¹ Malekep-ako pangila-ngila yaai ni Yesus, wo sia mange tu Galilea wo kaayo mako witu wanua Yudea, sangaweka salu Yordan. ² Wo setou minerur se laker karengan kimiit nisia wo sia lumeos setou sakitan waname. ³ Mangemai se pira tou Farisi witu si Yesus mawa waawa nisia wo moi: "Sapa toro si tuama si cumere si kaawuna kaampit pira alasan?" ⁴ Wo Yesus mingkot, lumila: "Sapa kau minacamong kasia si simiwo nisea tumuurei katare, mamuali tuama o wewene, ⁵ Wo sia mehemei firman, niitumong tuama tumelaau mako si papa wo si mamana, mamuali esa osi kaawuna, wo sean dua tiin mamuali esa awak? ⁶ Niitumong nisea se raai mong rua taan se minaesamong. Niitumong se niesamong ni Empung, ndaai toro patampasen ni tou. ⁷ Wo sea lumila witu si Yesus, "Kaapa si Musa merenta mako mehe surat cere wo ceremako si kaawumu? ⁸ Yesus lumila wia nisea, "ka kaketean nate niu si Musa mehe mako kaloasan wia nikou cumere si kaawumu. Taan witu katare ndaai taintu. ⁹ Wo nyaku lumila wia nikau, ka sasei si tuama cumeremako si kaawuna luarako sia simiwo zina, wo kumaweng o si wewene walina nisia bersina." ¹⁰ Semurid-ena lumila wia nisia: "satanu nyaai si tuama wo si kaawuna taimong sea raai kimaweng." ¹¹ Taan Yesus lumila wia nisea, "Ndaai pakasaan setou sepaar nyai lila tiin, kacuali sekinarunya. ¹² Ka wewehan setou seraai kimaweng ka timuur sea nyai katoumei se taintumong witu poot ni mamana, wo wewehan seraai kimaweng ka se siniwo perah ndaai makaindo oki, netou walina, wo wewehan kahai sitou perah kasiniwona sandiri perah tiin ka karajaan surga sei si tumerima nyaai, maanong tu terimana." ¹³ Tumondong niitu, se woo pira anaoki alin witu nisia rior sia toro meta mako lawasena tu natas nea wo sumombayangei nisea. Taan semurid-ena, si timegorete se tou-tou tiin. ¹⁴ Taan Yesus lumila, "Wayamomako se oki-oki tiin. Tia paapeen sea mai wia nyaku kang karajaan surga taintu ne tou-tou tanu se oki-oki yaai." ¹⁵ Ka wehe mako lawasena tu natas ne oki-oki tiin, wo sia rumoou mei witu wo kumelang. ¹⁶ Mangemai si esa tou tu si Yesus wo moi, "Guru, sapa geleos si wongku rior kumakaindo penou-nouan kaure-ure?" ¹⁷ Wo Yesus lumila wia si tou tiin, "Kaa kou mawoi wia nyaku sapa niitu pailaan leos? Nesate geleos. Taan sakou paar muntep witu gorem penou-nouan, lingan wo siwon prenta-prenta tiin. ¹⁸ Tou tiin moi wia si Yesus, "Prentah sapa niitu?" Wingkoten ni Yesus, "Tia mawunu, tia mazina, tia marongkit, tia masaksi towo, ¹⁹ paormatan si papa wo si mamamu, kaupus se kasuat tou tanu nawakemu sandiri. ²⁰ Wo si taretumou tiin lumila wia nisia, "Pakasaan nyai lila tiin siniwo kumong, sapape kahai kurang witu?" ²¹ Yesus lumila nisia, "Sakou paar mamuali rendai ndaai wana si kurang, mangemong wo tu wang kerako waya sapa mbia nikou wo itu wehemako tu setou lengei raai si sapa-sapa, wo kou wehanei narta na surga wo maimong kumiit nyaku." ²² Taan luminga mako nyai lilaamei ni Yesus, wo sia mange kaampit masuka ka nisia si tou wewehan. ²³ Wo Yesus lumila witu semurid-ena, "Nyaku maila ulit wia nikau susa karengan setou wewehan mauntep witu karajaan surga. ²⁴ Makasape kahai, Nyaku lumila wia nikau kasi lebe gampang si esa unta lumawet witu boang ketengen, taan si tou wewehan mauntep tung karajaan surga." ²⁵ Kalilinga nea niitu se murid-murid ena, se maerang karengan, wo lumila, "Sa taintu sei si toro lempot?" ²⁶ Kaampit lumoho nisea, Yesus lumila, "Wia setou nyaai ndaai mamuali, taan wia si Empung pakasaan toro mamuali. ²⁷ Wo si Petrus lumila wia nisia, "Lohone, nikai timelaaumomei pakasa waya mai kumiit nikou, niitumong sapa kaindoan nai?" ²⁸ Wo Yesus lumila wia nisea, "Nyaku maila nulit wia nikau, ka kau makiit nyaku witu kaoatan weru sa si oki tou tiin si rumuhumun tun tahta kawangkoan na, nikau kahai kau rumuhumun witu mapulu rua tahta mamuali hakim witu se mapulu rua suku ne Israel. ²⁹ Wo seite sitou si timelaau momei mbale, si patuarina tuama, patuarina wewene, papa, mama, se oki kaapa numana ka nyaku, se makaindo maatus lumepet wo warisan penou-nouan ndaai si kaakaran. ³⁰ Taan se laker tou se katare mamuali kamurian, wo se kamurian se mamuali katare."