¹ Kaloloho se tou laker tiin, Yesus sumeret witu kuntung, karuruhumun ena wo sea mai setou-touna wia nisia. ² Wo sia muka sumana wo majar nisea, lilaana: ³ "Kamangenei se tou raai si sapa-sapa yaai kaniseamong se makataintu karajaan surga. ⁴ Kamangenei sea sewitu kasusaan kanisea se sena-senangen. ⁵ Kamangenei se tou leos ate kanisea se makataintu katanaan. ⁶ Kamangenei se tou maharem wo mareo kaulitan kanisea sewesun. ⁷ Kamangenei se tou paar mawewehe sapa-sapa ka nisea semakaindo sapa-sapa pemandungen nea. ⁸ Kamangenei se tou beresi ate kanisea selumoho si Empung. ⁹ Kamangenei se tou paar madadame kanisea se pailaan oki-oki ni Empung. ¹⁰ Kamangenei se tou pawantian ka makiit kaulitan, nisea se makataintu karajaan surga. ¹¹ Kamangenei kau sakau paseseroan wo memanti nikau wo maila sapate lewo wia nikou wo papasangkan ka kau mengiit nyaku. ¹² Mapela-pelaamong kau, ka sela karengan mbehe wana surga ka taintumong pasiwo-siwon nea mawanti se nabi rimiorako nikau." ¹³ "Nikau, kau mamuali mburas kadatan, taan saitu buras tiin minaranomong kaampit sapa niitu patetenon? Sia si raaimong si kaaraan, si tereko kanako wo sia pelee-leek netou. ¹⁴ Kau mamuali nterang mbanua. Kota witu natas kuntung ndaai toro sindek. ¹⁵ Se tou kahai se raai tumutung susumbuan wo tu weta nea mako witu gantang, taan wehe nea mako witu tampanate wo sia toro mehe terang witu nggorem mbale. ¹⁶ Maanong nterangemu malayas tanu sosoloan tiin wo sea toro lumoho pasiwonniu geleos wo sea meloo-loor si Empung wana surga." ¹⁷ "Tia kau magenang nyaku minai mararai nukum torat kaapa buk nenabi-nabi. Nyaku minai ndaai mararaai niitu taanku malelekep niitu. ¹⁸ Nyaku maila nulirkarengan wia nikau: makar langit wo kaoatao maapu wo ndaai wana siesa nyai patik witu paliliong tu nukum taurat makar pakasaan simampetou. ¹⁹ Niitumong seite sitou mararai, mataasaane witu prenta-prenta kasa oki tiin wo mahajar se tou walina sumiwo tanu niitu, sia sipailaan oki karengan tunggorem karajaan surga; tanu sei sipailaan sela witu nggorem karajaan surga. ²⁰ Ka nyaku lumila wia nikau, saitu pakasa kaulitanu ndaai kasa geleos, wo kaulitan ne ahli-ahli taurat we se tou Farisi, nikau tia magena-genang munte witu karajaan surga. ²¹ Lininga niumong sasapa nyai lila witu se tua-tua ta rior, tia mawunu' tou wo sei si mawunu' tou sia si alin witu pengadilan. ²² Taan nyaku lumila wia nikou, sei si maupi si patuarina sia si toro ukumen, wo sei si lumila wia si patuarina, nikou meemeng sia si toro alin witu Mahkamah Agama, wo sei kahan si lumila nikou keso sia si untep mbaha naraka. ²³ Niitu mong sakau mahali persembahanemu witu sinaru altar, wo kou kagenang kasipatuarimu wehan sapa-sapa wia nikou, ²⁴ telaau mako persembahanemu tiin witu sinaru altar, wo mange marior-rior maleosan osi patuarimu, sa raai mong niitu tare ko mareng sumaup wo itu sembahmako persembahanemu tiin. ²⁵ Mako marepe-repet maleosan o se tou matudu nikou, sakou makelang mawali-wali o nisia rior se natuduh nikou seraai sumerakan nikou witu si hakim, wo si hakim tiin sumerakan nikou witu se tou na wo kou yuntep nea mako witu mbui. ²⁶ Nyaku maila ulit wia nikou, nikau kau raai kaondol witu niitu makar kou maer roit kamurian. ²⁷ Nikau lumingamong nyai lila, tia masiwo sese. ²⁸ Taan nyaku lumila wia nikau ka seite sitou sia kaloho siesa wewene wo sia mapaar nisia, sia si simiwo mong sese' o si wewene tiin witung gorem natena. ²⁹ Sa mberen leleosemu simiwo nikou maberdosa, kaitenei mberen tiin wo itu terekako, ka tai mong nikou kaliongan nesa wia nawakemu, taan pakasaan nawakemu terek witu nggorem naraka. ³⁰ Wo saitu lawas leleosemu sumiwo nikou maberdosa, ketoren niitu tu terekako, ka taimong kou kaliongan nesa wia nawakemu, taan pakasaan nawakemu terekako witu nggorem naraka. ³¹ Nyainong lila: Sei si macecere si wewene kaawuna, si pakiwehen mehe mako surat cere witu si wewene kaawuna tiin. ³² Taan nyaku lumila wia nikau, ka sa sei si tuama macecere si wewene kaawuna ndaai ka si simiwo sese, sia si simiwo si wewene kaawuna sese. Wo sei si tuama kumaweng osi wewene tiin si nainong cere tiin sia kahai si simiwo mong sese. ³³ Makasape Kahai, nikau luminga mong nyai lila ' ne tu'a-tu'ata rior tia masumpah towo, taan wutan sumpahmu tiin tu sinaru ni Empung. ³⁴ Taan nyaku lumila wia nikau, tia kasumpa-sumpah mahali-ali surga,ka surga tiin pahenaan ni Empung, ³⁵ kaapa masumpah mahali-ali ntana', ka tana' yaai minamuali leleekan nae na, kaapa mahali-ali Yerusalem ka niitu kota ni Raja Sela. ³⁶ Tia' kahai nikau masumpah mahali-ali rookosemu ka nikou raai toro kasiwo esa wuuk puti' kaapa item. ³⁷ Taan siwonako pailaamu en sa en, ndaai sa ndaai, ka lembeh niitu wia si lewo o mai. ³⁸ Nikau lumingamong sapa nyai nea lila: Weren sawelan weren, waang sawelan waang. ³⁹ Taan nyaku lumila wia nikau, tia pasarun si lewo, taan sei si sumepe nggio leleosemu, wehe mako kahai giomu walina kahai. ⁴⁰ Wo sa wewehan tou makiwehe nikou maindo lambungemu, wehanako sia lambung pemasoan wia nisia. ⁴¹ Wo se si mapaksa kumelang nesa mil, mako kumelang o nisia rua mil. ⁴² Wehanako si tou makiwehe wia nikou wo tia patondo sitou mapipinjang wia nikou. ⁴³ Nikau lumingamong nyai firmanei, kau pusako se kasuat tou wo kaseso' mako se kasarumu. ⁴⁴ Taan nyaku lumila wia nikau, kaupusako se kasaru-kasarumu wo sombayangako sea waya se maweewel nikau, ⁴⁵ mako taintu nikau mamuali oki-oki ni Bapamu wana surga ka nisia si minondolei si en do na wia se tou lewo wo se tou leos wo tumumpamei nuran wia se tou leos wo se tou lewo. ⁴⁶ Ka sa kau leosete witu se tou maupus nikau, sapa gaji kaindoan niu? Ndaai reen se maherut pajak se masiwokan kahai masuat? ⁴⁷ Wo sa kau masigiite witu se patuari-patuarimu, sapa lembena wia nikou? Ndaai reen se tou-tou se raai makailek si Empung kahai se masiwo taintu? ⁴⁸ "Niitumong, nikau mamuali tou ndaai si kurang sapa-sapa tanu si Bapak niu na surga, si raai wana si kurang sapa-sapa."