¹ Wo nyaku moi, "Sapa si Empung timolakou seumat-Ena?" Ndaai karengan, ka nyaku sandiri ku tou Israel, taranak ni Abraham witu suku Benyamin. ² Si Empung si raai timolak seumat-Ena, se sinisirnamong witu katare-tare. Sapa raaipe kailekan niu, sapa nyai lila witu buk suci kumura si Elia, niitu sia dumawa se Israel witu si Empung? ³ "Empung, nisea se minunu'umong se nabi-nabi mu, sea se rimombe-emong mezbah-mezbahmu, wo nyaku mokan sandiri si menou-nou, wo nisea se paar karengan mawuwunu nyaku." ⁴ Taan, sapa tanggapan ni Empung witu nyai lilaame wia nisia? "Nyaku wewehane pitu ngariwu 7.000 tou se wia nyaku, se raai mina kundu-kundu mako witu si Baal. ⁵ Taintukan kahai tarekan, wewehane esa si sinisir, minalas witu anugerah. ⁶ Taan sa minalas witu anugerah, tiin ndaai mong kahai minalas witu peniwo-niwon, ka sa taintu, anugerah tiin ndaaimong pailaan anugerah. ⁷ Wo kumura? Se bangsa Israel, minagagal minakaindo peneron nea, taan nisea sesinisir, se minakaindo niitu, wo se walina kahai se kimete nate nea. ⁸ Tanu nyai patik: "Nisea winehan ni Empung Roh mapepereng beren, se raai toro lumoho, wo lunteng ndaai malilinga, makar tarekan." ⁹ Wo si Daud lumila: "Waya momako meja perjamuan nea, mamuali paan wo papaan, mamuali watu kasuusuan, wo mawawaer nisea. ¹⁰ Maanong beren nea rimbunen, rior nisea raai maloloho, wo ruur nea reko mako memehe-mehe." ¹¹ Wo nyaku moi, sapa sea kasuusu makar kanawu? Niitu ndaai karengan, taan witu palangkoi nea kalempotan minai witu se bangsa-bangsa raai Yahudi rior sea matiir. ¹² Ka, saitu palanggaran nea mamuali kakayaan wia kaoatan wo kagagalan nea mamuali kakayaan ne bangsa-bangsa raai Yahudi, lumembe mako niitu kasempurnaan nea! ¹³ Tarekan nyaku lumila wia nikau, ei bangsa-bangsa raai Yahudi, ka nyaku, ku rasul wia se bangsa-bangsa raai Yahudi, nyaku mamulia palayanangku, ¹⁴ rior nyaku toro sumiwo se patuari bangsaku, matiir, wo lumempotei pira tou wia nisea. ¹⁵ Ka witu tinondoan nea tiin, nartina pandamean wia natas kaoatan, sapa nartina tumerima nisea lumaengko witu tumou tu nantara ne tou minate? ¹⁶ Saitu roti katare niitu kudus, pakasaan nyai sembor kudus. Wo saitu kalatena kudus, saang-saangena kahai kudus. ¹⁷ Taan, saitu pira saang, rinepuumong, wo nikou, ka sengeemei sumurumei saang walina, nyai cangkok, tu nantara nea, wo makaindo wewetengan witu kalat, wo seringena kayu zaitun tiin. ¹⁸ Tia nikou mamuali sombong witu saang-saang tiin. Taan sa nikou sombong, gena-genangen, ka ndaai nikau si timongka kalat, taan kalat timongka nikau. ¹⁹ Nikou wona woo lumila: "Saang-saang tiin repuun, rior nyaku toro cangkok witu." ²⁰ Nulit niitu, sea se rinepu ka ndaai kapercayaan nea. Taan nikau tumoor rendai ka iman. Tia nikou masombong, taan maindeemong. ²¹ Ka sa si Empung raai maupus saang-saang asli, nisia kahai si raai maupus nikau. ²² Niitumong, gena-genangen, kaleosan wo kakarasan ni Empung, kakarasan wia nisea se nyainong kanawu, taan kaleosan na wia nikau, sa kau menaate tunggorem kaleosana, sa raai, nikau kahai, kau ketoren. ²³ Wo nisea kahai, sa sea memehe-mehete witu ndaai mapercaya nea, nisea kahai se cangkokako, ka si Empung makuasa cumangkokako sumaup nisea. ²⁴ Ka sa kau kinetorou witu sapa timou mei sandiri niitu kayu zaitun liar wo nyai cangkok witu kayu zaitun nyai tanem, minalaengan o sifat emu lebe-lebe nisea se saang karengan, cangkokako witu kayu zaitun nea sandiri? ²⁵ Ka patuari-patuari, nyaku ku raai mapaar, makailek rahasia yaai, rior nikau raai maanggap nawak niu bijaksana, ka witu kaketean rookos nimawu nomei witu se pira bangsa Israel makar witu palelekepan ne bangsa-bangsa walina mai. ²⁶ Mako taintu, pakasaan setou Israel se lempot waya. Tanu nyai patik: "Si matutubus si minai witu Sion, wo nisia si sumingkirako kalewoan witu si Yakub. ²⁷ Wo nyaaimong kakawaren-kakawarengku o nisea, witu nyaku mangkatei dosa-dosa nea." ²⁸ Kumiit ninjil, nisea se musuh ka ni nikau, taan kumiit pasisiran nea, nisea setou-tou se kaupus ka se tu'a-tu'a nea rior. ²⁹ Ka anugerah wo patowaan ni Empung ndaai toro batalen. ³⁰ Ka masuat o nikau, riorako kau raai malinga si Empung taan tarekan, timerimamong kaupusan wo kaleosan witu ndaai malinga-linga nea. ³¹ Taintukan kahai nisea tarekan se raai taat, rior witu nupus ni Empung, nyai nyata wia nikau, nisea kahai, se makaindo kaupusan wo kaleosan. ³² Ka si Empung timampa momako nisea waya witu gorem ndaai malilinga nea rior nisia toru tumuru mako kaupusan, kaleosan witu pakasaan ne tou. ³³ Oh nurep karengan kakayaan wo kabijaksanaan wo pengetahuan ni Empung! Ndaai kaselidikan kaputusan-kaputusan na, wo ndaai kadugaan lalan-lalan na! ³⁴ Ka se si makailek pikiran ni Empung? Kaapa seimong si toro mehe mako tuturu? ³⁵ "Kaapa seimong si tou si minehemomako sapa-sapa wia nisia tumuurei rior, wo tu waeran namei?" ³⁶ Ka pakasaan mbia witu nisia o mai, wo wia nisia, wehe nisia kamuliaan makar raai si kaapuan! Nulit.