¹ Enem ngaendo mangemai, Yesus marui si Petrus, Yakobus, wo si Yohanes patuari ni Yakobus, wo mali nisea sumeret witu kuntung rakek sumandiri. ² Lohone si Yesus limaengou nawak tu sinaru nea. Giona materang tanu si endo, wo lambungena minutiimong makerap. ³ Wo lohone mberenea si Musa wo si Elia, masirita osi Yesus. ⁴ Wo lumila si Petrus witu si Yesus, "Empung, leosou wia nikita sia mena wia, nyaku ku tumoor telu sabuah wia. Nesa kou, nesa si Musa wo nesape kahai si Elia. ⁵ Si mailaape si Petrus kasengeemei mangemai linahak sumaput nisea wo lohon wewehan suara witu gorem linahak mailaamei: "Si yaai mong si oki iku si kau puseku, wia nisia nyaku mapaar. Lingane Sia." ⁶ Kalilinga ne murid-murid tiin nyai lilaamei se mehete timuutuk makar gionea si mampur witu ntana', wo se kinaindeanong karengan. ⁷ Taan si Yesus mai wo meosako nisea, lumila: "Tumooromei wo tia mainde." ⁸ Ka angkatemei gionea, se raai mong limoho sapa-sapa, wayate si Yesus. ⁹ Ka tutumpa temei nisea witu kuntung tiin, wo Yesus merenta mako nisea, lumila: "Tia pasisirita sapa linoho niu tarekan wia siseite makar si oki tou si toorei witu nantara ne tou minate." ¹⁰ Wo semurid tiin moi wia nisia: "Kaa si ahli-ahli taurat maila, ka si Elia mai katare?" ¹¹ Wingkoten ni Yesus: "Si Elia si mai rior, ka sia si magegeleos katare tu pakasaan. ¹² Taan, nyaku lumila wia nikau, si Elia tiin si minaimong, taan si raai katuusan nea wo pasiwoan neate tan kapaaran nea. Taintukan kahai si oki tou sia si mendam rumara tu lawas nea." ¹³ Wo se pakasaan murid-ena mangartite kasia masirita wia nisea kumura si Yohanes malele. ¹⁴ Kawawareng ni Yesus wo semurid-ena mako witu se tou laker, si tuama esa mai witu si Yesus, kumundu tu sinaruna wo maila: ¹⁵ "Empung, kaupustemei si okiiku kasia si sakitan mati-mati ayang wo sia tarekan peendis karengan, satoro na si kanawu witu mbaha kaapa ka pumpun witu ndano. ¹⁶ Nyaku, kuminalimong nisia witu se murid-murid ena taa ndaai ka leosan nea sia." ¹⁷ Wo si Yesus mingkot, "Ey kau taranak raai mapercaya wo nyai kaliong! Pirape ngaendo kaurean nyaku mena o nikau? Kaurane kawisa nyaku masabar wia nikau? Alinei si oki tiin wia nyaku." ¹⁸ Wo sia rekakename si mukur lewo tiin makar sia mondolei tusi oki tuama tiin, wo si oki tiin mehete mina leos. ¹⁹ Wo mangemai semurid-ena wia si Yesus, niseate se si mandiri o nisia wo sea moi, "Kaa nikai ndaai mamuali maure si mukur lewo tiin?" ²⁰ Lumila wia nisea: "Niitu ka iman niu noki. Nyaku maila nulit wia nikau, sa kau wewehan iman, tanuate mbatuna mbuana sesawi, nikau toru lumila mako witu kuntung tiin mera kou wia nyaai mang wanaime, wo kuntung tiin kaera, ndaai wana ndaai toro mamuali wia nikau. ²¹ [Taan si mukur tiin torooteure kaampit sombayang wo puasa."] ²² Witu nendo si Yesus wo semurid-ena minerur tumbanua Galilea, sia lumila wia nisea: "Si oki tou, si serakan nong witu lawas ne tou. ²³ Wo sea munu nisia, taan nisia si toorei witu nendo katelu liminga niitu se murid-murid tiin se masusa mong. ²⁴ Kaayo mako sea witu Kapernaum, se mengerur pajak rua dirham mai witu si Petrus wo moi: "Sapa si gurumu raai mawaer pajak rua dirham?" ²⁵ Wingkoten ni Petrus: "En." Kauntep namako witu gorem bale, Yesus si katare simirita wia nisia, "Kumura pendapatemu, Simon? Wia si sei se raja-raja tiin matagi bea wo pajak? Wia se oki-okiina kaapa tou walina?" ²⁶ Kawiwingkotete ni Petrus, "Wia se tou walina" wo Yesus lumila wia nisia: "Sa taintu se okiina se binebas. ²⁷ Taan rior kita raai suminggung nisea, makomong witu lour, wo tu lahawame mpesi. Indonei si sera katare minondolei, wo tu wukaan niu mako sumana ko makaindo nesa stater indonei ndoit tiin wehe mako tu nisea, ngaraneku wo ngaranemu."