¹ Tu nendo niitu, murid-murid mako tu si Yesus o moi: "Sei si kasela waname karajaan surga?" ² Wo si Yesus si ti mo waamei si oki witu mai tunisia, tampanamako si oki tiin tu nuner nea, ³ wo lumila nyaku lumila nulit wia nikau, sa kau mabertobat mamuali tanu seoki, nikau ndaai kauntep witu karajaan surga. ⁴ Sei si mawa nawak-ena tanu si oki yaai, nisia mong si kasawangko na karajaan surga. ⁵ Wo sei si tumerima si oki yaai tanu si yaai tunggorem ngaraneku, nisia si tumerima nyaku." Pangeengeme Kumura Ndosa Tiin ⁶ "Taan sei si maliliong mataasaan wia seoki yaai se mapercaya nyaku yaai, kasa geleos wia nisia tanua mbatu kilangan antungako witu lehe'na wo sia teneme witu laut kaurepan karengan. ⁷ Masilakamong kaoatan ka se meliong-meliong witu gorem-ena! ka taintumong paliliongan tiin, mamuali, taan silaka karengan setou masiwo taintu. ⁸ Saitu lawas kaapa naemu simiwo nikou maberdosa, ketoren niitu wo tu lahawa mako. Ka taimong nikou muntep witu katotowan kaampit lawas ndaai mong witu kaapa kou ke'ol taan kou wewehan rua lawas wo rua nae, taan kou terek witu mbaha raai mapate-pate. ⁹ Saitu berenemu simiwo kou maberdosa, sogelenei niitu tu terek-ako taimong muntep witu katotouan om beren esa, taan kou wewehan rua weren kou terek-ako witu mbaha naraka." ¹⁰ "Genangenako niitu, tia kau maila wawa si esa wia seoki yaai. Ka nyaku lumila wia nikau ka se malaikat-malaikat nea waname surga se meloho-loho gio ni Bapaku wana surga. ¹¹ [Ka si oki tou si minaimong si malempot setou nyai kaliong.]" ¹² Kumura sa nikou? Sa sitou makataintu maatus domba, taan siesa wia nisea nyai kaliong lalan, sapa si tou tiin tumelaau se siou ngapulu siou domba witu kuntung wo mange sumero siesa nyaimong kaliong lalan? ¹³ Wo sasia kinatuutu lanong, nulit karengan lila kume wia nikau, sia si mapaa paar karengan timuutul siesa nyai kaliong, taan se 99 se raai nyai kaliong. ¹⁴ Taintukan kahai, ndaai kapaaran ni Bapaku na surga sa siesa wia se oki yaai mabinasa. ¹⁵ "Sa si patuarimu maberdosa, mangewo turu mako kasumelokana, nikou te o nisia. Sa sia luminga pailaamu, kou minakaindomong si patuarimu tiin. ¹⁶ Taan sa sia tia luminga nikou, alin siesa kaapa rua tou mangesumaup wia nisia, wo witu suma nerua kaapa telu saksi, pakasaan nyai lila palingan. ¹⁷ Sa sia tumolak malilinga nisea, lilaame waya niitu witu se jemaat. Maanong sia mamuali tanu se bangsa-bangsa wo se mengerur pajak. ¹⁸ Nyaku maila kaulitan, wia nikau ka sapa winaakes-emu wia kaoatan kawaakes na surga. Wo sapa nyai niu weta wia kaoatan, niitu kaweta na surga. ¹⁹ Makasape kahai nyaku lumila, wia nikau ka sa serua tou tunantaramu minahandianong wia kaoatan, sa kumura se makiwehe sapa-sapa, niitu mamuali wia nisea tu si Bapaku si waname surga. ²⁰ Ka witu tampa nerua kaapa telu tou merur mawali-wali witu ngaraneku nyaku kahai ku witu nuner nea. ²¹ Mangemai si Petrus wako witu si Yesus wo sia moi: "Empung, makar mapira nulitena nyaku mehemako ampung witu si patuariku simiwong ndosa wia nyaku? Makar makapitu?" ²² Yesus lumila wia nisia: "Nyaku kuraai maila wia nikou makar makapitu taan makar makapitu ngapulu lepeten makapitu. ²³ Ka niitumong karajaan surga nyai andeme tanu si raja si masiwo. ²⁴ Rerekenan wo se hambana, witu sia masiwo rerekenan, sitou wewehan nutang mapulu ngariwu talenta, nia limei wia nisia. ²⁵ Ka nisia tiin raai mong kawaer nutang tiin, sia merenta mako si touna, sitou tiin si ako wangker kaampit si kaawuna wo se okiina, wo pakasaan taintuna, wo kaampit niitu wo sia maer. ²⁶ Wo si hamba tiin mai mapanawu wo kumundu witu si tuan-ena, lumila: "Sumabareemako wia nyaku wo nyaku toro maer pakasa wia nikou. ²⁷ Tumondong niitu witu si hamba tiin mikaindo pengasihan, wo mebasako wo mehe ampung tu nutangena tiin. ²⁸ Taan si hamba tiin kaondoinatemei witu, wo sia mahilekan osi hamba walina wewehan nutang maatus dinar wia nisia. Sia timboyanamei si hamba tiin wo sia kerekana kaampit lumila: "Waeren marior-rior ndoit pininjangemu wia nyaku!" ²⁹ Wo si hamba tiin mai kumundu wia nisia wo makiupus wia nisia lumila: Sumabareemako wia nyaku, waerengku waya nutang wia nikou. ³⁰ Taan nyai nate tolak wo si kaampitena tiin nyaina pumpun witu bui makar malunas nutangena. ³¹ Kaloloho nehamba-hamba walina minamuali yaai, sea se masusa karengan wo tu angenea lila si tuan-ena pakasaan minamuali. ³² Wo sia towaanamei si hamba katare tiin wo lumila wia nisia: "Kou, kou hamba lewo, nyaku ku minehemong ampung witu pakasaan nutang-emu ka kou makiupus wia nyaku. ³³ Ndaai reen nikau pakiwehen wewehan nupus witu se kaapit masuat hamba, tanu nyaku timurumong nupus wia nikou? ³⁴ Wo si tuan-na tiin si kinaampitou nupi karengan, sia wehenamako witu setou masiksa makar sia maersumaup pakasaan nutang pininjang-ena. ³⁵ Si Bapaku na surga si sumiwo taintu wianikou, sa kau raai mehe ampung tu si patuarimu tunggorem natemu.