¹ Patuari-patuari, kapaaran nateku wo sombayangeku, wana si Empung wehe mako tu nisea, sea waya toro kalempot. ² Ka, nyaku toro sumaksi kumura sea, ka nisea se wewehan semangat wia si Empung, taan raai mahalas witu pangatahuan nulit. ³ Ka nisea raai makailek kaulitan ni Empung wo maulit matotoor kaulitan neate sandiri, nisea raai tuutuk witu kaulitan ni Empung. ⁴ Ka si Kristus siamong si limekep Nukum Taurat mina muali kaulitan witu si tou percaya. ⁵ Musa minatik kumura kaulitan minalas witu Nukum si tumou ka niitu. ⁶ Taan, kaulitan minalas witu iman limila tanai: "Tia maila tunggorem natemu, sei sia si sumeret na sorga?" Nartina, maali mei si Kristus tumumpa. ⁷ Kaapa "Sei si tumumpa witu jurang kapatean?" Nartina, maali si Kristus sumeret witu nantara ne tou minate. ⁸ Taan sapa pailaana? "Firman witu te ntawimu, niitu witu gorem sumamu, wo tunggorem natemu." Niitumong pailaan imam pahabar nai. ⁹ Sa kaampit sumamu, nikau mangaku ka si Yesus tiin si Empung, wo mapercaya witu gorem natemu, ka si Empung timoorei nisia tu nantara ne tou minate, nikau kalempot. ¹⁰ Ka kaampit nate, si tou mamuali percaya, makar sia makaindo kaulitan, wo kaampit suma, si tou mangaku makar sia toro kalempot. ¹¹ Ka buk suci limila: "Sei te si mapercaya wia nisia, si raai ako pairangen." ¹² Ka ndaai wana pabedaan witu nantara ne tou-tou Yahudi wo setou-tou Yunani, Empung si esa, sia si Empung ne pakasaan, wo mahawes karengan kakayaan witu pakasaan setou matowa nisia. ¹³ Ka, "Pakasaan tou se matowa tunggorem ni Empung sea se lempot." ¹⁴ Taan, kumura nisea matowa nisia si raaipe papercayan nea? Wo kumura sea toro mercaya nisia, si raaipe pinalinga-linga nea mako? Wo kumura sea malilinga sa raai wana si mahabar nisia? ¹⁵ Wo kumura sea toro mahabar nisia sa sea raai reho? Tanu nyai patik: "Kasa geleos karengan nae-nae ne, mahalimei nahabar leos!" ¹⁶ Taan ndaai pakasaan setou makiit nahabar leos tiin, ka si nabi Yesaya limila: "Empung, seimong si minercaya witu nahabar lininga nea wia nikai?" ¹⁷ Niitumong, iman tiin mondolei witu sapa liningata, wo palinganta witu Firman Kristus. ¹⁸ Taan nyaku moi: "Sapa setou tiin raai liminga?" Niitu lininga nea ka, "Suara nea palilingan wia pakasaan kaoatan, wo pengila-ngila nea palilingan makar tempok kaoatan." ¹⁹ Taan nyaku lumila: "Sapa se bangsa Israel raai mangarti niitu?" Katare, Musa limila: "Nyaku ku tumoorei teir-emu, wia nisea se raai esa bangsa, wo tumoorei nupi niu, witu se bangsa wengel." ²⁰ Wo kaampit berani, Yesaya limila: "Nyaku ku kinaindoan ne tou, raai maser nyaku; Nyaku ku mapaloloho nawak eku wia nisea, se raai mawoi nyaku. ²¹ Taan, kumura se bangsa Israel, sia lumila: "Kalambotan nendo nyaku ku timempango mako lawaseku witu se bangsa raai malinga-linga wo mababantah te."