¹ Tu nendo niitu mangemai si Yohanes malendem mahotbah witu padang karukutan Yudea ² sia lumilaame : "Matobatou ka kerajaan surga, ntawimong!" ³ Ka sia mong si nyai lila ni nabi Yesaya tanaai: "Lengku ni tou si mareke-rekey witu padang kurukutan: Siwonako lalan pakekelangan ni Empung siwonako lalan rendai." ⁴ Wo si Yohanes si limambung siniwo niindomei witu kuli ni onta wo ban ena kuli'o siwon, nyai kulilit witu pootena kakanena se koropir wo madu. ⁵ Tumondong niitu mange mai se tou-tou Yerusalem wia nisia ose tou pakasaan Yudea o se tou limendong Yordan. ⁶ O sea leleen waya ni Yohanes witu Yordan wo sea lumila waya ndosa nea. ⁷ Taan lohone ni Yohanes se tou witu, mbewehan se tou laker Farisi o se Saduki mai maki lele nisia, sia lumila wia nisea, "Nikau kau taranak ni loloi, sei si limila wia nikau lumenteng witu kaupian mange mai? ⁸ Niitumong, wahanei mbua'na masuki wo tobatemu. ⁹ Wo raai toro magenang malilila wia nawakemute: Nikay makataintu si Abraham, papa minatua nai, ka nyaku mailaame wia nikau, wia mbatu-watu yaai si Empung toro tumoorei se oki-oki ni Abraham! ¹⁰ O tarekangkan mpati wetamako witu mbawah kayu, wo ngkayu raai mawehe wua'na leos ketoren tu rombek tu cahawa mako tunggorem mbaha, ¹¹ Nyaku nulitku malele nikau kaampir ndano kantobat, taan nisia se mangemai tumondong nyaku nisia si lembeh taan nyaku selop nate nyaku kuraai kaali. Nisia si lumele nikau kaampit Roh Kudus kaampit mbaha. ¹² Nihu mbia cawasena. Wo nisia si tumaap tampa paluekana wo sia si merur gandum alin witu mbale paharuran, taan nisia si tumunu neta na kaampit mbaha ndaai kapatean." ¹³ Tumondong niitu si Yesus witu Galilea o mai mako witu Yordan tu si Yohanes maki lele si Yohanes. ¹⁴ Taan si Yohanes maulit ma ape nisia wo lumila: "Nyaku ku le leenu taan kaanikou mai wia nyaku?" ¹⁵ Taan si Yesus mingkot wo lumila wia nisia: "Tarekan, maanong, ka tanaaimong mamuali wia nikita ta melelekep pakasaan kaulitan." wo si Yohanes si maya mako nisia. ¹⁶ Pakaleleen ko sia, si Yesus mondolei witu qorem ndano wo itu lohone surga minawuka, wo lohonako Roh ni Empung timumpamei tanu si burung mombo witu natas rookose'na, ¹⁷ wo kalingaane wewehan si mailaamei witu surga, mailaamei: "Si yaaimong si oki iku si kaupuseku, wiate nisia nyaku mapaar."