¹ Tumondong niitu sepira tou Farisi wo se ahli-ahli taurat tu Yerusalem mai witu si Yesus wo lumila: ² "Kaa se murid-emu se malawet kabiasaan ne tu'a-tu'a rior? Ka nisea se raai maowas lawas nea sa ma-kan roti." ³ Wo wingkotenei ni Yesus sea wo lumila: "Kaa kau kahai malawet prentah ni Empung ka magenang kabiasaanniu? ⁴ Ka si Empung si minehemei firman "Paormatan si papa wo si mamamu" wo sei si makutuk si papana kaapa si mamana si ukumen mate. ⁵ Taan nikau maila, "sei te si maila mako witu si papana kaapa mamana, sapate pawehemei wia nikou, nyai nong sembahme wia si Empung," ⁶ sia tiamong maormat si papana kaapa mamana. Mako taintu, nikau rimaaimong firman ni Empung kamagenang kabiasaanniu. ⁷ Nikau mong kau tou munafik, nulitou nubuatan ni nabi Yesaya sa kumura nikau: ⁸ Se bangsa yaai se maormat nyaku o suma nea taan nate nea ndoou wia nyaku. ⁹ Wo ndaai si kaaraan sea masembah nyaku, kaampit mahajar prenta-prenta ne tou." ¹⁰ Wo Yesus tumowaame se laker tou wo lumila: "Lingan wo genangene leos! ¹¹ ndaai sapa gumorem witu suma mananajis sitou, taan sapa minondolei witu sumana niitumong mananajis sitou." ¹² Wo mai se murid-murid Yesus moi wia nisia: Sapa kou makailek kase tou-tou Farisi tiin se kinasinggunganong luminga nyaai? ¹³ Yesus mingkot nisea, wo lumilaame "saitu tinanem tiin ndaai nyai tanem ni Bapa'ku na surga, mbuuwuten makar kalat-ena. ¹⁴ Wayamomako sea, seamong se penuntun letok witu se tou-tou letok wo sa si tou letok mahajar sitou letok, marua-rua se kanawu witu mboang." ¹⁵ Petrus lumila wia nisia: "Terangei wia nikai naandean tiin." ¹⁶ Yesus lumilaame: "Sapa kau kaaipe mangarti kahai? ¹⁷ Sapa kau raaipe mangarti ka pakasan mauntep witu suma, tumumpa witu poot wo tu tia tung kakus? ¹⁸ Taan sapa minondolei witu suma tiin wo nate, niitu mong manajis tou. ¹⁹ Ka witu nate mondolei genang lewo, mawunuan, mazina, wo dosa-dosa makairangen marongkit, masaksi towo wo masesero. ²⁰ Nyaaimong waya manajis sitou, taan ma-kan ndaai minoas lawas ndaai manajis sitou. ²¹ Tumondong niitu, Yesus rumooumei witu sia sumingkir witu mbanua tirus wo sidon. ²² Wo wewehan si wewene tou kanaan si witu mbanua tiin o mai, mangemai wo lumila mako, "kaupustemei aku, Empung, oki ni Daud, si oki iku wewene si niutepan ni Roh lewo, wo sia si sakitan wuter." ²³ Taan si Yesus raai miningkot si wewene tiin, sapa-sapa wo mange mai se murid-murid ena sumeesek nisia o lumila: "Rehomome sia mangemong kasi mereke-rekei tumurita." ²⁴ Wo sia lumila wia nisea: "Nyaku ku nyai rehomei mako witu se domba-domba nyai kaliong tu se tou Israel." ²⁵ Wo sia mai si wewene tiin wo sia kumundu tu sinaru ni Yesus, lumila: "Empung, sawanganei nyaku!" ²⁶ Taan si Yesus mingkot wo lumila "Ndaai geleos mindomei roti taintu ne oki wo tulahawa mako tu se asu." ²⁷ "Nulit niitu Empung, taan seasu-asu tiin se ma-kan telaau, nyai katiaamei tu meja ni tuan-ena." ²⁸ Wo Yesus lumila wia nisia, "Ei kou wewene, Imanemu sela! Mamualimong wia nikou sapa kapaaremu." Niitukan si okiina wewene si mehete minaleos. ²⁹ Yesus rumoumei witu si kumelang kumiit liilik lour Galilea wo sia sumeret witu kuntung sia rumuhumun witu. ³⁰ Wo sea mange mai wia nisia se tou laker mahalimei setou-tou raai kakelang, sepelaan, letuk wo se wowo, wo se tou laker walina wo sea tekel nea mako se tou tiin tu nae ni Yesus, wo sea leosena waya. ³¹ Makar se tou laker tiin maera-erang, lumoho sitou wowo si masirita mong, si pelaan si lineosou, wo si raai mon makelang, si makelangou wo si letuk si malolohomong. Wo sea waya meloo-loor si Empung. ³² Wo Yesus tumowa'ame se murid-murid ena, lumila: "Nyaku ku maupus setou-tou tiin, ka se mawali-wali mong nyaku telu ngaendo wo ndaai wana si kakanen wo nyaku tia marereho nisea mareng witu naharem rior sea raai mapusing witu lalan. ³³ Se murid-murid ena lumila mako, wia nisia: "Wisa nikita toro makaindomei roti laker wia tampa kasindekan yaai mawesu se tou laker tiin." ³⁴ Yesus moi nisea, "Pira kalakeran roti wia nikau? mingkotei sea: Pitu pe wo sesera oki woo pira. ³⁵ Wo si Yesus lumilaame se tou laker tiin "Rumuhumun witu tana." ³⁶ Tu indonamei pitu roti ose sera tiin, wo kaampit mineheme syukur, tu pengimbi-ngimbiina, tu wehe namako witu se murid-murid ena tu seker nea mako witu se tou laker tiin. ³⁷ Sea waya se ki-man makar mawesu, tu indonemei minatelau wewehane pitu ngakaranjang wuta. ³⁸ Nisea kiman kalakeran nea epat ngariwu tuama ndaai kauntep se wewene ose oki-oki. ³⁹ Sia Rumeho mako se tou laker tiin mareng, wo si Yesus sumeret witu londei tumoro witu mbanua magadan.