¹ Maile-ilek sa kau masiwo paayangen nagamamu tusinaru netou, tia kakou paar palolohon nea, sataintu nikau ndaai makaindo sapa-sapa wia si Empung nasurga. ² Niitumong, sa kau mawewehe sapa-sapa tia kou lumengku terompet tusinarumu tanu se tou-tou munafik se masiwo tu sinagoge-sinagoge kaampit witu lalan-lalan rior sea pemuji-mujin netou walina, nyaku maila kaulitan wia nikau ka nisea se minakaindomong gaji nea. ³ Taan sa kau minehemong pereseng tia pawaya lawasemu kawihi makailek sapa nyai wehe mako lawas leleosemu. ⁴ Rior peresengemu tiin kasindek wo si Bapamu si lumoho nyai kasindek tiin si mehe gaji wia nikou. ⁵ "Wo sakou masombayang, tia kau tanu se tou munafik, ka nisea se paar tumoor wo masombayang witu sinagoge-sinagoge wo witu nduhuna lalan. ⁶ Taan sa kau masombayang muntep witu kamaremu wo kusianei pepenet wo tumuur sumombayang witu si Bapamu witu tampa nyai kasindek wo si Bapamu si lumohomei nyai kasindek, wo sia mehemei gaji wia nikou. ⁷ Wo sa kau sumombayang, tia mapake lila ndaai pangartianea tanu pasiwon ne tou-tou raai kumenal si Empung, ka paila neatu saitu lambot paila, niitu lingan ni Empung. ⁸ Niitumong, tia tanu nisea kasi Bapamu makailek sapa papandungen niu kau raaipe kimiwehe wia nisia. ⁹ Sumombayang asaren nyaai: Empung nai waname surga, pakudusenai ngaranemu, ¹⁰ maimong karajaanemu, mamualimong kapaaremu wia kaoatan tan wana sorga. ¹¹ Wehanei nikai tu nendo yaai kakanen toro kanenay ¹² wo ampunganei kasumelokanai, tanu nikai mampungako se tou simelok nikai ¹³ wo tia pahalin nikai witu pemaawaan taan wetaamei nikai witu kalewoan, ka nikou te si makataintu karajaan wong kuasa, wong kamuliaan makar kaure-ure. Nuut. ¹⁴ Ka sa nikau mampungako kasu melokan ne tou walina, Bapa wana surga mu kahai si mampung nikou. ¹⁵ Taan sakau tia mehe mako ampungan witu se tou walina, Bapamu kahai si raai mehe ampung witu kasu melokanu. ¹⁶ Wo sa kau mapuasa, tia mamuru-murungan tanu se tou munafik ka nisea se selok gio nea rior palolohon ne tou se mapuasa nyaku maila kaulitan wia nikau ka nisea si minakaindomong gaji nea. ¹⁷ Taan nikau samapuasa, lana nako rookosemu wo rumiambus, ¹⁸ rior puasamu tiin ndaai lohon netou, taan si Bapamu si witu kasindekan. Wo si Bapamu si lumohomei pasiwonu witu kasindekan tiin si maerei wia nikou. ¹⁹ Tia maerur witu nawak mute kakayaan wia kadatan, tampa ne keeket wo karat malewo, wo nai indon ne rongkit tu rongkitenea. ²⁰ Taan eruren witu nawak mute kakayaanu na surga, se keeket wong karat ndaai lumewo, wo ndaai rongkiten ne rongkit. ²¹ Ka witu tampa kakayaan winehanu niitu, wituran kahai natemu witu. ²² Mberen minamuali soloan nawak. Niitumong sa geleos berenemu pakasa nawakemu mamuali terang ²³ taan saitu berenemu lewo. Pakasa nawakemu minawuta karimbunan. ²⁴ Ndaai wana sitou mapaayang witu serua tuan ka sia si maseso si tuan esa wo si maupus si walina kaapa sia si malinga-linga witu si tuanesa, wo raai malinga si esa. Nikau ndaai kapaayang witu si Empung wo roroiten. ²⁵ Niitumong nyaku lumila wia nikau, tia mainde-inde witu penou-nouanu sapa patitikohoniu kaapa pa noonotenu. Taintukan kahai nawakemu sa sapa toro lambungenu. Ndaai reen penou-nouwan kasa pa genangen taan titikohon, wo nawak taan lala lambungen? ²⁶ Lohone se burung na langit, se raai matanem taan se mahupu, wo se raai maerur witu paharuran, taan si Bapa wana surga mawehe sea kuman. Ndaai reen nikau si lembe paargan taan nisea? ²⁷ Sei si wia nantara niu ka si maide-inde si toro mawes sangarepa witu numurena? ²⁸ Wo kumura lalambungan, kaa kau mainde-inde? Lohon niu mbungang bakung witu padang, kumura sea tumou, sea se raai madaayang wo sea kahai se raai mawilit, ²⁹ taan nyaku lumila wia nikau, si Salomo witu pakasa kamuliaanna si raai limambung tanu mataasaane witu mbungang tiin. ³⁰ Niitumong saitu dukut witu padang, bitu nendo yaai mawoondomei lahawa mako witu baha, si Empung si gumeleos niitu, ndaai ree nikau si lembe, ei kou si raai kasa wewehan iman? ³¹ Niitumong tia talousou mainde-inde wo lumila, sapa toro kanenai kaapa sapa toro noo notenai? Kaapa sapa toro lambungen nai? ³² Ka se bangsa-bangsa se menero-nero pakasaan nyaai, wo si bawa wana sorga makailek nikau maperlu pakasaan nyaai. ³³ Taan serone katare karajaan wo kaulitan na, wo pakasaan nawesei wia nikou. ³⁴ Niitumong tia mainde-inde kumura nendo woondo ka nendo woondo mapaindeete nawakenate. Toromong esa ngaendo wo kapeendisan sandiri.