¹ Maimong kahai setou-tou Farisi wo se tou Saduki se mawawaana si Yesus. Maki wehe wia si Yesus papalohomei wia nisea tanda wana surga o mai. ² Taan si Yesus mingkot nisea, "Sa mangewi mong nikau lumila, kadatan terang geleos ka langit rimaindangou. ³ Wo witu momoodo, nendo yaai wewehan rege sela ka langit raindang wo rimbun. Kailekan niu kumura mabebeda kaadaan langit taan kau raai mabebeda tanda-tanda nendo kamurian. ⁴ Si esa taranak si lewo wo si masina yaai makiwehe ntanda taan nesa tandate ndaai wehe mako tunisea. Kacuali tanda ni nabi Yunus. Wo sia tumelaau mako nisea o sia mange. ⁵ Kaayomako se murid-murid witu sangaweka lour, se minaliur mali roti. ⁶ Wo Yesus lumila wia nisea: "Genangen leos wo mile-ilek witu ragi netou Farisi o Netou Saduki. ⁷ Wo sea tumuur masirita nyaai witu nantara neate wo lumila: "Nyaai kakita raai minalimei roti." ⁸ Taan si Yesus makailek niitu wo sia lumila: "Ei kau tou si raai kasa wehan iman kaa kau masirita wia nantara niute, ndaai wana si roti? ⁹ Sapa kau raape mangarti, wo minaliurou 5 ngariwu tou, wo pirape karanjang timelaau, nierur niu? ¹⁰ Kaapa pitu roti nyai wehe se epat ngariwu tou, wo pirape karajang minatelaau nierur niu? ¹¹ Kumura tu raai pangartian niu kanyaku ndaai masirita wia nikau kumura roti? Taan mile-ilek witu raginetou-tou Farisi one tou Saduki." ¹² Tare pangartian nea ka nisia ndaai maila mile-ilek witu ragi roti, taan witu najaran netou-tou Farisi o netou Saduki. ¹³ Kaayo mako si Yesus witu wanua kaisarea Filipi, sia moi se murid-murid ena kumiit paila netou seisia si oki tou tiin. ¹⁴ Sia mingkotei, "setou maila si Yohanes malele, se walina maila Elia wo se walina kahai maila si Yermia, kaapa mataasaane witu se nabi." ¹⁵ Wo Yesus moi wia nisea, "Sei aku yaai?" ¹⁶ Wingkoten ni Petrus, "Nikou mong si Mesias, oki ni Empung matou-tou. ¹⁷ Yesus lumila, wia nisia, "kamangenomei kou Simon oki ni Yunus, ka ndaai Leona wo ndaha niminyata wia nikou taan si Bapa'ku na surga. ¹⁸ Nyaku kahai ku lumila wia nikou ka nikou, kou Petrus, wo wia natas mbatu yaai, ku tumoor si jamaateku wo pepenet-pepenet hades ndaai kumuasa niitu. ¹⁹ Nyaku kumehe wia nikou kukusi-kukusi karajaan surga. Wo sapate waakesenu wia kadatan kawaakes na surga. Wo sapate weta'amu wia kaoatan, kaweta na surga." ²⁰ Wo si Yesus tumegamako se murid-murid ena rior sea tia maila wia se tou ka nisiamong si Mesias. ²¹ Tumuur niitu Yesus timuruumong witu se murid-murid ena ka nisia musti mako tu Yerusalem wo mendam kasusaan laker wia se tu'a-tu'a, imam-imam kapala, wo se ahli-ahli taurat wo paten nea taan tumoorei witu nendo katelu. ²² Wo si Petrus kumehorei si Yesus maitu liilik ena, tumegor nisia wo lumila: "Empung, pakiwehen satoro si Empung na surga rumoou-roou mako niitu wia nikou nyaai ndaai toro mamuali wia nikou." ²³ Taan si Yesus mutarei nawak wo lumila tu si Petrus: "Mange kou wia si naruku, kou Iblis! Nikou mong minamuali watu kasuusuan wia nyaku, kanikou ndaai timetap natemu witu sapa-sapa wia si Empung o mai, taan sapa-sapa wia se tou o mai." ²⁴ Wo Yesus lumila witu se murid-murid ena, sei si paar makikiit nyaku sia si sumangkal nawakena sandiri, muleng salib wo kumiit nyaku. ²⁵ Ka sei si paar malelempot nawakena si kaliongan nawakena. Taan sei si kaliongan nawak ka nyaku, si si makaindo niitu. ²⁶ Sapa nuntungena sa sitou makaindo pakasaan kauatan taan si kaliongan nawakena? Kaapa sapa mbehenamako witu sitou masasawel nawakena? ²⁷ Ka si oki tou si mangemai witu kamuliaan ni Bapa na kaampit se malaikat ena wo sea mako maer witu se tou kumiit peniwo-niwona. ²⁸ Nyaku maila kaulitan wia nikau, wehan se pira tou timoor wia nyaai, se raai mendam patean makar sea lumoho si oki tou mai witu gorem karajaan na."