raaimong mate sumaup, si patean tiin si raaimong wana si kuasa wia nisia. ¹⁰ Ka witu kumura sia minate, nisia minate sinaru dosa makasa te makar kaure-ure, taan witu kumura sia tumou, nisia timou wehe si Empung. ¹¹ Taintukan kahai nawak-emu, nikou kou pakiwehen sumadar, ka nawak-emu minatemong witu dosa, wo tumou wehe si Empung tunggorem Kristus Yesus. ¹² Niitumong, tia mawaya dosa tiin kumuasa nawak-emu, kaayo kau mataat witu kapaaran na. ¹³ Wo tia maseserakan pakasaan wia nawak-emu tiin witu dosa, mamuali alat masiwo lewo, taan serakanako nawak-emu witu si Empung, sia si timoumei sumaup witu nantara ne minate, wo nanggota-nanggota nawak-emu mamuali alat kaulitan ni Empung. ¹⁴ Ka dosa ndaai kumuasa tu natas-emu ka nikou ndaaimong tumou witu bawa Nukum Taurat, taan witu bawa anugerah ¹⁵ Niitumong sapa siwonta? Sapa nikita sumiwope dosa ka nikita raaimong menou-nou tumbawa Nukum Taurat, taan witu mbawa anugerah? "Niitu daai karengan! ¹⁶ Nikau toro makailek, ka witu kau sumerakan nawak niu mamuali budak malinga-linga witu sapate niitu, kaapa si tou niko mamuali budak si palilingaan nu tiin, leositu witu dosa si mahali nikou witu patean, kaapa witu si palinga-lingaanu si mimpin nikou tumoro kaulitan. ¹⁷ Taan, mawehe syukur wana si Empung, ka nikau rior kau budak dosa, tarekan kau malinga-lingamong kawutaan nate, witu pokok-pokok pahajaran nyai ajar wia nikau. ¹⁸ Ka nikau, binebasou witu ndosa, nikau tarekan mamuali budak kaulitan. ¹⁹ Nyaku maila mapake nistilah, setou ka kalemahan leo na niu. Ka tanu rior, nikau maserakanako nanggota nawak niu mamuali budak kanajisan wo kalewoan, sumampet witu kalewoan lebe roou, tarekan serahkanomako nanggota-nanggotamu mamuali hamba kaulitan, sumampet witu pengudusan. ²⁰ Ka kau witu pe minamuali budak dosa, nikou bebasete witu kaulitan. ²¹ Taan sapa kauntungan niu kinaindoan niu, witu pakasaan siniwo niu, wo tarekan sumiwo nikau mairang. Ka kamurian pakasaan nyaai niitumong patean. ²² Taan tarekan, kabebebasete witu ndosa, wo nihambamong ni Empung, nikau makaindo wu'a na tu natas kasucian kamurian penou-nouan raai si kaapuan. ²³ Ka gaji dosa niitumong patean , taan karunia ni Empung niitu penou-nouan ndaai si kaapuan tunggorem ni Yesus Kristus Empung-eta.